𞤉𞤐 𞤚𞤋𞤃𞥆𞤋𞥅 𞤁𞤓𞤔𞤓𞤐𞤉 𞤐𞤔𞤉𞥅𞤚𞤀𞤚𞤌 𞤒𞤋𞤃𞤇𞤉

𞤉𞤲 𞤼𞤭𞤥𞥆𞤭𞤲𞤭𞥅 𞤣𞤵𞤶𞤵𞤲𞤫 𞤲𞤶𞤫𞥅𞤼𞤢𞤼𞤮 𞤴𞤭𞤥𞤩𞤫 𞤱𞤵𞥅𞤪𞤵𞤩𞤫 𞤸𞤮𞥅𞤪𞤫 𞤤𞤢𞥄𞤤𞤢𞤺𞤢𞤤 𞤤𞤫𞤴𞤣𞤭 𞤲𞤣𞤭𞤲. 𞤑𞤮 𞤯𞤵𞤥 𞤢𞤲𞤼𞤵𞤩𞤫 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 (ONU/UN) 𞤸𞤮𞤤𞥆𞤭 𞤫 𞤳𞤢𞤴𞤣𞤭𞥅𞤪𞤭 𞤲𞤣𞤭 𞤩𞤫 𞤴𞤢𞤤𞤼𞤭𞤲𞤭 𞤸𞤢𞤲𞤣𞤫 𞤫 𞤃𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥑𞥕 𞤔𞤮𞤤𞤮 𞥒𞥐𞥒𞥒.

𞤉 𞤲𞤣𞤫𞤪 𞤲𞤣𞤭𞤲 𞤳𞤢𞤴𞤣𞤭𞥅𞤪𞤭⹁ 𞤩𞤫 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤶𞤵𞥅𞤼𞤢𞤤 𞤲𞤺𞤵𞥅𞤪𞤲𞤣𞤢𞤥 𞤩𞤫𞤴𞤣𞤭𞤳𞤫 𞤳𞤮𞤲𞤮 𞤫𞤥𞤦𞤫𞤪𞤫 𞤩𞤭𞤩𞥆𞤫 𞤱𞤮𞤲𞤢𞥄𞤩𞤫 𞤶𞤭𞤦𞤭𞤲𞤫𞥅𞤣𞤫 𞤩𞤫𞤲 𞤵𞤧𞤼𞤭𞤳𞤫 𞤬𞤮𞤼𞤢. 𞤖𞤢𞤲𞤣𞤫 𞤥𞤮 𞤲𞤣𞤢𞥄𞤪𞤭𞥅 𞤫 𞤲𞤣𞤫𞤪 𞤤𞤫𞤴𞤯𞤫 𞤯𞤵𞥅𞤯𞤵𞤯𞤫⹁ 𞤼𞤢𞤱𞤢𞤴 𞤳𞤮 𞤫𞤥𞤦𞤫𞤪𞤫 𞤩𞤭𞤩𞥆𞤫 𞤯𞤭𞤯𞤮 𞤨𞤫𞤼 𞤣𞤫𞤦𞥆𞤮 𞤬𞤫𞤱𞤲𞤣𞤭𞥅𞤯𞤮 𞤳𞤢𞤤𞤢 𞤱𞤮𞤲𞤭 𞤸𞤫𞤩𞤵𞤣𞤫. 𞤍𞤵𞤲 𞤤𞤫 𞤴𞤮𞤲𞤢𞤼𞤢𞥄 𞤳𞤮 𞤩𞤫𞤴𞤣𞤢 𞤭𞤼𞥆𞤭𞤪𞤭 𞤤𞤭𞤥𞤮𞥅𞤪𞤫 𞤴𞤭𞤥𞤩𞤫 𞤩𞤫𞤲 𞤧𞤭 𞤱𞤮𞤲𞤵𞤩𞤫 𞤥𞤢𞥄𞤴𞤵𞤣𞤫 𞤩𞤫𞤲 𞤭𞤼𞥆𞤢𞥄𞤥𞤢. 𞤑𞤮 𞤯𞤵𞤥 𞤱𞤢𞤯𞤭 𞤤𞤫𞤴𞤯𞤫 𞤺𞤮𞥅 𞤴𞤭𞤮𞤴𞤢𞤴 𞤤𞤭𞤥𞤮𞥅𞤪𞤫 𞤴𞤭𞤥𞤩𞤫 𞤥𞤵𞤵𞤲 𞤲𞤮 𞤵𞤧𞤼𞤮𞥅 𞤼𞤫𞤲𞤼𞤭𞤲𞤭𞥅 𞤸𞤫𞤣𞥆𞤫 𞤉𞤪𞤮𞤨 𞤫 𞤴𞤮𞤺𞤢 𞤫 𞤤𞤫𞤴𞤯𞤫 𞤀𞥄𞤧𞤭𞤴𞤢.

