𞤐𞤘𞤀𞤒𞤓𞥅𞤔𞤋 𞤑𞤀𞤃𞤀𞤈𞤓𞤐 𞤍𞤋𞤐 𞤍𞤋𞤏𞤚𞤋𞥅

𞤐𞤘𞤀𞤒𞤓𞥅𞤔𞤋 𞤑𞤀𞤃𞤀𞤈𞤓𞤐 𞤍𞤋𞤐 𞤍𞤋𞤏𞤚𞤋𞥅. 𞤃𞤀𞤏𞤄𞤀 𞤘𞤋𞤐𞤉 𞤐𞤄𞤀𞤐 𞤍𞤋𞤘𞥆𞤋𞤐𞤀𞥄𞤃𞤀

𞤉𞤥𞤦𞤢 𞤬𞤭𞤶𞤮 𞤱𞤵𞤤𞤲𞤺𞤮 𞤱𞤢𞤯𞤭𞥅 𞤸𞤢𞤲𞤣𞤫 𞤸𞤫𞤤𞥆𞤢 𞤄𞤵𞤱𞤢𞤳𞤫⹁ 𞤼𞤵𞤥𞤦𞤮 𞤑𞤮𞤼𞤣𞤭𞤱𞤢𞤪.

𞤑𞤀𞤃𞤀𞤈𞤓𞤐⹁ 𞤳𞤭𞤨𞥆𞤮𞤤 𞤲𞤺𞤮𞤤 𞤯𞤵𞥅𞤯𞤵𞤩𞤫 𞤧𞤭𞤳𞥆𞤵𞤲𞤮𞥅 𞤴𞤢𞤤𞤼𞤭𞥅⹁ 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤥𞤮 𞤭𞤥𞥆𞤢𞤲𞤭𞤳𞤫 𞤸𞤵𞥅𞤲𞤣𞤫⹁ 𞤱𞤢𞤯𞤭𞥅 𞤩𞤫𞤪𞤲𞤣𞤫 𞤫 𞤥𞤵𞥅𞤯𞤵𞤲⹁ 𞤺𞤮𞤤𞥆𞤢𞤲𞤭𞥅 𞤳𞤢𞤣𞤭 𞤯𞤵𞤥⹁ 𞤮𞤲𞤼𞤭𞤺𞤭 𞤸𞤫𞤩𞤢𞤴 𞤲𞤣𞤫. 𞤖𞤢𞤲𞤣𞤫 𞤳𞤮 𞤲𞤺𞤢𞤴𞤵𞥅𞤶𞤭 𞤳𞤢𞥄𞤳𞤢𞤪𞤢𞥄𞤶𞤭 𞤴𞤢𞤤𞤼𞤢𞤲𞤭 𞤔𞤢𞤸𞤫 𞤘𞤢𞤥𞤦𞤭𞤴𞤢 𞤯𞤫𞤲 𞤳𞤢 𞤬𞤭𞤶𞤭𞤪𞤣𞤫 𞤂𞤀-𞤆𞤉 𞤱𞤮𞤲𞤣𞤫 𞤄𞤵𞤱𞤢𞤳𞤫.

𞤘𞤀𞤃𞤄𞤋𞤒𞤀 𞤳𞤢𞤻𞤵𞤲 𞤳𞤢𞤣𞤭 𞤢𞤪𞤣𞤵𞤲𞤮 𞤫 𞤩𞤫𞤪𞤲𞤣𞤫. 𞤊𞤭𞤶𞤮𞥅𞤩𞤫 𞤥𞤢𞤩𞥆𞤫 𞤩𞤫𞤲 𞤬𞤭𞤶𞤵𞤲𞤮 𞤱𞤢 𞤧𞤭 𞤱𞤮𞤲𞤳𞤭𞥅𞤶𞤭 𞤥𞤢𞤩𞥆𞤫 𞤳𞤮 𞤫 𞤬𞤭𞤶𞤮 𞤲𞤺𞤮𞤲 𞤴𞤮𞤱𞤭𞤲𞤮𞥅. 𞤀𞤨𞤫𞤱 𞤤𞤫 𞤩𞤫 𞤤𞤵𞤥𞤦𞤢.

