𞤘𞤋𞤐𞤉 𞤑𞤌 𞤉 𞤃𞤀𞤏𞤄𞤀𞥄𞤈𞤉 𞤖𞤌𞥅𞤈𞤀𞤚𞤀 𞤂𞤋𞤁𞥆𞤓 𞤅𞤀𞤏𞤓𞤁𞤋𞥅
𞤑𞤮𞤲𞤮 𞤲𞤮𞤲⹁ 𞤳𞤮 𞤸𞤫𞥅𞤱𞤭 𞤫 𞤤𞤫𞤴𞤯𞤫 𞤕𞤢𞤳𞤢𞥄𞤪𞤭 𞤊𞤵𞤯𞤲𞤢𞥄𞤲𞤺𞤫 𞤯𞤫𞤲⹁ 𞤳𞤢𞤻𞤵𞤲 𞤫 𞤉𞤪𞤮𞤨 𞤫 𞤐𞤢𞤲𞥆𞤢𞥄𞤪𞤭 𞤀𞤥𞤫𞤪𞤭𞤳 𞤬𞤵𞤯𞥆𞤭𞤳𞤫 𞤳𞤮𞥅𞤪𞤳𞤢 𞤳𞤢𞤲 𞤫 𞤀𞥄𞤩𞤵𞤲𞥋𞤣𞤫 (𞤼𞤫𞤲𞤫𞤲) 𞤻𞤢𞤤𞤲𞤣𞤫 𞥑𞥑 𞤐𞤄𞤮𞥅𞤴𞤮 𞤩𞤢𞥄𞤱𞤮 𞤳𞤮𞥅𞤸𞤮𞥅𞤩𞤫 𞤅𞤀𞤏𞤓𞤁𞤋𞥅 𞤸𞤮𞤤𞥆𞤭𞤼𞤵𞤣𞤫 𞤱𞤮𞤲𞤣𞤫𞤥𞤢 𞤩𞤫 𞤴𞤭𞤴𞤭𞥅 𞤤𞤫𞤱𞤪𞤵 𞤅𞤵𞥅𞤥𞤢𞤴𞤫𞥅 𞤲𞤣𞤵𞤲. 𞤑𞤮 𞤱𞤢𞤯𞤭 𞤲𞤮𞤲⹁ 𞤤𞤫𞤴𞤯𞤫 𞤺𞤮𞥅 𞤼𞤢𞤱𞤼𞤢𞥄𞤤𞤭 𞤅𞤀𞤏𞤓𞤁𞤋𞥅⹁ 𞤳𞤮 𞤼𞤢𞤱𞤵𞤣𞤫 𞤦𞤵𞤴 𞤫 𞤥𞤢𞤶𞥆𞤫 𞤲𞤮 𞤶𞤮𞤺𞤢𞤲𞤭𞥅 𞤸𞤮𞥅𞤪𞤫 𞤥𞤵𞤵𞤲 𞤺𞤮𞥅𞤥𞤵 𞤯𞤢𞤩𞥆𞤭𞤼𞤭𞤪𞤣𞤵 𞤤𞤫𞤱𞤪𞤵 𞤲𞤣𞤵𞤲⹁ 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤴𞤮𞤺𞤢 𞤫 𞤷𞤫𞤪𞤲𞤮𞥅𞤩𞤫 𞤤𞤫𞤴𞤯𞤫 𞤺𞤮𞥅 𞤼𞤢𞤱𞤼𞤢𞥄 𞤯𞤢𞤩𞥆𞤭𞤼𞤭𞤪𞤺𞤮𞤤 𞤤𞤫𞤱𞤪𞤵 𞤲𞤣𞤵𞤲 𞤤𞤮𞤽𞤮𞤪𞤯𞤫 𞤱𞤢𞤲𞤮 𞤤𞤮𞤤𞥆𞤭𞤪𞤭 𞤲𞤮𞤲 𞤅𞤀𞤏𞤓𞤁𞤋𞥅. 𞤉 𞤬𞤢𞤸𞤥𞤵 𞤩𞤫𞤲 𞤷𞤫𞤪𞤲𞤮𞥅𞤩𞤫⹁ 𞤳𞤮 𞤧𞤭 𞤤𞤫𞤱𞤪𞤵 𞤲𞤣𞤵𞤲 𞤴𞤭𞤴𞤪𞤢𞥄𞤥𞤢 𞤴𞤭𞤴𞤼𞤫𞤪𞤫 𞤤𞤢𞥄𞤩𞤵𞤲𞥋𞤣𞤫⹁ 𞤧𞤭 𞤦𞤮𞤳𞥆𞤢.
