𞤙𞤀𞤂𞤀𞥄𞤐𞤁𞤉 𞤍𞤉𞤃𞤘𞤀𞤂 𞤃𞤓𞥅𞤒𞤐𞤀𞥄𞤐𞤘𞤀𞤂

𞤀𞤣𞤮 𞤯𞤫 𞤸𞤫𞤩𞤼𞤢𞥄𞤣𞤫 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥔𞥙⹁ 𞤸𞤢𞤪𞤭 𞤆𞤢𞤳𞤭𞤧𞤼𞤢𞤲 𞤫 𞤋𞤲𞤣𞤭𞤴𞤢 𞤫 𞤄𞤢𞤲𞤺𞤤𞤢𞤣𞤫𞤧 𞤬𞤮𞤨 𞤤𞤢𞥄𞤼𞤭𞤲𞤮 𞤤𞤫𞤴𞤣𞤭 𞤱𞤮𞥅𞤼𞤭𞤪𞤭 𞤫 𞤤𞤫𞤴 𞤤𞤢𞥄𞤥𞤢𞤼𞤫𞥅𞤪𞤭 𞤫𞤲𞤺𞤫𞤤𞤫 𞤲𞤣𞤭𞤲.

𞤉 𞤸𞤭𞤼𞥆𞤢𞤲𞤣𞤫 𞥑𞥙𞥔𞥗⹁ 𞤢𞤣𞤮 𞤉𞤲𞤺𞤫𞤤𞤫𞥅𞤩𞤫 𞤩𞤫𞤲 𞤴𞤢𞤤𞤼𞤵𞤣𞤫 ⹁ 𞤩𞤫 𞤬𞤫𞤷𞥆𞤭 𞤤𞤫𞤴𞤣𞤭 𞤋𞤲𞤣𞤭𞤴𞤢 𞤲𞤣𞤭𞤲 𞤸𞤢𞤳𞥆𞤵𞤲𞥋𞤣𞤫 𞤔𞤵𞥅𞤤𞤩𞤫 𞤩𞤫𞤲 𞤫 𞤉𞤲𞤣𞤮𞥅𞤩𞤫 𞤩𞤫𞥅𞤲. 𞤆𞤢𞤳𞤭𞤧𞤼𞤢𞤲 𞤧𞤭𞤲𞤷𞤢𞤲𞤢𞥄 𞤶𞤵𞥅𞤤𞤩𞤫 𞤩𞤫𞤲⹁ 𞤋𞤲𞤣𞤭𞤴𞤢 𞤸𞤫𞥅𞤪𞤭𞤲𞤢𞤲𞤢𞥄 𞤉𞤲𞤣𞤮𞥅𞤩𞤫 𞤩𞤫𞤲. 𞤑𞤮𞤲𞤮 𞤼𞤢𞤱𞤭 𞤤𞤫𞤴𞤯𞤫 𞤳𞤢 𞤶𞤵𞥅𞤤𞤩𞤫 𞤩𞤫𞤲 𞤯𞤵𞥅𞤯𞤭 𞤫 𞤥𞤵𞤵𞤲 𞤯𞤫𞤲 𞤼𞤮𞤳𞥆𞤮𞤲𞥋𞤣𞤭𞤪𞤢𞥄 𞤱𞤮𞤲𞤭 𞤤𞤫𞤴𞤣𞤭 𞤱𞤮𞥅𞤼𞤭𞤪𞤭 𞤲𞤣𞤫 𞤼𞤢𞤱𞤵𞤲𞤮𞥅 𞤤𞤫𞤴𞤣𞤭 𞤋𞤲𞤣𞤭𞤴𞤢 𞤲𞤣𞤭𞤲 𞤲𞤮 𞤥𞤢𞤪𞤭 𞤼𞤵𞤥𞤦𞤫𞤪𞤫 𞤩𞤭𞤧𞤭𞥅𞤲𞤣𞤫 𞤸𞤢𞤳𞤵𞤲𞥋𞤣𞤫 𞤷𞤫𞤲𞤯𞤫 𞤆𞤢𞤳𞤭𞤧𞤼𞤢𞤲 𞤯𞤫𞤲 𞤯𞤭𞤯𞤭: 𞤊𞤵𞤯𞤲𞤢𞥄𞤲𞤺𞤫 𞤆𞤢𞤳𞤭𞤧𞤼𞤢𞤲 𞤫 𞤖𞤭𞤪𞤲𞤢𞥄𞤲𞤺𞤫 𞤆𞤢𞤳𞤭𞤧𞤼𞤢𞤲.