𞤏𞤵𞤪𞤭𞤲 𞤯𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥕𞥐⹁ 𞤼𞤢𞤱𞤢𞤴 𞤸𞤫𞤩𞤵𞤩𞤫 𞤩𞤫𞤲 𞤣𞤵𞥅𞤩𞤭 𞥖𞥕 𞤫 𞤩𞤫𞤲 𞤩𞤫 𞤼𞤭𞤥𞥆𞤭𞤲𞤢𞥄𞤤𞤭 𞤣𞤵𞥅𞤩𞤭 𞥑𞥒 𞤬𞤮𞤼𞤭𞥅 𞤼𞤫𞤳. 𞤍𞤵𞤥 𞤳𞤮 𞤼𞤢𞤱𞤵𞤣𞤫 𞤦𞤢𞥄𞤤𞤯𞤫 𞤶𞤵𞥅𞤼𞤭𞥅 𞤳𞤮𞤲𞤮 𞤬𞤫𞤥𞤦𞤵𞤤𞤫 𞤴𞤢𞤴𞤤𞤭𞥅.

𞤑𞤮 𞤯𞤵𞤥 𞤱𞤢𞤯𞤭⹁ 𞤧𞤭 𞤼𞤢𞤱𞤭𞥅𞤲𞤮 𞤳𞤮 𞤣𞤵𞥅𞤩𞤭 𞤧𞤢𞤨𞥆𞤮-𞤫-𞤺𞤮𞤮 𞤰𞤫𞤼𞥆𞤭 𞤬𞤭𞥅 𞤲𞤮 𞤤𞤭𞤥𞤮𞥅𞤪𞤫 𞤴𞤭𞤥𞤩𞤫 𞤩𞤫𞤲 𞤩𞤫𞤴𞤣𞤮𞤪𞤢 𞤣𞤵𞤶𞤵𞤲𞤫𞤪𞤫 𞤱𞤮𞥅𞤼𞤫𞤪𞤫⹁ 𞤶𞤮𞥅𞤲𞤭 𞤳𞤮 𞤣𞤵𞥅𞤩𞤭 𞤧𞤢𞤨𞥆𞤮-𞤫-𞤶𞤮𞤱𞤭 𞤰𞤫𞤼𞥆𞤮𞤴𞤼𞤢 𞤬𞤭𞥅 𞤲𞤮 𞤩𞤫𞤴𞤣𞤮𞤪𞤫𞤲 𞤫𞤥𞤦𞤫𞤪𞤫 𞤣𞤵𞤶𞤵𞤲𞤫𞤪𞤫 𞤱𞤮𞥅𞤼𞤫𞤪𞤫. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥑 𞤼𞤭𞤥𞥆𞤭𞤲𞤯𞤫𞤲 𞤣𞤵𞤶𞤵𞤲𞤫 𞤶𞤫𞥅𞤯𞤭𞤯𞤭. 𞤑𞤮𞤲𞤮 𞤫𞤲 𞤼𞤭𞤥𞤢𞤼𞤢𞥄 𞤣𞤵𞤶𞤵𞤲𞤫 𞤶𞤫𞥅𞤲𞤢𞤴𞤭 𞤸𞤢𞥄 𞤫 𞤸𞤭𞤼𞥆𞤢𞤲𞤣𞤫 𞥒𞥐𞥒𞥗.

