𞤄𞤀𞤐𞤌 𞤉 𞤐𞤀𞤊𞤌𞥅𞤈𞤉 𞤍𞤉𞤍𞤉 𞤃𞤉𞤐 𞤍𞤉𞤐
𞤊𞤭𞥅 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤫 𞤤𞤫𞤴𞤣𞤭 𞤺𞤭𞤲𞤫⹁ 𞤶𞤢𞥄𞤺𞤮𞤪𞤢𞥄𞤯𞤮 𞤸𞤢𞤤𞤬𞤭𞤲𞤢𞥄𞤯𞤮 𞤮𞤲 𞤶𞤢𞤲𞤺𞤣𞤫 𞤲𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤫 𞤲𞤣𞤫𞤲 𞤫 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤵𞤲⹁ 𞤴𞤭𞥅𞤼𞤵𞤣𞤵𞤲𞤮 𞤫 𞤴𞤭𞤥𞤩𞤫 𞤴𞤭𞥅𞤤𞤭𞤪𞤣𞤫 𞤲𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤫 𞤲𞤣𞤫𞤲 𞤬𞤭𞥅 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤵𞤲. 𞤍𞤵𞤥 𞤳𞤮 𞤫 𞤐𞤶𞤫𞤧𞤤𞤢𞥄𞤪𞤫⹁ 𞤻𞤢𞤤𞤲𞤣𞤫 𞥒𞥗 𞤧𞤭𞥅𞤤𞤮 𞥒𞥐𞥒𞥑⹁ 𞤱𞤢𞤯𞤭.
𞤒𞤫𞤱𞤼𞤫𞤪𞤫 𞤲𞤣𞤫𞤲 𞤬𞤮𞤱 𞤳𞤮 𞤫 𞤸𞤮𞥅𞤪𞤫 𞤲𞤣𞤫𞤫 𞤼𞤮𞤩𞥆𞤫𞤪𞤫 𞤯𞤮𞤮 𞤱𞤮𞤲𞥆𞤮𞥅: 𞤖𞤮𞤤 𞤲𞤮 𞤺𞤫𞤪𞤣𞤫𞥅𞤼𞤫𞥅 𞤬𞤭𞥅 𞤴𞤮 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤵𞤲 𞤺𞤭𞤲𞤫 𞤯𞤮𞤮 𞤱𞤮𞤲𞤵 𞤸𞤵𞥅𞤲𞤣𞤫 𞤱𞤢𞤤𞥆𞤢𞤴𞤲𞤣𞤫 𞤶𞤮𞤺𞤭𞤲𞥋𞤣𞤭𞤪𞤺𞤮𞤤 𞤴𞤵𞤩𞥆𞤭𞤲𞤣𞤭𞤪𞤢⹁ 𞤴𞤵𞤪𞤥𞤮𞤲𞤣𞤭𞤪𞤢𞤤 𞤲’𞤺𞤫𞤣𞤭𞤴𞤢𞤲𞤳𞤮𞤱𞤢𞤤 𞤲𞤺𞤢𞤤؟