𞤊𞤭𞥅 𞤯𞤫𞥅 𞤷𞤫𞤲𞤯𞤫 𞤯𞤭𞤯𞤭 𞤳𞤮 𞤶𞤵𞥅𞤤𞤩𞤫 𞤱𞤮𞤲𞤵𞤲𞤮𞥅 𞤫 𞤥𞤢𞤶𞥆𞤫⹁ 𞤸𞤢𞤯𞤢𞥄𞤲𞤮 𞤼𞤢𞤱𞤭 𞤤𞤫𞤰𞥆𞤭 𞤯𞤭𞤲 𞤲𞤮 𞤧𞤫𞥅𞤪𞤼𞤭 𞤧𞤫𞥅𞤯𞤢. 𞤅𞤫𞤲𞤺𞤮 𞤸𞤭𞤳𞥆𞤮𞤪𞤲𞤺𞤮 𞤲𞤺𞤮𞤲 𞤳𞤢 𞤬𞤵𞤯𞤲𞤢𞥄𞤲𞤺𞤫⹁ 𞤳𞤮 𞤓𞤪𞤣𞤵𞥅𞤪𞤫 𞤲𞤣𞤫𞤲 𞤩𞤵𞤪𞤢𞤴𞤲𞤮𞥅 𞤸𞤢𞥄𞤤𞤵𞤣𞤫⹁ 𞤳𞤢 𞤊𞤵𞤯𞤲𞤢𞥄𞤲𞤺𞤫 𞤲𞤮𞤲⹁ 𞤳𞤮 𞤄𞤫𞤲𞤺𞤢𞤤𞤭𞥅𞤪𞤫 𞤲𞤣𞤫𞤲 𞤩𞤵𞤪𞤭 𞤶𞤢𞥄𞤤𞤢𞥄𞤣𞤫.

 

𞤊𞤭𞥅 𞤳𞤢𞤤𞤢 𞤲𞤮𞤲⹁ 𞤧𞤭 𞤯𞤫𞥅 𞤷𞤫𞤲𞤯𞤫 𞤯𞤭𞤯𞤭 𞤸𞤢𞤱𞤼𞤭𞤲’𞤣𞤭𞤪𞤢𞥄𞤥𞤢⹁ 𞤼𞤢𞤱𞤢𞤴 𞤳𞤮 𞤄𞤫𞤲𞤺𞤢𞤤𞤭𞥅𞤪𞤫 𞤲𞤣𞤫𞤲 𞤩𞤵𞤪𞤫𞤼𞤫𞥅 𞤸𞤢𞥄𞤤𞤫𞥅𞤣𞤫⹁  𞤫 𞤖𞤭𞤼𞤢𞥄𞤲𞤣𞤫 𞥑𞥙𞥔𞥘⹁ 𞤶𞤢𞥄𞤺𞤮𞤪𞤢𞤤 𞤆𞤢𞤳𞤭𞤧𞤼𞤢𞤲 𞤲𞤺𞤢𞤤 𞤧𞤵𞤩𞤭𞥅 𞤓𞤪𞤣𞤵𞥅𞤪𞤫 𞤲𞤣𞤫𞤲 𞤲𞤺𞤢𞤥 𞤤𞤢𞥄𞤼𞤢𞤺𞤮𞤤 𞤯𞤫𞤥𞤺𞤢𞤤 𞤤𞤢𞥄𞤥𞤮𞤪𞤲𞤺𞤢𞤤 𞤲𞤺𞤢𞤤 𞤲𞤣𞤫𞤪 𞤆𞤢𞤳𞤭𞤧𞤼𞤢𞤲𞤶𞤫 𞤯𞤭𞤯𞤭 𞤳𞤢𞤤𞤢.

