𞤂𞤉𞤏𞤈𞤓 𞤅𞤓𞥅𞤃𞤀𞤒𞤉𞥅 𞤐𞤁𞤓𞤐 𞤒𞤋𞤀𞥄𞤃𞤀 𞤉 𞤂𞤉𞤒𞤍𞤉 𞤊𞤓𞤍𞤐𞤀𞥄𞤐𞤘𞤉

𞤂𞤫𞤱𞤪𞤵 𞤅𞤵𞥅𞤥𞤢𞤴𞤫𞥅 𞤲𞤣𞤵𞤲 𞤴𞤭𞤢𞥄𞤥𞤢 𞤫 𞤤𞤫𞤴𞤯𞤫 𞤯𞤵𞥅𞤯𞤵𞤯𞤫 𞤱𞤢𞤲𞤮 𞤅𞤢𞤱𞤵𞤣𞤭𞥅⹁ 𞤌𞤧𞤼𞤢𞤪𞤢𞤤𞤭𞥅⹁ 𞤑𞤢𞤼𞤢𞤪 𞤫 𞤴𞤮𞤺𞤢 𞤫 𞤤𞤫𞤴𞤯𞤫 𞤀𞥄𞤪𞤢𞤦𞤵 𞤺𞤮𞥅. 𞤍𞤵𞤥 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤳𞤮 𞤸𞤢𞤲𞤣𞤫 𞤫 𞤃𞤢𞤱𞤲𞤣𞤫 𞤻𞤢𞤤𞤲𞤣𞤫 𞥑 𞤅𞤫𞥅𞤯𞤼𞤮 𞥒𞥐𞥒𞥒 𞤱𞤮𞤲𞤭 𞤳𞤮 𞤧𞤢𞤦𞥆𞤮𞤪𞤣𞤵 𞤅𞤵𞥅𞤥𞤢𞤴𞤫𞥅 𞤲𞤣𞤵𞤲 𞤼𞤭𞤥𞥆𞤭. 𞤸𞤢𞤪𞤢𞤴 𞤳𞤮 𞤶𞤢𞤲𞤺𞤮 𞤱𞤮𞤲𞤭 𞤺𞤮𞤮 𞤤𞤫𞤱𞤪𞤵 𞤅𞤵𞥅𞤥𞤢𞤴𞤫𞥅 𞤲𞤣𞤵𞤲.

𞤖𞤮𞥅𞤪𞤵𞤺𞤮𞤤 𞤅𞤵𞥅𞤥𞤢𞤴𞤫𞥅 𞤳𞤮 𞤺𞤮𞥅𞤼𞤢𞤤 𞤫 𞤼𞤵𞤺𞤢𞥄𞤤𞤫 𞤭𞤧𞤤𞤢𞥄𞤥𞤵 𞤯𞤫𞤲 𞤶𞤮𞤱𞤭. 𞤍𞤫𞤲 𞤼𞤵𞤺𞤢𞥄𞤤𞤫 𞤶𞤮𞥅𞤱𞤭 𞤳𞤮:

• 𞤗𞤭𞤪𞥆𞤢𞤺𞤮𞤤 𞤱𞤮𞤲𞤣𞤫𞤥𞤢 𞤸𞤢𞥄𞤲𞤣𞤵𞤯𞤮 𞤫 𞤪𞤫𞤱𞤫𞥅𞤣𞤫 𞤢𞤤𞤢𞥄 𞤧𞤭 𞤱𞤮𞤲𞤢𞥄 𞤀𞤤𞤤𞤢 𞤫 𞤼𞤢𞤦𞤭𞤦𞤼𞤭𞤲𞤣𞤫 𞤳𞤢𞤣𞤭 𞤱𞤮𞤲𞤣𞤫 𞤃𞤵𞤸𞤢𞤥𞥆𞤢𞤣𞤵 ﷺ 𞤳𞤮 𞤲𞤵𞤤𞤢𞥄𞤯𞤮 𞤃𞤢𞤳𞥆𞤮.
• 𞤙𞤭𞥅𞤩𞤲𞤵𞤺𞤮𞤤 𞤶𞤵𞥅𞤤𞤯𞤫 𞤯𞤫𞤲 𞤶𞤮𞤱𞤭
• 𞤋𞤼𞥆𞤵𞤳𞤮𞤤 𞤶𞤢𞤳𞥆𞤢
• 𞤖𞤮𞥅𞤪𞤵𞤺𞤮𞤤 𞤤𞤫𞤱𞤪𞤵 𞤧𞤵𞥅𞤥𞤢𞤴𞤫𞥅 𞤲𞤣𞤵𞤲 𞤱𞤮𞤲𞤢𞤲𞤣𞤫 𞤮𞤲 𞤧𞤫𞤤𞥆𞤵𞤯𞤮
• 𞤖𞤢𞤶𞥆𞤮𞤴𞤺𞤮𞤤 𞤳𞤢 𞤧𞤵𞥅𞤣𞤵 𞤑𞤢𞥄𞤦𞤢 𞤱𞤮𞤲𞤢𞤲𞤣𞤫 𞤳𞤢𞤤𞤢 𞤮𞤲 𞤥𞤮 𞤘𞤫𞤲𞤮 𞤮𞤲 𞤪𞤮𞤳𞥆𞤭 𞤲𞤦𞤢𞥄𞤱𞤣𞤭.