𞤊𞤭𞥅 𞤶𞤢𞥄𞤦𞤢𞤺𞤮𞤤 𞤲’𞤺𞤢𞤤 𞤤𞤢𞤲𞤣𞤢𞤤⹁ 𞤕𞤫𞤪𞤲𞤮 𞤀𞤤𞤬𞤢𞥄 𞤀𞤸𞤥𞤢𞤣𞤵 𞤄𞤢𞤲𞤮 𞤦𞤢𞤪𞤭 𞤸𞤮𞤤𞥆𞤭 𞤫 𞤴𞤭𞤢𞤲𞤣𞤫 𞤥𞤵𞤲 𞤱𞤮𞤲𞤣𞤫𞤥𞤢 𞤧𞤭 𞤯𞤵𞤥 𞤯𞤮𞤲 𞤤𞤢𞥄𞤼𞤮𞤼𞤮⹁ 𞤸𞤢𞤪𞤢𞤴 𞤳𞤮 𞤥𞤢𞥄 𞤬𞤵𞤯𞥆𞤮𞤪𞤢 𞤳𞤢 𞤣𞤢𞤰𞥆𞤫𞤪𞤫. 𞤑𞤮 𞤱𞤮𞤲𞤭 𞤯𞤵𞤥:
𞤑𞤮 𞤫𞤼𞤢𞤺𞤮𞤤 𞤥𞤮𞤰𞥆𞤭𞤲𞤼𞤭𞤲𞤢 𞤣𞤫𞤬𞤼𞤭𞤪𞤣𞤵 𞤴𞤭𞥅𞤤𞤭𞤪𞤣𞤫 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤫𞤲𞤣𞤭𞤴𞤢𞤲𞤳𞤫𞤱𞤵 𞤲𞤺𞤵𞤲⹁ 𞤪𞤫𞤬𞤼𞤭 𞤯𞤢𞤩𞥆𞤭𞤼𞤢⹁ 𞤥𞤮𞥅𞤩𞤭𞤼𞤢 𞤳𞤮 𞤸𞤫𞤣𞥆𞤭𞥅 𞤫 𞤣𞤫𞤬𞤼𞤫 𞤱𞤭𞤲𞤣𞤢𞤲𞤮𞥅𞤯𞤫 𞤫 𞤯𞤫𞤲𞤯𞤫 𞤥𞤫𞤲 𞤥𞤵𞤴𞤲𞤢𞥄𞤯𞤫 𞤯𞤫𞤲⹁ 𞤥𞤮𞤰𞥆𞤭𞤲𞤢𞤲𞤮𞥅𞤯𞤫 𞤭𞤤𞤢 𞤳𞤢 𞤤𞤢𞥄𞤥𞤵 𞤢𞤪𞤢𞤲𞤵.
𞤅𞤭𞤲𞤷𞤢 𞤺𞤢𞤲𞤣𞤫 𞤸𞤢𞤱𞤪𞤮𞤲𞤣𞤭𞤪𞤯𞤫 𞤫 𞤳𞤮 𞤬𞤫𞤱𞤲𞤣𞤭𞥅 𞤳𞤮𞤲.
𞤍𞤢𞤩𞥆𞤭𞤼𞤢 𞤫 𞤧𞤢𞤤𞤲𞤣𞤵 𞤺𞤢𞤲𞤣𞤢𞤤 𞤲𞤣𞤵𞤲⹁ 𞤷𞤫𞤪𞤲𞤮𞥅𞤩𞤫 𞤯𞤫𞤲𞤯𞤫𞤴𞤢𞤲𞤳𞤮𞥅𞤩𞤫⹁ 𞤪𞤫𞤬𞤼𞤭 𞤰𞤫𞤼𞥆𞤢 𞤫 𞤥𞤢𞤩𞥆𞤫 𞤸𞤢𞤴 𞤧𞤭 𞤳𞤮 𞤴𞤭𞤥𞤩𞤫 𞤧𞤢𞤨𞥆𞤮 (𞥑𞥐) 𞤳𞤮 𞤺𞤮𞤤𞥆𞤭𞤣𞤢 𞤫 𞤴𞤭𞥅𞤤𞤭𞤪𞤣𞤫 𞤸𞤢𞤩𞤢𞤴𞤲𞤣𞤫 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤵𞤲.
𞤉𞤤𞤼𞤢 𞤴𞤭𞤥𞤩𞤫 𞤦𞤵𞤴 𞤬𞤭𞥅 𞤴𞤮 𞤩𞤫 𞤱𞤮𞤲𞤵 𞤯𞤮𞤱𞤢𞤴𞤩𞤫 𞤶𞤢𞤲𞤺𞤭𞤲𞤢 𞤳𞤢𞤻𞤵𞤲 𞤳𞤢𞤣𞤭.