𞤉 𞤲𞤣𞤫𞤪 𞤲𞤣𞤭𞤲 𞤳𞤢𞤴𞤣𞤭⹁ 𞤢𞤲𞤼𞤵𞤩𞤫 𞤩𞤫𞤲 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤫 𞤸𞤭𞤼𞤢𞥄𞤲𞤣𞤫 𞤢𞤪𞤮𞥅𞤪𞤫 𞤯𞤮𞤮⹁ 𞤯𞤵𞤥 𞤳𞤮 𞤫 𞥒𞥐𞥒𞥓⹁ 𞤤𞤫𞤴𞤣𞤭 𞤋𞤲𞤣𞤭𞤴𞤢 𞤲𞤣𞤭𞤲 𞤬𞤫𞤰𞥆𞤭𞤼𞤮𞤴𞤼𞤮 𞤤𞤫𞤴𞤣𞤭 𞤕𞤢𞤴𞤲𞤢 𞤲𞤣𞤭𞤲 𞤴𞤭𞤥𞤩𞤫. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤯𞤮𞥅 𞤫 𞥒𞥐𞥓𞥐⹁ 𞤐𞤢𞤶𞤫𞤪𞤭𞤴𞤢 𞤸𞤫𞤱𞤼𞤭𞤼𞤮𞤴𞤼𞤮 𞤀𞤥𞤫𞤪𞤭𞤳 𞤫 𞤫𞤥𞤦𞤫𞤪𞤫 𞤴𞤭𞤥𞤩𞤫 𞤬𞤭𞥅 𞤳𞤢𞤤𞤢 𞤬𞤫𞤱𞤲𞤣𞤮 𞤸𞤢𞤲𞤣𞤫⹁ 𞤀𞤥𞤫𞤪𞤭𞤳 𞤲𞤮 𞤬𞤫𞤰𞥆𞤭𞤼𞤮𞤪𞤭 𞤐𞤢𞤶𞤫𞤪𞤭𞤴𞤢 𞤴𞤭𞤥𞤩𞤫 𞤣𞤵𞤦𞤵𞤲𞤫 𞥑𞥒𞥖. 𞤉 𞤸𞤭𞤼𞤢𞥄𞤲𞤣𞤫 𞥒𞥐𞥕𞥐⹁ 𞤳𞤮 𞤐𞤢𞤶𞤫𞤪𞤭𞤴𞤢 𞤱𞤮𞤲𞤮𞤴𞤼𞤢 𞤤𞤫𞤴𞤣𞤭 𞤼𞤢𞤼𞤢𞤩𞤭𞤪𞤭 𞤲𞤣𞤭𞤲 𞤫 𞤸𞤫𞥅𞤱𞤵𞤣𞤫 𞤴𞤭𞤥𞤩𞤫⹁ 𞤑𞤮𞤲𞤺𞤮 𞤁𞤫𞤥𞤮𞤳𞤢𞤪𞤢𞥄𞤪𞤭 𞤱𞤮𞤲𞤢 𞤶𞤫𞥅𞤼𞤢𞤼𞤢𞤩𞤭𞤪𞤭 𞤲𞤣𞤭𞤲 𞤫 𞤸𞤫𞥅𞤱𞤵𞤣𞤫 𞤴𞤭𞤥𞤩𞤫. 𞤉 𞤲𞤣𞤫𞤪 𞤣𞤵𞥅𞤩𞤭 𞥒𞥗⹁ 𞤑𞤮𞤲𞤺𞤮 𞤼𞤵𞤲 𞤩𞤫𞤴𞤣𞤮𞤪𞤢𞤴 𞤳𞤮 𞤴𞤢𞤱𞤼𞤭 𞤴𞤭𞤥𞤩𞤫 𞤣𞤵𞤦𞤵𞤲𞤫 𞥑𞥑𞥘.