𞤑𞤮 𞤤𞤫𞤱𞤪𞤵 𞤅𞤵𞥅𞤥𞤢𞤴𞤫𞥅 𞤲𞤣𞤵𞤲 𞤱𞤮𞤲𞤭 𞤤𞤫𞤱𞤪𞤵 𞤶𞤫𞥅𞤲𞤢𞤴𞤢𞤩𞤵𞤪𞤵 𞤸𞤭𞤼𞤢𞥄𞤲𞤣𞤫 𞤲𞤣𞤫𞤲. 𞤑𞤮 𞤫 𞤥𞤢𞤴𞤪𞤵 𞤳𞤢𞤣𞤭 𞤗𞤵𞤪𞥇𞤢𞥄𞤲𞤢𞥄𞤪𞤫 𞤲𞤣𞤫𞤲 𞤼𞤫𞤤𞥆𞤭𞤲𞤢𞥄. 𞤏𞤢𞤲𞤮 𞤯𞤭𞤴𞤢 𞤤𞤫𞤦𞥆𞤭 𞤥𞤢𞤸𞤭𞥅𞤯𞤭 𞤫 𞤤𞤫𞤱𞤤𞤫𞤱𞤢𞤤 𞤯𞤭𞤲⹁ 𞤤𞤫𞤱𞤪𞤵 𞤧𞤵𞥅𞤥𞤢𞤴𞤫𞥅 𞤳𞤮 𞤦𞤢𞥄𞤤𞤯𞤫 𞥒𞥙 𞤱𞤢𞤤𞥆𞤢 𞥓𞥐 𞤼𞤭𞤥𞥆𞤭𞤪𞤼𞤢.

𞤔𞤵𞥅𞤤𞤯𞤮 𞤳𞤢𞤤𞤢 𞤸𞤫𞤤𞥆𞤭𞤬𞤢𞥄𞤯𞤮⹁ 𞤧𞤫𞤤𞥆𞤵𞤯𞤮 𞤲𞤮 𞤱𞤢𞤯𞥆𞤭𞤲𞤢𞥄 𞤸𞤮𞥅𞤪𞤵𞤺𞤮𞤤 𞤲𞤣𞤵. 𞤖𞤮𞥅𞤪𞤵𞤺𞤮𞤤 𞤳𞤮 𞤱𞤮𞤯𞤢𞤺𞤮𞤤 𞤻𞤢𞥄𞤥𞤣𞤵 𞤫 𞤲𞤶𞤢𞤪𞤢𞤥 𞤺𞤭𞤤𞤢 𞤳𞤢 𞤱𞤫𞥅𞤼𞤲𞤣𞤮𞥅𞤺𞤮 𞤸𞤢𞥄 𞤳𞤢 𞤥𞤵𞤼𞤢𞤤 𞤲𞤢𞥄𞤲𞤺𞤫. 𞤇𞤫𞤴𞤯𞤮 𞤱𞤮𞤲𞤯𞤮 𞤥𞤵𞤴𞤲𞤭𞤲𞤣𞤫⹁ 𞤻𞤢𞤱𞤯𞤮 𞤥𞤮 𞤱𞤢𞥄𞤱𞤢𞤼𞤢𞥄⹁ 𞤣𞤫𞤦𞥆𞤮 𞤬𞤭𞥅𞤤𞤭𞥅𞤯𞤮⹁ 𞤫 𞤧𞤫𞤼𞤫𞥅𞤶𞤮⹁ 𞤩𞤫𞥅 𞤬𞤮𞤨 𞤲𞤮 𞤲𞤫𞤱𞤲𞤢𞤲𞤢𞥄 𞤬𞤢𞤩𞥆𞤭𞤲𞤺𞤮𞤤 𞤳𞤮𞥅𞤪𞤳𞤢 𞤳𞤢𞤲 𞤸𞤢𞥄 𞤲𞤣𞤫 𞤲𞤫𞤱𞤮𞤲𞤭𞤪𞤢𞤲𞤭 𞤩𞤫 𞤱𞤮𞥅.