𞤑𞤮𞤲𞤮 𞤳𞤢 𞤼𞤢𞤴𞤪𞤫 𞤢𞤪𞤢𞤲𞤫𞤪𞤫⹁ 𞤸𞤢𞤴 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤱𞤮𞥅𞤨𞤢𞥄𞤲𞤮 𞤧𞤢𞤳𞤢 𞤲𞤢𞥄𞤣𞤢 𞤳𞤵𞥅𞤤𞤢𞤤.

𞤖𞤮𞤶𞤮𞤥𞤢𞥄𞤶𞤫 𞤧𞤢𞤨𞥆𞤮 𞤩𞤢𞥄𞤱𞤮 𞤩𞤫 𞤪𞤵𞤼𞥆𞤢𞥄𞤣𞤫⹁ 𞤚𞤮𞤳𞤮 𞤉𞤳𞤢𞤥𞤦𞤭 𞤲𞤢𞥄𞤣𞤢𞤲𞤭 𞤑𞤀𞤃𞤀𞤈𞤓𞤐 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥖. 𞤘𞤢𞤥𞤦𞤭𞤴𞤢 𞤱𞤢𞤳𞥆𞤭𞤤𞤭𞥅 𞤸𞤢𞥄 𞤱𞤵𞤪𞤼𞤭 𞤲𞤺𞤢𞤤 𞤲𞤣𞤫 𞤀𞤦𞤤𞤢𞥄𞤴 𞤔𞤢𞤤𞥆𞤮 𞤲𞤢𞥄𞤣𞤵𞤲𞤮𞥅 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥗𞥒. 𞤑𞤢 𞤸𞤮𞤶𞤮𞤥𞤢𞥄𞤪𞤫 𞥘𞥕⹁ 𞤋𞤦𞤪𞤢𞥄𞤸𞤭𞥅𞤥𞤢 𞤑𞤮𞤤𞤭 𞤯𞤭𞤯𞤥𞤭𞤼𞤢𞤲𞤭 𞤘𞤢𞤢𞤦𞤭𞤴𞤢. 𞤅𞤭 𞤬𞤭𞤶𞤮 𞤲𞤺𞤮𞤲 𞤤𞤵𞤼𞥆𞤵𞤲𞤮 𞤯𞤮𞥅𞤲⹁ 𞤘𞤢𞤥𞤦𞤭𞤴𞤢 𞤲𞤮 𞤱𞤢𞥄𞤱𞤵𞤲𞤮𞥅 𞤤𞤵𞤥𞤦𞤵𞤣𞤫⹁ 𞤑𞤢𞤥𞤢𞤪𞤵𞤲 𞤴𞤭𞤤𞤼𞤮𞥅. 𞤑𞤮𞤲𞤮⹁ 𞤸𞤮𞤶𞤮𞤥𞤢𞥄𞤶𞤫 𞤯𞤭𞤯𞤭 𞤨𞤫𞤼 𞤩𞤢𞥄𞤱𞤼𞤭 𞤯𞤵𞤥⹁ 𞤬𞤭𞤶𞤢𞤲𞤮𞥅𞤱𞤮 𞤘𞤢𞤥𞤦𞤭𞤴𞤢 𞤭𞤲𞥆𞤫𞤼𞤫𞥅𞤯𞤮 𞤔𞤫𞤥𞤧 𞤘𞤮𞤥𞤫𞥅𞥁⹁ 𞤲𞤢𞥄𞤣𞤭𞤼𞤭𞥅 𞤳𞤵𞥅𞤤𞤢𞤤. 𞤏𞤮𞤲𞤭 𞥒-𞥒.

𞤑𞤢 𞤬𞤭𞤶𞤮 𞤲𞤺𞤮𞤲 𞤤𞤢𞤲𞥆𞤢𞤼𞤢 𞤯𞤮𞤲 𞤳𞤢𞤣𞤭⹁ 𞤐𞤣𞤵𞤳𞤵 𞤪𞤮𞤼𞥆𞤢𞤲𞤭 𞤑𞤪𞤭𞤧𞤼𞤮𞤬𞤫𞥅𞤪 𞤏𞤌𞥅⹁ 𞤮𞤲 𞤦𞤮𞥅𞤼𞤭 𞤥𞤵𞤤𞥆𞤫𞤪𞤫⹁ 𞤲𞤣𞤫 𞤲𞤢𞥄𞤼𞤮𞤴𞤭 𞤳𞤢 𞤸𞤵𞥅𞤤𞤭𞤪𞤣𞤫 𞤘𞤢𞤥𞤦𞤭𞤴𞤢.