𞤏𞤵𞤪𞤭𞤲 ⹁ 𞤳𞤮 𞤳𞤢 𞤤𞤢𞤸𞤫𞥅𞤪𞤭 𞤀𞤬𞤪𞤭𞤳 𞤬𞤫𞤷𞥆𞤫𞤪𞤫 𞤫 𞤳𞤮 𞤩𞤫𞤴𞤣𞤮𞤼𞤮𞥅 𞤳𞤮𞤲 𞤫 𞤴𞤭𞤥𞤩𞤫 𞤩𞤫𞤲 𞤭𞤱𞤮𞤴𞤼𞤢 𞤫 𞤲𞤣𞤫𞤪 𞤯𞤭𞥅 𞤣𞤵𞥅𞤩𞤭 𞤲𞤮𞤺𞤢𞤴 𞤫 𞤶𞤫𞥅𞤼𞤢𞤼𞤭 𞤧𞤢𞥄𞤼𞤭𞥅𞤯𞤭 𞤯𞤮𞤮.

𞤉 𞤯𞤫𞤫 𞤤𞤫𞤴𞤯𞤫 𞤳𞤢 𞤲𞤢𞤴𞤫𞥅𞤩𞤫 𞤩𞤫𞤲 𞤱𞤮𞤲𞤭 𞤩𞤫𞤴𞤣𞤢𞥄𞤣𞤫 𞤼𞤮𞤲 𞤬𞤮𞤼𞤢⹁ 𞤱𞤢𞤲𞤮 𞤉𞤪𞤮𞤨 𞤫 𞤔𞤢𞤨𞤢𞤲⹁ 𞤯𞤵𞤥 𞤲𞤮 𞤢𞤣𞥆𞤢𞤲𞤣𞤫 𞤩𞤫 𞤷𞤢𞤯𞤫𞥅𞤤𞤫 𞤯𞤵𞥅𞤯𞤵𞤯𞤫. 𞤐𞤮 𞤼𞤢𞤱𞤢𞥄 𞤫 𞤯𞤫𞤲⹁ 𞤼𞤭𞥅𞤯𞤵𞤺𞤮𞤤 𞤷𞤮𞤺𞥆𞤵 𞤣𞤢𞤲𞤳𞤢𞤺𞤮𞤤 𞤫 𞤼𞤮𞤨𞥆𞤭𞤼𞤢𞤺𞤮𞤤 𞤩𞤫𞤲 𞤲𞤢𞤴𞤫𞥅𞤩𞤫 𞤼𞤢𞤱𞤼𞤭 𞤧𞤢𞤯𞤵𞤺𞤮𞤤 𞤧𞤵𞤳𞤢𞥄𞤩𞤫 𞤳𞤮 𞤤𞤮𞤲𞤼𞤮𞥅 𞤳𞤢 𞤺𞤮𞤤𞥆𞤫 𞤩𞤫𞤲 𞤱𞤮𞤲𞤵𞤩𞤫 𞤲𞤢𞤴𞤱𞤵𞤣𞤫.