- 𞤅𞤵𞤩𞤮𞥅 𞤬𞤭𞥅 𞤫𞤤𞤼𞤵𞤺𞤮𞤤 𞤲𞤺𞤮𞤤⹁ 𞤴𞤭𞤥𞤩𞤫 𞤩𞤫: 𞤲𞤢𞥄𞤩𞤢𞥄𞤳𞤢 𞤶𞤢𞤲𞤺𞤣𞤫 𞤬𞤫𞤱⹁ 𞤥𞤢𞥄 𞤴𞤢𞤤𞤼𞤭𞤲𞤢𞥄𞤩𞤫 𞤫 𞤶𞤢𞤲𞤺𞤣𞤫 𞤥𞤢𞤤𞥆𞤢 𞤥𞤢𞤱𞤲𞤵𞤩𞤫 𞤩𞤫𞤲.
𞤔𞤢𞥄𞤺𞤮𞤪𞤢𞥄𞤯𞤮 𞤸𞤢𞤤𞤬𞤭𞤲𞤢𞥄𞤯𞤮 𞤶𞤢𞤲𞤺𞤣𞤫 𞤲𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤫 𞤲𞤣𞤫𞤲 𞤫 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤵𞤲 𞤱𞤭𞤭⹁ 𞤴𞤵𞤩𞥆𞤮𞤲𞥋𞤣𞤭𞤪𞤢𞤤 𞤫 𞤺𞤮𞤤𞥆𞤭𞤣𞤭𞤺𞤵𞤤 𞤷𞤢𞤤𞤯𞤭 𞤯𞤫𞤲𞤯𞤫𞤴𞤢𞤲𞤳𞤮𞥅𞤶𞤭 𞤶𞤢𞥄𞤩𞤭𞤸𞤢𞤼𞥆𞤭𞤪𞤯𞤫 𞤘𞤭𞤲𞤫 𞤯𞤭𞤲 𞤳𞤢𞤻𞤵𞤲 𞤫 𞤋𞤈𞤂𞤀 ( 𞤣𞤵𞤯𞤢𞤤 𞤱𞤭𞤯𞤼𞤮 𞤯𞤫𞤲𞤯𞤫 𞤸𞤵𞥅𞤼𞤮𞤪𞤼𞤫𞥅𞤯𞤫 𞤯𞤫𞤲) 𞤲𞤮 𞤸𞤢𞥄𞤲𞤭 𞤸𞤫𞤴𞤯𞤭𞤲𞤼𞤭𞤲𞤫𞥅𞤣𞤫 𞤫 𞤴𞤫𞤯𞥆𞤭𞤲𞤫𞥅𞤣𞤫..
𞤌𞤲𞤼𞤵𞤥𞤢 𞤷𞤫𞤪𞤲𞤮 𞤄𞤢𞤲𞤮 𞤄𞤢𞤪𞤭 𞤴𞤢𞤥𞤭𞤪𞤭 𞤸𞤮𞥅𞤪𞤫𞥅𞤩𞤫 𞤴𞤭𞥅𞤤𞤭𞤪𞤣𞤫 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤣𞤫𞤲⹁ 𞤱𞤭𞤲𞤣𞤵𞤺𞤮𞤤 𞤣𞤫𞤬𞤼𞤫𞤪𞤫 𞤤𞤢𞥄𞤱𞤮𞤤 𞤲𞤶𞤵𞤩𞥆𞤵𞤣𞤭 𞤱𞤢𞤤𞥆𞤭𞤼𞤮𞤪𞤲𞤣𞤭 𞤬𞤭𞥅 𞤴𞤵𞤪𞤥𞤮𞤲𞤣𞤭𞤪𞤢𞤤 𞤩𞤭𞤯𞤩𞤫 𞤤𞤫𞤴𞤣𞤭 𞤺𞤭𞤲𞤫 𞤲𞤣𞤭𞤲.