𞤊𞤭𞥅 𞤳𞤢𞤤𞤢 𞤸𞤮𞥅𞤪𞤵𞤺𞤮𞤤 𞤧𞤵𞥅𞤥𞤢𞤴𞤫𞥅 𞤳𞤮 𞤴𞤢𞤥𞤭𞤪𞤮𞥅𞤪𞤫 𞤀𞤤𞤤𞤢 𞤱𞤮𞤲𞤣𞤫 𞤳𞤢 𞤗𞤵𞤪𞥇𞤢𞥄𞤲𞤢⹁ 𞤳𞤮𞥅𞤪𞤳𞤢 𞤲𞤮 𞤱𞤮𞤲𞤣𞤭 𞤳𞤢𞤣𞤭 𞤫 𞤲𞤢𞤬𞤮𞥅𞤶𞤫 𞤯𞤵𞥅𞤯𞤵𞤯𞤫 𞤱𞤮𞤲𞤢𞤲𞤣𞤫 𞤲𞤫𞤯𞥆𞤢𞤲𞤳𞤫. 𞤖𞤢𞤴 𞤧𞤢𞤬𞤪𞤮𞥅𞤩𞤫 𞤩𞤫𞤲 𞤱𞤭𞤲𞤣𞤢𞤲𞤢𞤴 𞤻𞤢𞤱𞤩𞤫 𞤺𞤮𞥅 𞤳𞤮𞥅𞤪𞤳𞤢. 𞤐𞤮 𞤼𞤢𞤱𞤢𞥄 𞤫 𞤲𞤢𞤬𞤮𞥅𞤶𞤫 𞤳𞤮𞥅𞤪𞤳𞤢 𞤢𞤲𞤣𞤢𞥄𞤯𞤫 𞤯𞤫𞤲:

• 𞤑𞤮𞥅𞤪𞤳𞤢 𞤩𞤫𞤴𞤣𞤢𞤴 𞤣𞤵𞥅𞤩𞤭 𞤥𞤢𞤤𞥆𞤢 𞤶𞤵𞥅𞤼𞤭𞤲𞤢𞤴 𞤲𞤺𞤵𞥅𞤪𞤣𞤢𞤥 𞤲𞤫𞤯𞥆𞤮
• 𞤑𞤮𞥅𞤪𞤳𞤢 𞤯𞤵𞤴𞤼𞤢𞤴 𞤼𞤮𞥅𞤳𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵
• 𞤑𞤮𞥅𞤪𞤳𞤢 𞤵𞤴𞤼𞤢𞤴 𞤩𞤫𞤤𞥆𞤫𞤪𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵
• 𞤑𞤮𞥅𞤪𞤳𞤢 𞤳𞤢𞤲 𞤱𞤢𞤤𞥆𞤢𞤴 𞤲𞤫𞤯𞥆𞤮 𞤣𞤢𞤯𞤵𞤺𞤮𞤤 𞤬𞤫𞥅𞤼𞤫𞤪𞤫 𞤫 𞤱𞤭𞤤𞤢𞥄𞤪𞤫 𞤫 𞤵𞤧𞤼𞤢𞥄𞤣𞤫 𞤲𞤺𞤫𞥅𞤼𞤵 𞤥𞤢𞤤𞥆𞤢 𞤸𞤢𞤳𞥆𞤭𞤤𞤫
• 𞤑𞤮𞥅𞤪𞤳𞤢 𞤧𞤫𞤥𞤦𞤭𞤲𞤢𞤴 𞤣𞤢𞤯𞤭𞤼𞤮𞤪𞤯𞤫 𞤩𞤢𞤤𞤲𞤣𞤵 𞤯𞤫𞤲
• 𞤑𞤮𞥅𞤪𞤳𞤢 𞤸𞤫𞤷𞥆𞤭𞤲𞤯𞤭𞤲𞤢𞤴 𞤺𞤵𞤪𞤭𞤤 𞤲𞤺𞤭𞤤 𞤫 𞤩𞤢𞤤𞤲𞤣𞤵