- 𞤗𞤭𞤪𞥆𞤢𞤺𞤮𞤤 𞤱𞤮𞤲𞤣𞤫𞤥𞤢 𞤸𞤢𞥄𞤲𞤣𞤵𞤯𞤮 𞤫 𞤪𞤫𞤱𞤫𞥅𞤣𞤫 𞤢𞤤𞤢𞥄 𞤧𞤭 𞤱𞤮𞤲𞤢𞥄 𞤀𞤤𞤤𞤢⹁ 𞤼𞤢𞤦𞤭𞤦𞤼𞤭𞤲𞤢 𞤳𞤢𞤣𞤭 𞤱𞤮𞤲𞤣𞤫 𞤃𞤵𞤸𞤢𞤥𞥆𞤢𞤣𞤵 ﷺ 𞤳𞤮 𞤲𞤵𞤤𞤢𞥄𞤯𞤮 𞤃𞤢𞤳𞥆𞤮.
- 𞤙𞤭𞥅𞤩𞤲𞤵𞤺𞤮𞤤 𞤶𞤵𞥅𞤤𞤯𞤫 𞤱𞤢𞤯𞥆𞤭𞤲𞤢𞥄𞤯𞤫 𞤯𞤫𞤲 𞤶𞤮𞤱𞤭
- 𞤋𞤼𞥆𞤵𞤳𞤮𞤤 𞤶𞤢𞤳𞥆𞤢
- 𞤖𞤮𞥅𞤪𞤵𞤺𞤮𞤤 𞤤𞤫𞤱𞤪𞤵 𞤧𞤵𞥅𞤥𞤢𞤴𞤫𞥅 𞤲𞤣𞤵𞤲 𞤱𞤮𞤲𞤢𞤲𞤣𞤫 𞤮𞤲 𞤧𞤫𞤤𞥆𞤵𞤯𞤮
- 𞤖𞤢𞤶𞥆𞤮𞤴𞤺𞤮𞤤 𞤳𞤢 𞤧𞤵𞥅𞤣𞤵 𞤑𞤢𞥄𞤦𞤢 𞤱𞤮𞤲𞤢𞤲𞤣𞤫 𞤳𞤢𞤤𞤢 𞤮𞤲 𞤥𞤮 𞤘𞤫𞤲𞤮 𞤮𞤲 𞤪𞤮𞤳𞥆𞤭 𞤲𞤦𞤢𞥄𞤱𞤣𞤭.
𞤑𞤮 𞤤𞤫𞤱𞤪𞤵 𞤅𞤵𞥅𞤥𞤢𞤴𞤫𞥅 𞤲𞤣𞤵𞤲 𞤱𞤮𞤲𞤭 𞤤𞤫𞤱𞤪𞤵 𞤶𞤫𞥅𞤲𞤢𞤴𞤢𞤩𞤵𞤪𞤵 𞤸𞤭𞤼𞤢𞥄𞤲𞤣𞤫 𞤲𞤣𞤫𞤲. 𞤑𞤮 𞤫 𞤥𞤢𞤴𞤪𞤵 𞤳𞤢𞤣𞤭 𞤗𞤵𞤪𞥇𞤢𞥄𞤲𞤢𞥄𞤪𞤫 𞤲𞤣𞤫𞤲 𞤼𞤫𞤤𞥆𞤭𞤲𞤢𞥄. 𞤏𞤢𞤲𞤮 𞤯𞤭𞤴𞤢 𞤤𞤫𞤦𞥆𞤭 𞤥𞤢𞤸𞤭𞥅𞤯𞤭 𞤫 𞤤𞤫𞤱𞤤𞤫𞤱𞤢𞤤 𞤲𞤺𞤢𞤤⹁ 𞤤𞤫𞤱𞤪𞤵 𞤧𞤵𞥅𞤥𞤢𞤴𞤫𞥅 𞤳𞤮 𞤦𞤢𞥄𞤤𞤯𞤫 𞥒𞥙 𞤱𞤢𞤤𞥆𞤢 𞥓𞥐 𞤼𞤭𞤥𞥆𞤭𞤪𞤼𞤢.