𞤅𞤭 𞤲𞤣𞤫𞤲 𞤣𞤫𞤬𞤼𞤫𞤪𞤫 𞤧𞤢𞥄𞤼𞤢𞥄𞤥𞤢⹁ 𞤲𞤣𞤫 𞤱𞤫𞥅𞤩𞤭𞤼𞤫𞥅 𞤫 𞤼𞤵𞤥𞤦𞤮𞤲𞥋𞤣𞤭𞤪𞤫 𞤢𞤪𞤮𞥅𞤶𞤫 𞤢𞤪𞤣𞤭𞥅𞤩𞤫 𞤶𞤢𞤲𞤺𞤣𞤫 𞤩𞤫𞤲. 𞤌𞤲𞤼𞤵𞤥𞤢 𞤩𞤫 𞤰𞤫𞤼𞥆𞤢 𞤲𞤣𞤫⹁ 𞤩𞤫 𞤸𞤵𞥅𞤱𞤼𞤮𞤪𞤢 𞤬𞤭𞥅 𞤶𞤢𞤲𞤺𞤣𞤫 𞤱𞤮𞤲𞤢𞤲𞤣𞤫 𞤩𞤫𞤲 𞤼𞤮𞤯𞥆𞤢𞥄𞤩𞤫 𞤳𞤢 𞤯𞤫𞤲𞤯𞤫 𞤥𞤫𞤲 𞤥𞤵𞤴𞤲𞤢𞥄𞤯𞤫 𞤫 𞤳𞤢 𞤬𞤢𞤪𞤢𞤲𞤧𞤭𞥅𞤪𞤫.
𞤊𞤢𞥄𞤸𞤭𞤲 𞤮𞤥𞤮 𞤴𞤫𞤤𞤭𞥅 𞤱𞤢𞤯𞤵𞤺𞤮𞤤 𞤶𞤢𞤲𞤺𞤣𞤫 𞤫 𞤯𞤫𞤲𞤯𞤫 𞤥𞤫𞤲⹁ 𞤸𞤵𞥅𞤱𞤲𞤣𞤫 𞤱𞤢𞤤𞥆𞤭𞤼𞤮𞤪𞤲𞤣𞤫 𞤧𞤢𞤦𞤵 𞤶𞤭𞤻𞤢𞤲𞤣𞤫 𞤫 𞤲𞤦𞤫𞤤𞤫𞥅𞤯𞤫 𞤳𞤮 𞤸𞤵𞤥𞤭𞥅 𞤫 𞤥𞤵𞤵𞤲 𞤳𞤮𞤲.
𞤊𞤮𞤼𞤭 𞤮𞤲𞤼𞤭𞤺𞤭 𞤳𞤮 𞤺𞤢𞤲𞤣𞤮 𞤥𞤢𞥄 𞤱𞤮𞤲𞤢𞥄 𞤮 𞤯𞤵𞤥⹁ 𞤥𞤮 𞤳𞤢𞤤𞤢 𞤲𞤮 𞤸𞤢𞥄𞤲𞤭 𞤱𞤢𞤯𞤼𞤢𞤲𞤣𞤫 𞤴𞤭𞤤𞥆𞤢 𞤫 𞤲𞤣𞤫𞤫 𞤬𞤫𞤬𞤪𞤫⹁ 𞤮 𞤫𞤼𞤮𞥅 𞤮 𞤶𞤢𞤲𞤺𞤢 𞤯𞤫𞤲𞤺𞤢𞤤 𞤺𞤮𞥅 𞤸𞤢𞤪𞤢 𞤱𞤮𞤲𞤢𞥄 𞤲𞤺𞤢𞤤 𞤮 𞤥𞤵𞤴𞤲𞤭 𞤲𞤺𞤢𞤤.