𞤑𞤮𞤲𞤮 𞤲𞤮𞤲 𞤳𞤢 𞤴𞤭𞤥𞤩𞤫 𞤩𞤫𞤲 𞤱𞤮𞤲𞤭 𞤩𞤫𞤴𞤣𞤢𞥄𞤣𞤫 𞤼𞤮𞤲 𞤬𞤮𞤼𞤢 𞤱𞤢𞤲𞤮 𞤫 𞤂𞤢𞤸𞤫𞥅𞤪𞤭 𞤀𞤬𞤪𞤭𞤳 𞤲𞤣𞤭𞤲⹁ 𞤧𞤢𞤯𞤲𞤢𞥄 𞤷𞤢𞤯𞤫𞥅𞤤𞤫. 𞤐𞤮 𞤼𞤢𞤱𞤢𞥄 𞤫 𞤯𞤫𞤲⹁ 𞤸𞤫𞥅𞤺𞤫⹁ 𞤧𞤢𞤯𞤵𞤺𞤮𞤤 𞤲𞤣𞤭𞤴𞤢𞤥 𞤤𞤢𞥄𞤩𞤵𞤯𞤢𞤥 𞤫 𞤢𞤲𞤺𞤢𞤤 𞤱𞤫𞥅𞤩𞤵𞤺𞤮𞤤 𞤻𞤢𞥄𞤥𞤣𞤵 𞤧𞤢𞤦𞤵 𞤱𞤢𞤴𞤤𞤢𞤺𞤮𞤤 𞤴𞤢𞥄𞤧𞤭 𞤳𞤭𞤲. 𞤕𞤫𞥅𞤲𞤢𞤤 𞤲𞤺𞤢𞤤 𞤱𞤢𞤤𞥆𞤢 𞤶𞤫𞥅𞤪𞤫𞤲𞤣𞤫 𞤲𞤣𞤫𞤲 𞤲𞤮 𞤩𞤵𞤪𞤼𞤵𞤣𞤫 𞤶𞤭𞤨𞥆𞤢𞤣𞤫 𞤳𞤢 𞤤𞤫𞤴 𞤧𞤢𞥄𞤸𞤢𞤤. 𞤅𞤭 𞤴𞤢𞤸𞤭𞤪𞤭𞥅 𞤲𞤭𞥅⹁ 𞤳𞤢 𞤪𞤫𞤥𞤫𞥅 𞤫 𞤳𞤢 𞤣𞤵𞤪𞤫𞥅 𞤧𞤢𞤯𞤢𞤴. 𞤅𞤭 𞤯𞤵𞤥 𞤤𞤫 𞤧𞤢𞤯𞤭𞥅 𞤸𞤫𞥅𞤺𞤫 𞤩𞤫𞤴𞤣𞤮𞤼𞤮. 𞤍𞤵𞤥 𞤤𞤫 𞤲𞤮 𞤼𞤢𞤱𞤢𞥄 𞤫 𞤳𞤮 𞤱𞤮𞤲𞤭 𞤫 𞤢𞤣𞥆𞤵𞤣𞤫 𞤸𞤢𞤪𞤫𞥅𞤶𞤭 𞤫 𞤱𞤢𞤪𞤼𞤭𞤲’𞤣𞤭𞤪𞤮 𞤲𞤣𞤫𞤪 𞤀𞤬𞤪𞤭𞤳.

𞤅𞤭 𞤢𞤪𞤣𞤭𞥅𞤩𞤫 𞤀𞤬𞤪𞤭𞤳 𞤩𞤫𞤲 𞤰𞤫𞤼𞥆𞤢𞥄𞤤𞤭 𞤨𞤫𞤸𞤫 𞤸𞤫𞤦𞤤𞤢𞤲𞤮𞥅 𞤱𞤢𞤴𞤤𞤢𞤺𞤮𞤤 𞤴𞤢𞥄𞤧𞤭 𞤳𞤭𞤲⹁ 𞤫 𞤲𞤣𞤫𞤪 𞤯𞤭𞥅 𞤣𞤵𞥅𞤩𞤭 𞤢𞤪𞤮𞥅𞤶𞤭⹁ 𞤼𞤢𞤥𞤨𞤫𞤪𞤫 𞤫 𞤻𞤢𞤦𞥆𞤵𞥅𞤤𞤭 𞤩𞤫𞤴𞤣𞤮𞤼𞤮⹁ 𞤧𞤵𞤳𞤢𞥄𞤩𞤫 𞤩𞤫𞤲 𞤫𞤺𞥆𞤢𞤴 𞤴𞤢𞤤𞤼𞤢 𞤀𞤬𞤪𞤭𞤳. 𞤅𞤭 𞤯𞤵𞤥 𞤤𞤫 𞤱𞤢𞤯𞤭𞥅⹁ 𞤀𞤬𞤪𞤭𞤳 𞤩𞤵𞤪𞤼𞤢𞤴 𞤤𞤮𞤵𞤣𞤫 𞤸𞤫𞤩𞤢 𞤲𞤮 𞤤𞤫𞤴𞤯𞤫 𞤶𞤢𞤲𞤢𞤲𞤫 𞤯𞤫𞤲 𞤴𞤢𞤲𞤭𞤪𞤢 𞤫 𞤥𞤫𞤫𞤲.

𞤁𞤵𞤦𞤵𞤲𞤫𞤪𞤫 = 𞤥𞤭𞤤𞤭𞤴𞤮𞤲

𞤁𞤵𞤶𞤵𞤲𞤫𞤪𞤫 = 𞤥𞤭𞤤𞤭𞤴𞤢𞤪 = 𞤦𞤭𞤤𞤭𞤴𞤮𞤲