𞤔𞤵𞥅𞤤𞤯𞤮 𞤳𞤢𞤤𞤢 𞤸𞤫𞤤𞥆𞤭𞤬𞤢𞥄𞤯𞤮⹁ 𞤧𞤫𞤤𞥆𞤵𞤯𞤮 𞤲𞤮 𞤱𞤢𞤯𞥆𞤭𞤲𞤢𞥄 𞤸𞤮𞥅𞤪𞤵𞤺𞤮𞤤 𞤲𞤣𞤵.
𞤑𞤮 𞤱𞤮𞤲𞤭 𞤸𞤮𞥅𞤪𞤵𞤺𞤮𞤤⹁ 𞤳𞤮 𞤲𞤣𞤫 𞤮𞤲𞤼𞤭𞤺𞤭 𞤱𞤮𞤯𞤮𞤼𞤮𞥅 𞤻𞤢𞥄𞤥𞤣𞤵 𞤫 𞤲𞤶𞤢𞤪𞤢𞤥 𞤺𞤭𞤤𞤢 𞤳𞤢 𞤱𞤫𞥅𞤲𞤣𞤮𞥅𞤺𞤮 𞤸𞤢𞥄 𞤳𞤢 𞤥𞤵𞤼𞤢𞤤 𞤲𞤢𞥄𞤲𞤺𞤫. 𞤇𞤫𞤴𞤯𞤮 𞤱𞤮𞤲𞤯𞤮 𞤥𞤵𞥅𞤴𞤲𞤭𞤲𞤣𞤫⹁ 𞤻𞤢𞤱𞤯𞤮 𞤥𞤮 𞤱𞤢𞥄𞤱𞤢𞤼𞤢𞥄⹁ 𞤣𞤫𞤦𞥆𞤮 𞤬𞤭𞥅𞤤𞤭𞥅𞤯𞤮⹁ 𞤫 𞤧𞤫𞤼𞤫𞥅𞤶𞤮⹁ 𞤩𞤫𞥅 𞤬𞤮𞤨 𞤲𞤮 𞤴𞤢𞥄𞤲𞤢𞤲𞤢𞥄 𞤬𞤢𞤩𞥆𞤭𞤲𞤺𞤮𞤤 𞤳𞤮𞥅𞤪𞤳𞤢 𞤳𞤢𞤲 𞤸𞤢𞥄 𞤲𞤣𞤫 𞤲𞤫𞤱𞤢𞤲𞤭𞥅 𞤩𞤫 𞤱𞤮𞥅.
𞤊𞤭𞥅 𞤳𞤢𞤤𞤢 𞤸𞤮𞥅𞤪𞤵𞤺𞤮𞤤 𞤧𞤵𞥅𞤥𞤢𞤴𞤫𞥅 𞤳𞤮 𞤴𞤢𞤥𞤭𞤪𞤮𞥅𞤪𞤫 𞤭𞤥𞥆𞤮𞤪𞤲𞤣𞤫 𞤀𞤤𞤤𞤢⹁ 𞤳𞤮𞥅𞤪𞤳𞤢 𞤲𞤮 𞤱𞤮𞤲𞤣𞤭 𞤳𞤢𞤣𞤭 𞤫 𞤲𞤢𞤬𞤮𞥅𞤶𞤫 𞤯𞤵𞥅𞤯𞤵𞤯𞤫 𞤱𞤮𞤲𞤢𞤲𞤣𞤫 𞤲𞤫𞤯𞥆𞤢𞤲𞤳𞤫. 𞤖𞤢𞤴 𞤧𞤢𞤬𞤪𞤮𞥅𞤩𞤫 𞤩𞤫𞤲 𞤱𞤭𞤲𞤣𞤢𞤲𞤢𞤴 𞤻𞤢𞤱𞤩𞤫 𞤳𞤮𞥅𞤪𞤳𞤢.