𞤑𞤮 𞤤𞤢𞥄𞤩𞤭 𞤳𞤮𞤲⹁ 𞤲𞤺𞤢𞤤 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤯𞤮𞤮⹁ 𞤱𞤢𞤤𞥆𞤭𞤼𞤭𞤳𞤫 𞤬𞤭𞥅 𞤱𞤢𞤯𞤢𞤼𞤢𞤲𞤺𞤮𞤤 𞤴𞤭𞤤𞥆𞤢 𞤳𞤢𞤻𞤵𞤲 𞤫 𞤣𞤢𞤪𞤢𞤺𞤮𞤤 𞤬𞤫𞤣𞥆𞤫 𞤳𞤢𞤤𞤢 ( 𞤱𞤮𞤲𞤭 𞤷𞤢𞤤𞤯𞤭 𞤯𞤭𞤲 𞤥𞤢𞥄 𞤴𞤭𞤥𞤩𞤫 𞤴𞤭𞥅𞤤𞤭𞤪𞤣𞤫 𞤲𞤺𞤫𞤲𞤣𞤭𞤴𞤢𞤲𞤳𞤮𞥅𞤪𞤫 𞤲𞤣𞤫𞤲) 𞤬𞤭𞥅 𞤴𞤭𞤭𞤼𞤵𞤺𞤮𞤤 𞤦𞤢𞤽𞥆𞤫 𞤫 𞤷𞤮𞤩𞥆𞤭 𞤳𞤫𞤧𞤭. 𞤄𞤫𞤤𞤢𞤶𞤮𞥅 𞤯𞤵𞤲 𞤱𞤢𞤯𞤢𞤲𞤢𞤴 𞤸𞤢𞤩𞤵𞤺𞤮𞤤 𞤸𞤵𞤥𞤢𞤥𞤦𞤭𞤲𞥆𞤢𞥄𞤳𞤵 𞤲𞤺𞤵𞤲⹁ 𞤨𞤵𞤤𞤺𞤢𞤤 𞤫 𞤲𞤢𞤬𞤮𞥅𞤶𞤫 𞤯𞤫 𞤧𞤭𞤬𞤢 𞤥𞤵𞤲 𞤴𞤭𞤢𞥄𞤳𞤢 𞤸𞤢𞥄 𞤸𞤢𞤲𞤣𞤫 𞤫 𞤨𞤫𞤰𞥆𞤮𞤤 𞤤𞤫𞤴𞤣𞤭 𞤥𞤫𞤲 𞤲𞤣𞤭𞤲.
𞤌𞤲 𞤔𞤢𞥄𞤪𞤢𞥄𞤥𞤢 𞤮𞤲 𞤱𞤫𞤤𞤼𞤢𞤲𞤢𞥄𞤥𞤢 𞤧𞤢𞤲𞥆𞤫 𞤺𞤮𞤤𞥆𞤫 𞤥𞤮𞤲𞤯𞤫𞤲 𞤴𞤮𞥅𞤯𞤭𞥅 𞤤𞤢𞤦𞤢𞥄 𞤥𞤮𞤰𞥆𞤢 😍
𞤃𞤢 𞤸𞤫𞤲 𞤳𞤮 𞤴𞤫𞥅𞤧𞤮 𞤬𞤢𞤵𞤭.
𞤖𞤢𞤪𞤢𞤴 𞤯𞤵𞤲 𞤯𞤮𞤮 𞤲𞤮 𞤤𞤢𞤦𞤢𞥄 𞤸𞤢𞥄 𞤳𞤢 𞤳𞤢𞤲𞤳𞤮 𞤢𞤪𞤣𞤭𞥅𞤯𞤮 𞤦𞤢𞤽𞥆𞤫 𞤶𞤢𞤲𞤣𞤫 𞤲𞤣𞤫𞤲 𞤳𞤢 𞤤𞤫𞤴𞤣𞤭 𞤯𞤮𞤮 𞤴𞤫𞤱𞤼𞤵𞤺𞤮𞤤 𞤱𞤢𞤯𞤼𞤢𞤲𞤢 𞤴𞤭𞤤𞥆𞤢 𞤫 𞤬𞤭𞥅 𞤶𞤢𞤲𞤺𞤵𞤲’𞤺𞤮𞤤 𞤯𞤫𞤫 𞤯𞤫𞤲𞤯𞤫 𞤥𞤫𞤲.
𞤖𞤢𞤪𞤢𞤴 𞤳𞤮 𞤲𞤭𞥅 𞤬𞤵𞤯𞥆𞤮𞤪𞤼𞤢⹁ 𞤸𞤢𞥄 𞤺𞤮𞤤𞥆𞤫 𞤯𞤫𞤲 𞤲𞤢𞤲𞤺𞤫𞥅.