𞤐𞤺𞤢𞤤 𞤳𞤵𞥅𞤤𞤢𞤤 𞤼𞤢𞤼𞤢𞤩𞤢𞤤 𞤑𞤢𞤥𞤢𞤪𞤵𞤲⹁ 𞤱𞤮𞤲𞤭 𞤧𞤢𞤦𞤵 𞤸𞤢𞥄 𞤩𞤢𞤣𞤭𞤲𞤮𞥅𞤩𞤫 𞤴𞤭𞤤𞤼𞤢𞥄𞤣𞤫 𞤩𞤫𞤲⹁ 𞤱𞤮𞤲𞤼𞤭 𞤯𞤭𞤯𞤢𞤩𞤫 𞤳𞤢 𞤣𞤫𞤲𞤼𞤢𞤤 𞤥𞤢𞤩𞥆𞤫 .

𞤅𞤉𞤐𞤉𞤘𞤀𞤂 𞤍𞤋𞤘𞥆𞤋𞤐𞤋 𞤘𞤋𞤐𞤉

𞤄𞤢𞤲𞤽𞤫 𞤒𞤀𞤃𞤓𞤅𞤓𞤑𞤌𞤈𞤌⹁ 𞤱𞤮𞤲𞤢𞥄 𞤳𞤮 𞤽𞤢𞤤𞤯𞤭𞤲𞤭 𞤬𞤫𞤰𞥆𞤭 𞤼𞤮𞥅𞤲⹁ 𞤩𞤢𞥄𞤴𞤼𞤭 𞤅𞤉𞤐𞤉𞤘𞤀𞤂 𞤬𞤮𞤷𞥆𞤵𞤲𞤮 𞤘𞤋𞤐𞤉 𞤑𞤵𞥅𞤤𞤫 𞤯𞤭𞤯𞤭 𞤼𞤭𞤥𞥆𞤵𞤯𞤫 𞤬𞤭𞥅 𞤳𞤢𞤤𞤢 𞤳𞤢 𞤼𞤢𞤴𞤪𞤫 𞤢𞤪𞤢𞤲𞤫𞤲𞤪𞤫 𞤳𞤮 𞤸𞤮𞥅𞤪𞤫 𞤩𞤮𞤤𞤫 𞤩𞤫 𞤧𞤫𞥅𞤪𞤼𞤭.

𞤑𞤮𞤲𞤮 𞤩𞤢𞤴𞤼𞤭 𞤩𞤫 𞤪𞤵𞤼𞥆𞤭𞤳𞤫⹁ 𞤀𞤦𞤣𞤵𞤤𞥆𞤢𞥄𞤸𞤭 𞤅𞤫𞤳 𞤲𞤢𞥄𞤣𞤢𞤲𞤭 𞤐𞤘𞤢𞤴𞤵𞥅𞤶𞤭 𞤅𞤫𞤲𞤫𞤺𞤢𞤤 𞤯𞤭𞤲 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥑. 𞤋𞤤𞤭𞤥𞤢𞥄𞤲 𞤐𞤶𞤢𞥄𞤴 𞤯𞤭𞤯𞤥𞤭𞤼𞤭 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥙𞥐.

𞤑𞤮 𞤲𞤺𞤢𞥄𞤤 𞤳𞤵𞥅𞤤𞤢𞤤 𞤯𞤭𞤯𞤢𞤩𞤢𞤤 𞤱𞤮𞤲𞤭 𞤧𞤢𞤦𞤵 𞤘𞤭𞤲𞤫 𞤶𞤮𞤤𞤼𞤵𞤣𞤫 𞤫 𞤣𞤢𞤪𞤲𞤣𞤫 𞤥𞤵𞤵𞤲 𞤳𞤢 𞤣𞤫𞤲𞤼𞤢𞤤. 𞤀𞤣𞤮 𞤲𞤺𞤢𞥄𞤤 𞤳𞤵𞥅𞤤𞤢𞤤⹁ 𞤸𞤢𞤪𞤭 𞤘𞤭𞤲𞤫 𞤳𞤮 𞤯𞤭𞤯𞤢𞤩𞤵𞤲. 𞤇𞤢𞥄𞤱𞤮 𞤳𞤵𞥅𞤤𞤢𞤤 𞤲𞤺𞤢𞤤⹁ 𞤘𞤭𞤲𞤫 𞤱𞤮𞤲𞤭 𞤼𞤢𞤼𞤢𞤩𞤵𞤲.