𞤐𞤮 𞤼𞤢𞤱𞤢𞥄 𞤫 𞤲𞤢𞤬𞤮𞥅𞤶𞤫 𞤳𞤮𞥅𞤪𞤳𞤢 𞤢𞤲𞤣𞤢𞥄𞤯𞤫 𞤯𞤫𞤲:
- 𞤑𞤮𞥅𞤪𞤳𞤢 𞤩𞤫𞤴𞤣𞤢𞤴 𞤣𞤵𞥅𞤩𞤭 𞤥𞤢𞤤𞥆𞤢 𞤶𞤵𞥅𞤼𞤭𞤲𞤢𞤴 𞤲𞤺𞤵𞥅𞤪𞤣𞤢𞤥 𞤲𞤫𞤯𞥆𞤮
- 𞤑𞤮𞥅𞤪𞤳𞤢 𞤯𞤵𞤴𞤼𞤢𞤴 𞤼𞤮𞥅𞤳𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵
- 𞤑𞤮𞥅𞤪𞤳𞤢 𞤵𞤧𞤼𞤢𞤴 𞤩𞤫𞤤𞥆𞤫𞤪𞤫 𞤫 𞤲𞤣𞤫𞤪 𞤩𞤢𞤤𞤲𞤣𞤵
- 𞤑𞤮𞥅𞤪𞤳𞤢 𞤳𞤢𞤲 𞤱𞤢𞤤𞥆𞤢𞤴 𞤲𞤫𞤯𞥆𞤮 𞤣𞤢𞤯𞤵𞤺𞤮𞤤 𞤬𞤫𞥅𞤼𞤫𞤪𞤫 𞤫 𞤱𞤭𞤤𞤢𞥄𞤪𞤫 𞤫 𞤵𞤧𞤼𞤢𞥄𞤣𞤫 𞤲𞤺𞤫𞥅𞤼𞤵 𞤥𞤢𞤤𞥆𞤢 𞤸𞤢𞤳𞥆𞤭𞤤𞤫
- 𞤑𞤮𞥅𞤪𞤳𞤢 𞤧𞤫𞤥𞤦𞤭𞤲𞤢𞤴 𞤣𞤢𞤯𞤭𞤼𞤮𞤪𞤯𞤫 𞤩𞤢𞤤𞤲𞤣𞤵 𞤯𞤫𞤲
- 𞤑𞤮𞥅𞤪𞤳𞤢 𞤸𞤫𞤷𞥆𞤭𞤲𞤯𞤭𞤲𞤢𞤴 𞤺𞤵𞤪𞤭𞤤 𞤲𞤺𞤭𞤤 𞤫 𞤩𞤢𞤤𞤲𞤣𞤵 𞤲𞤣𞤵𞤲
𞤑𞤮𞥅𞤪𞤳𞤢 𞤲𞤮 𞤱𞤮𞤲𞤣𞤭 𞤳𞤢𞤣𞤭 𞤫 𞤲𞤢𞤬𞤮𞥅𞤶𞤫 𞤯𞤵𞥅𞤯𞤵𞤯𞤫 𞤯𞤫 𞤢𞤲𞤣𞤢𞥄𞤳𞤢 𞤬𞤭𞥅 𞤥𞤵𞤵𞤲 𞤼𞤢𞤸𞤮.
𞤃𞤮 𞤸𞤮𞥅𞤪𞤭𞥅 𞤲𞤮𞤲⹁ 𞤱𞤮𞤲𞤢𞥄 𞤴𞤮 𞤮𞤲𞤼𞤭𞤺𞤭 𞤬𞤢𞤲𞤼𞤭𞤲 𞤻𞤢𞥄𞤥𞤣𞤵 𞤲𞤣𞤵𞤲 𞤳𞤢 𞤬𞤫𞤱𞤲𞤣𞤮 𞤸𞤵𞤥𞤼𞤢𞤺𞤮𞤤. 𞤏𞤮𞤲𞤢𞥄 𞤴𞤮 𞤮 𞤻𞤢𞥄𞤥𞤵 𞤫 𞤶𞤮𞥅𞤯𞤢𞤲𞤣𞤫 𞤱𞤮𞥅𞤼𞤫𞤪𞤫 𞤳𞤮 𞤮 𞤻𞤢𞥄𞤥𞤢𞤴𞤲𞤮𞥅 𞤳𞤮𞤲 𞤬𞤮𞤨 𞤫 𞤲𞤣𞤫𞤪 𞤻𞤢𞤤𞥆𞤢𞤤 𞤲𞤺𞤢𞤤. 𞤑𞤮 𞤴𞤮 𞤮𞤲𞤼𞤭𞤺𞤭 𞤸𞤢𞤳𞤭𞤲𞤣𞤭𞤲 𞤻𞤢𞤥𞤣𞤵 𞤲𞤣𞤵𞤲⹁ 𞤯𞤵𞤯𞥆𞤭𞤲𞤮𞤪𞤢 𞤣𞤭𞤥𞤯𞤫 𞤤𞤫𞤯𞥆𞤫 𞤫 𞤳𞤢𞥄𞤳𞤭 𞤥𞤢𞤤𞥆𞤢 𞤳𞤫𞤷𞥆𞤭 𞤷𞤵𞤲𞤼𞤵𞥅𞤶𞤫 𞤯𞤭𞤲. 𞤑𞤮 𞤴𞤮 𞤮 𞤪𞤫𞥅𞤲𞤮 𞤳𞤢𞤣𞤭 𞤫 𞤬𞤢𞤲𞤼𞤭𞤲𞤺𞤮𞤤 𞤤𞤢𞤥𞤯𞤢𞤲 (𞤥𞤢𞤲𞤣𞤢𞤲) 𞤥𞤢𞥄 𞤧𞤵𞤳𞥆𞤢𞤪 (𞤨𞤫𞤪𞤳𞤢𞤲).
