𞤆𞤌𞥅𞤂𞤘𞤓 𞤏𞤌𞤐𞤀𞤐𞤁𞤉 𞤍𞤉𞤃𞤍𞤉 𞤃𞤉𞤉𞤐 𞤉 𞤄𞤋𞤐𞤁𞤋 𞤃𞤉𞤉𞤐

𞤑𞤵𞤥𞤨𞤭𞤼𞤢𞤤 𞤥𞤢𞤱𞤲𞤺𞤢𞤤 𞤱𞤮𞤲𞤢𞤲𞤣𞤫 𞤯𞤫𞤥𞤯𞤫 𞤺𞤫𞤲𞤣𞤭𞥅𞤶𞤫 𞤯𞤫𞤲 𞤫 𞤦𞤭𞤲𞤣𞤭 𞤥𞤫𞥅𞤯𞤫𞤲 𞤀𞤬𞤪𞤭𞤳 𞤯𞤭𞤲. 

𞤃𞤀𞤃𞤀𞤁𞤋 𞤁𞤓𞤃𞤄𞤓𞤒𞤀𞥄⹁ 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤘𞤭𞤲𞤫 𞤲𞤣𞤭𞤲 𞤰𞤫𞤼𞥆𞤭𞥅 𞤸𞤮𞤣𞥆𞤭𞤪𞤮𞥅𞤪𞤫 𞤬𞤭𞥅 𞤯𞤫𞤥𞤯𞤫 𞤥𞤫𞤫𞤲 𞤯𞤫𞤲 𞤫 𞤦𞤭𞤲𞤣𞤭 𞤤𞤢𞤧𞤤𞤭𞥅𞤶𞤭 𞤯𞤭𞤲. 𞤌 𞤴𞤢𞤥𞤭𞤪𞤭𞥅 𞤲𞤢𞤲𞤼𞤭𞤲𞤺𞤮𞤤 𞤫 𞤯𞤫𞤥𞤯𞤫 𞤺𞤫𞤲𞤣𞤭𞥅𞤶𞤫 𞤯𞤫𞤲 𞤱𞤢𞤲𞤮 𞤆𞤵𞤤𞤢𞤪⹁ 𞤃𞤢𞤲𞤭𞤲𞤳𞤢 𞤫 𞤅𞤮𞥅𞤧𞤮⹁ 𞤣𞤫𞤲𞤣𞤢𞥄𞤲𞤺𞤢𞤤 𞤳𞤵𞤥𞤨𞤭𞤼𞤫 𞤴𞤮𞤱𞤭𞤼𞤭𞥅𞤯𞤫 𞤫 𞤺𞤮𞤤𞥆𞤫𞥅 𞤸𞤮𞥅𞤪𞤢𞥄𞤳𞤵 𞤤𞤫𞤴𞤣𞤭 𞤲𞤣𞤭𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤮 𞤴𞤢𞤥𞤭𞤪𞤭𞥅 𞤸𞤵𞥅𞤱𞤼𞤮𞤪𞤺𞤮𞤤 𞤦𞤭𞤲𞤣𞤭 𞤥𞤫𞤫𞤲 𞤯𞤭𞤲 (𞤱𞤢𞤲𞤮 𞤀𞤁𞤂𞤢𞤃 𞤫 𞤐𞤑𞤌) 𞤬𞤭𞥅 𞤲𞤢𞤲𞤼𞤭𞤲𞤺𞤮𞤤 𞤶𞤢𞥄𞤴𞤤𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤸𞤢𞤱𞤼𞤢𞥄𞤲𞤣𞤭 𞤲𞤣𞤭𞤲. 

𞤖𞤭𞤲𞤮 𞤯𞤮𞤮 𞤴𞤮𞤺𞤢 𞤫 𞤫𞤩𞥆𞤮𞥅𞤶𞤫 𞤧𞤵𞥅𞤼𞤢𞥄𞤯𞤫 𞤫 𞤲𞤣𞤫𞤪 𞤸𞤮𞤣𞥆𞤭𞤪𞤮𞥅𞤪𞤫 𞤖𞤮𞥅𞤪𞤫𞥅𞤶𞤮 𞤮𞤲:

𞤖𞤮𞤣𞥆𞤭𞤪𞤮𞥅𞤪𞤫 D/2026/0122/PRG/SGG 𞤻𞤢𞤤𞤲𞤣𞤫 𞥑𞥗 𞤅𞤫𞥅𞤼𞤯𞤮 𞥒𞥐𞥒𞥖

​𞤒𞤮𞤱𞤭𞤼𞤭𞥅𞤲𞤣𞤫 𞤫 𞤺𞤮𞤤𞥆𞤫 𞤳𞤢𞤻𞤵𞤲 𞤫 𞤴𞤵𞤩𞥆𞤮𞥅𞤣𞤭 𞤒𞤭𞥅𞤤𞤭𞤪𞤣𞤫 𞤬𞤭𞥅 𞤊𞤢𞤤𞤼𞤢𞥄𞤪𞤫 𞤫 𞤳𞤵𞤥𞤨𞤭𞤼𞤫 𞤸𞤮𞥅𞤪𞤫𞥅𞤶𞤮 𞤖𞤢𞤱𞤼𞤢𞥄𞤲𞤣𞤭 𞤲𞤣𞤭𞤲⁏

 𞤐𞤮 𞤼𞤢𞤱𞤢𞥄 𞤫 𞤳𞤮 𞤲𞤣𞤫𞥅 𞤒𞤭𞥅𞤤𞤭𞤪𞤣𞤫 𞤬𞤭𞥅 𞤊𞤢𞤤𞤼𞤢𞥄𞤪𞤫 𞤫 𞤑𞤵𞤥𞤨𞤭𞤼𞤫 𞤖𞤮𞥅𞤪𞤫𞥅𞤶𞤮 𞤖𞤢𞤱𞤼𞤢𞥄𞤲𞤣𞤭 𞤲𞤣𞤭𞤲 𞤸𞤢𞤤𞤬𞤭𞤲𞤢𞥄:

• 𞤚𞤢𞤦𞤭𞤲𞤼𞤭𞤲𞤺𞤮𞤤 𞤳𞤵𞤥𞤨𞤭𞤼𞤫 𞤖𞤮𞥅𞤪𞤫𞥅𞤶𞤮 𞤖𞤢𞤱𞤼𞤢𞥄𞤲𞤣𞤭 𞤲𞤣𞤭𞤲
  • 𞤒𞤵𞤩𞥆𞤵𞤺𞤮𞤤 𞤫 𞤰𞤫𞥅𞤱𞤼𞤢𞤺𞤮𞤤 𞤳𞤵𞤥𞤨𞤭𞤼𞤫 𞤸𞤫𞤧𞤤𞤮𞥅𞤩𞤫 𞤩𞤫𞤲 𞤳𞤮 𞤴𞤮𞤱𞤭𞤼𞤭𞥅 𞤫 𞤺𞤮𞤤𞥆𞤫 𞤖𞤮𞥅𞤪𞤫𞥅𞤶𞤮 𞤮𞤲.
  • 𞤅𞤢𞥄𞤳𞤭𞤼𞤵𞤺𞤮𞤤 𞤫 𞤯𞤫𞤥𞤯𞤫 𞤺𞤫𞤲𞤣𞤭𞥅𞤶𞤫 𞤯𞤫𞤲 (𞤱𞤢𞤲𞤮 𞤆𞤵𞤤𞤢𞤪⹁ 𞤃𞤢𞤲𞤭𞤲𞤳𞤢𞥄𞤪𞤫⹁ 𞤅𞤮𞥅𞤧𞤮𞥅𞤪𞤫⹁ 𞤫𞤳𞤲𞤯) 𞤫 𞤯𞤫𞤥𞤯𞤫 𞤶𞤢𞤲𞤢𞤲𞤫 𞤯𞤫𞤲 (𞤱𞤢𞤲𞤮 𞤉𞤲𞤺𞤫𞤤𞤫𞥅𞤪𞤫 𞤫 𞤀𞥄𞤪𞤢𞤦𞤫𞥅𞤪𞤫⹁ 𞤫𞤳𞤲𞤯) 𞤶𞤢𞤴𞤤𞤫 𞤖𞤮𞥅𞤪𞤫𞥅𞤶𞤮 𞤮𞤲.
  • 𞤇𞤢𞤥𞤼𞤵𞤺𞤮𞤤 𞤸𞤵𞥅𞤱𞤼𞤮𞤪𞤺𞤮𞤤 𞤯𞤫𞤥𞤯𞤫 𞤺𞤫𞤲𞤣𞤭𞥅𞤶𞤫 𞤯𞤫𞤲 𞤫 𞤯𞤫𞤥𞤯𞤫 𞤱𞤭𞤲𞤣𞤭𞤪𞤼𞤫𞥅𞤯𞤫 𞤦𞤭𞤲𞤣𞤭 𞤀𞤬𞤪𞤭𞤳 𞤯𞤭𞤲 ( 𞤀𞤁𞤂𞤢𞤃⹁ 𞤐𞤑𞤌⹁ 𞤫𞤳𞤲𞤯)⁏
  • 𞤇𞤢𞤥𞤼𞤵𞤺𞤮𞤤 𞤬𞤢𞤤𞤼𞤢𞥄𞤪𞤫 𞤸𞤵𞥅𞤩𞤵𞤲𞥋𞤣𞤫 𞤼𞤢𞤱𞤲𞤮𞤪𞤢𞤴𞤲𞤣𞤫 (𞤸𞤵𞥅𞤱𞤼𞤮𞤪𞤺𞤮𞤤 𞤯𞤫𞤥𞤺𞤢𞤤 𞤶𞤵𞥅𞤯𞤫 𞤫 𞤥𞤢𞥄𞤤𞤫⹁ 𞤦𞤭𞤲𞤣𞤭 𞤄𞤪𞤢𞥄𞤴𞤭⹁ 𞤫 𞤧𞤭𞤬𞤮𞤪𞤺𞤮𞤤 𞤸𞤭𞤼𞤮).