𞤑𞤮𞥅𞤪𞤳𞤢 𞤲𞤮 𞤱𞤮𞥅𞤲𞤣𞤭 𞤫 𞤲𞤢𞤬𞤮𞥅𞤶𞤫 𞤯𞤵𞥅𞤯𞤵𞤯𞤫 𞤸𞤢𞤴 𞤯𞤫 𞤢𞤲𞤣𞤢𞥄𞤳𞤢 𞤬𞤭𞥅 𞤥𞤵𞤵𞤲 𞤼𞤢𞤸𞤮.
𞤃𞤮 𞤸𞤮𞥅𞤪𞤭𞥅 𞤲𞤮𞤲⹁ 𞤱𞤮𞤲𞤢𞥄 𞤴𞤮 𞤮𞤲𞤼𞤭𞤺𞤭 𞤬𞤢𞤲𞤼𞤭𞤲 𞤻𞤢𞥄𞤥𞤣𞤵 𞤲𞤣𞤵𞤲 𞤳𞤢 𞤬𞤫𞤱𞤲𞤣𞤮 𞤸𞤵𞤥𞤼𞤢𞤺𞤮𞤤. 𞤏𞤮𞤲𞤢𞥄 𞤴𞤮 𞤮 𞤻𞤢𞥄𞤥𞤵 𞤫 𞤶𞤮𞥅𞤯𞤢𞤲𞤣𞤫 𞤱𞤮𞥅𞤼𞤫𞤪𞤫 𞤳𞤮 𞤮 𞤻𞤢𞥄𞤥𞤢𞤴𞤲𞤮𞥅 𞤳𞤮𞤲 𞤬𞤮𞤨 𞤫 𞤲𞤣𞤫𞤪 𞤻𞤢𞤤𞥆𞤢𞤤 𞤲𞤺𞤢𞤤. 𞤑𞤮 𞤴𞤮 𞤮𞤲𞤼𞤭𞤺𞤭 𞤸𞤢𞤳𞤭𞤲’𞤣𞤭𞤲 𞤻𞤢𞤥𞤣𞤵 𞤲𞤣𞤵𞤲⹁ 𞤯𞤵𞤯𞥆𞤭𞤲𞤮𞤪𞤢 𞤣𞤭𞤥𞤯𞤫 𞤤𞤫𞤯𞥆𞤫 𞤫 𞤳𞤢𞥄𞤳𞤭 𞤥𞤢𞤤𞥆𞤢 𞤳𞤫𞤷𞥆𞤭 𞤷𞤵𞤲𞤼𞤵𞥅𞤶𞤫 𞤯𞤭𞤲. 𞤑𞤮 𞤴𞤮 𞤮 𞤪𞤫𞥅𞤲𞤮 𞤳𞤢𞤣𞤭 𞤫 𞤬𞤢𞤲𞤼𞤭𞤲𞤺𞤮𞤤 𞤤𞤢𞤥𞤯𞤢𞤲 (𞤥𞤢𞤲𞤣𞤢𞤲) 𞤥𞤢𞥄 𞤧𞤵𞤳𞥆𞤢𞤪 (𞤨𞤫𞤪𞤳𞤢𞤲).

𞤒𞤮 𞤀𞤤𞤤𞤢 𞤲𞤫𞤱𞤭𞤲𞤢𞤲 𞤫𞤲 𞤼𞤭𞤥𞥆𞤭𞤲𞤺𞤮𞤤 𞤸𞤭𞤳𞥆𞤢⹁ 𞤌 𞤼𞤢𞤱𞤲𞤢 𞤫𞤲 𞤳𞤮 𞤢𞤪𞤢𞤼𞤢.