𞤒𞤮 𞤀𞤤𞤤𞤢 𞤲𞤫𞤱𞤭𞤲𞤢𞤲 𞤫𞤲 𞤼𞤭𞤥𞥆𞤭𞤲𞤺𞤮𞤤 𞤸𞤭𞤳𞥆𞤢⹁ 𞤌 𞤼𞤢𞤱𞤲𞤢 𞤫𞤲 𞤥𞤢𞤱𞤪𞤭.
𞤀𞥄𞤥𞤭𞥅𞤲𞤢 𞤴𞤢𞥄 𞤢𞤤𞤤𞤢𞤸
السلام عليكم ورحمة مشاالله
𞤱𞤭𞤲𞤣𞤫𞤲 𞤶𞤢𞤲𞤺𞤫 𞤢𞤣𞤤𞤢𞤥 𞤳𞤮 𞤦𞤭𞤲𞤣𞤮𞤤 𞤧𞤭𞤲𞤷𞤢𞥄𞤲𞤺𞤮𞤤 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥙⹁ 𞤥𞤮𞤰𞥆𞤫𞤪𞤫 𞤥𞤢𞤺𞥆𞤮𞤤 𞤴𞤢𞥄𞤶𞤭𞥅 𞤸𞤢𞥄 𞤼𞤢𞤱𞤢𞤼𞤢 𞤶𞤮𞥅𞤲𞤭 𞤢 𞤱𞤭𞤲𞤣𞤭𞤪𞤢𞤴𞤲𞤺𞤮𞤤 𞤳𞤮 𞤬𞤢𞥄𞤤𞤢𞤯𞤢𞥄 𞤱𞤮𞥅⹁ 𞤢 𞤸𞤵𞤱𞤼𞤮𞤪𞤢𞤴𞤲𞤺𞤮𞤤 𞤳𞤮 𞤴𞤫𞤤𞤭𞤯𞤢𞥄 𞤱𞤮𞥅⁏ 𞤲𞤺𞤮𞤤 𞤱𞤮𞤲𞤭𞥅 𞤼𞤫𞤣𞥆𞤵𞤲𞥋𞤺𞤢𞤤 𞤥𞤮𞥅𞤤𞤢𞤲𞤢𞥄𞤲𞤺𞤢𞤤 𞤱𞤮𞤲𞤢𞤲𞤣𞤫 𞤤𞤫𞤻𞤮𞤤 𞤬𞤵𞤤𞤩𞤫 𞤩𞤫𞤲 𞤫 𞤪𞤫𞤲𞤣𞤮 𞤢𞤬𞤪𞤭𞤳 𞤲𞤺𞤮𞤲 𞤳𞤢𞤻𞤵𞤲 𞤫 𞤳𞤢𞤤𞤢 𞤲𞤫𞤯𞥆𞤢𞤲𞤳𞤫⁏ 𞤳𞤮 𞤥𞤢𞤤𞤮𞥅𞤪𞤫⹁ 𞤨𞤮𞥅𞤤𞤺𞤢𞤤⹁ 𞤩𞤢𞤽𞤼𞤢𞤤⹁ 𞤩𞤢𞤥𞤼𞤢𞤤 𞤱𞤮𞤲𞤭 𞤬𞤭𞥅 𞤢𞤣𞤤𞤢𞤥 𞤸𞤢𞥄 𞤨𞤮𞥅𞤥𞤢𞥄.