𞤔𞤮𞥅𞤲𞤭⹁ 𞤳𞤮 𞤃𞤢𞤱𞤦𞤢 𞤘𞤭𞤲𞤫 𞤲𞤦𞤢𞤲 𞤫 𞤆𞤢𞤪𞤻𞤭𞤼𞤫 𞤘𞤭𞤲𞤫 𞤉𞤳𞤱𞤢𞤼𞤫𞥅𞤪𞤭 𞤯𞤫𞤲 𞤬𞤮𞤼𞥆𞤢𞤼𞤢 𞤳𞤢 𞤶𞤫𞥅𞤼𞤢𞤼𞤢𞤩𞤢𞤤. 𞤍𞤫𞤲 𞤤𞤫 𞤧𞤮𞤰𞤵𞤲𞤮 𞤃𞤢𞤱𞤯𞤭 𞤑𞤮𞤼𞤣𞤭𞤱𞤢𞤪 𞤯𞤭𞤲 𞤳𞤵𞥅𞤤𞤫 𞤲𞤢𞤴𞤭 𞤼𞤭𞤥𞥆𞤵𞤯𞤫. 𞤔𞤮𞥅𞤲𞤭 𞤘𞤭𞤲𞤫 𞤲𞤮 𞤸𞤫𞤯𞤢𞥄. 𞤑𞤢 𞤥𞤢𞤱𞤯𞤭 𞤧𞤢𞤨𞥆𞤮-𞤫-𞤺𞤮𞤮 𞤪𞤮𞤲𞤳𞤭 𞤨𞤢𞤪𞤻𞤭𞤼𞤫⹁ 𞤸𞤮𞤤 𞤲𞤮 𞤥𞤢𞤱𞤦𞤢 𞤱𞤮𞥅𞤼𞤢 𞤣𞤢𞤯𞤭𞤪𞤼𞤢 𞤯𞤮𞥅𞤲؟

𞤅𞤮 𞤺𞤭𞤲𞤫 𞤱𞤢𞤳𞥆𞤭𞤤𞤭𞤲𞤮 𞤸𞤢𞥄 𞤱𞤢𞤯𞤭 𞤅𞤫𞤲𞤫𞤺𞤢𞤤 𞤳𞤵𞥅𞤤𞤢𞤤⹁ 𞤳𞤮 𞤐𞤢𞤶𞤫𞤪𞤭𞤴𞤢 𞤲𞤣𞤭 𞤸𞤢𞤱𞤪𞤢𞤴𞤲𞤮𞥅 𞤫 𞤥𞤵𞤵𞤲 𞤳𞤢 𞤶𞤫𞥅𞤼𞤢𞤼𞤢𞤩𞤢𞤤.

𞤐𞤺𞤢𞤴𞤵𞥅𞤶𞤭 𞤅𞤫𞤲𞤫𞤺𞤢𞤤 𞤯𞤭𞤲 𞤳𞤢𞤲⹁ 𞤸𞤮𞤤𞥆𞤭𞥅 𞤥𞤢𞤱𞤲𞤣𞤵. 𞤘𞤭𞤦𞤭 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤬𞤵𞤯𞥆𞤭⹁ 𞤯𞤭 𞤨𞤭𞤴𞤢𞥄𞤳𞤢 𞤸𞤢𞤴 𞤲𞤣𞤫 𞤱𞤮𞥅𞤼𞤫𞤪𞤫. 𞤖𞤢𞤴 𞤬𞤫𞤨𞥆𞤵𞤺𞤮𞤤 𞤫 𞤬𞤭𞤶𞤮 𞤯𞤭 𞤱𞤢𞤯𞤢𞥄𞤤𞤭. 𞤑𞤮 𞤳𞤢𞤲𞤶𞤭 𞤼𞤢𞤲 𞤤𞤵𞤥𞤦𞤭𞤪𞤭 𞤼𞤮𞤩𞥆𞤫 𞤶𞤫𞥅𞤲𞤢𞤴𞤭.

𞤒𞤮𞤼𞥆𞤭𞤲𞤢𞤲𞤣𞤫 𞤀𞤴𞥃𞤢 𞤅𞤮𞥅