𞤐𞤣𞤫𞥅 𞤒𞤭𞥅𞤤𞤭𞤪𞤣𞤫 𞤬𞤭𞥅 𞤊𞤢𞤤𞤼𞤢𞥄𞤪𞤫 𞤫 𞤑𞤵𞤥𞤨𞤭𞤼𞤫 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲⹁ 𞤳𞤮 𞤫 𞤤𞤫𞤴 𞤢𞤪𞤣𞤢𞥄𞤳𞤵 𞤔𞤢𞥄𞤺𞤮𞤪𞤺𞤢𞤤 𞤘𞤮𞤤𞥆𞤮𞥅𞤩𞤫 𞤳𞤢 𞤖𞤮𞥅𞤪𞤢𞥄𞤳𞤵 𞤱𞤮𞤲𞤭. 𞤑𞤮 𞤳𞤢𞤴𞤪𞤫 𞤸𞤢𞤤𞤬𞤭𞤲𞤢𞥄 𞤻𞤭𞥅𞤩𞤲𞤵𞤺𞤮𞤤⹁ 𞤴𞤵𞤩𞥆𞤭𞤲𞥋𞤣𞤭𞤪𞤺𞤮𞤤 𞤫 𞤰𞤫𞥅𞤱𞤼𞤢𞤺𞤮𞤤 𞤣𞤢𞤱𞤪𞤮 𞤬𞤢𞤤𞤼𞤢𞥄𞤪𞤫 𞤫 𞤳𞤵𞤥𞤨𞤭𞤼𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲.

𞤑𞤮 𞤃𞤮𞥅𞤣𞤭 𞤓𞤥𞤢𞤪 1 𞤄𞤢𞤪𞤭 𞤱𞤮𞤲𞤭 𞤳𞤮 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴 𞤼𞤮𞤯𞥆𞤭𞥅 𞤫 𞤤𞤫𞤱𞤪𞤵 𞤐𞤦𞤮𞥅𞤴𞤮 𞤬𞤫𞤰𞥆𞤵𞤲𞥋𞤣𞤵 𞤯𞤮𞤮 𞤳𞤮 𞤢𞤪𞤣𞤮𞥅 𞤲𞤣𞤫𞥅 𞤴𞤭𞥅𞤤𞤭𞤪𞤣𞤫. 𞤌 𞤤𞤮𞤲𞤼𞤭𞤳𞤫 𞤃𞤵𞥅𞤧𞤢𞥄 𞤑𞤮𞤲𞤣𞤫 𞤭𞤼𞥆𞤭𞤪𞤢𞥄𞤯𞤮 𞤧𞤢𞤦𞤵 𞤬𞤢𞤺𞥆𞤭𞤼𞤢𞤺𞤮𞤤 𞤬𞤢𞤤𞤶𞤫𞤪𞤫 𞤥𞤢𞤱𞤲𞤣𞤫.