 

𞤇𞤫𞥅 𞤳𞤢 𞤊𞤵𞤯𞤲𞤢𞥄𞤲𞤺𞤫 𞤥𞤵𞤪𞤼𞤭⹁ 𞤩𞤫 𞤱𞤭𞤴𞤭 𞤩𞤫 𞤶𞤢𞤩𞥆𞤢𞤼𞤢𞥄 𞤯𞤵𞤥 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤳𞤢 𞤊𞤵𞤯𞤲𞤢𞥄𞤲𞤺𞤫 𞤴𞤭𞤥𞤩𞤫 𞤩𞤫𞤲 𞤩𞤵𞤪𞤭 𞤯𞤵𞥅𞤯𞤵𞤣𞤫. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤳𞤮 𞤄𞤫𞤲𞤺𞤢𞤤𞤭𞥅𞤪𞤫 𞤲𞤣𞤫𞤲⹁ 𞤯𞤵𞤥 𞤳𞤮 𞤯𞤫𞤥𞤺𞤢𞤤 𞤬𞤵𞤯𞤲𞤢𞥄𞤺𞤫𞤴𞤢𞤲𞤳𞤮𞤱𞤢𞤤 𞤲𞤺𞤢𞤤 𞤩𞤵𞤪𞤭 𞤶𞤢𞥄𞤤𞤢𞥄𞤣𞤫. 𞤇𞤫 𞤱𞤭𞤴𞤭 𞤧𞤮 𞤼𞤢𞤱𞤭𞥅 𞤄𞤫𞤲𞤺𞤢𞤤𞤭𞥅𞤪𞤫 𞤲𞤣𞤫𞤲 𞤱𞤮𞤲𞤢𞤼𞤢𞥄 𞤯𞤫𞤥𞤺𞤢𞤤 𞤤𞤢𞥄𞤥𞤮𞤪𞤲𞤺𞤢𞤤⹁ 𞤦𞤫𞤼𞤫 𞤴𞤮 𞤲𞤺𞤢𞤤 𞤩𞤫𞤴𞤣𞤭𞤼𞤫 𞤫 𞤓𞤪𞤣𞤵𞥅𞤪𞤫 𞤲𞤣𞤫𞤲⹁ 𞤯𞤫 𞤯𞤭𞤯𞤭 𞤳𞤢𞤤𞤢 𞤯𞤫 𞤤𞤢𞥄𞤼𞤮𞥅 𞤯𞤥𞤲𞤯𞤫 𞤤𞤢𞥄𞤥𞤮𞤪𞤯𞤫.

 

𞤑𞤮 𞤧𞤢𞤪𞤮𞥅𞤱𞤮 𞤱𞤭𞤴𞤫𞤼𞤫𞥅𞤯𞤮 𞤁𞤭𞤪𞤫𞤲𞤣𞤢𞤪𞤢𞤲𞤢𞤬 𞤁𞤢𞤼𞥆𞤢⹁ 𞤢𞤣𞥆𞤵𞤲𞤮𞥅 𞤲𞤣𞤫𞤲 𞤫𞤩𞥆𞤮𞥅𞤪𞤫 𞤳𞤢 𞤧𞤢𞤪𞤭𞤪𞤣𞤵 𞤻𞤢𞤤𞤲𞤣𞤫 𞥒𞥓 𞤕𞤮𞤤𞤼𞤮 𞥑𞥙𞥔𞥘. 𞤑𞤮𞤲𞤮 𞤶𞤢𞥄𞤺𞤮𞤪𞤢𞤤 𞤆𞤢𞤳𞤭𞤧𞤼𞤢𞤲 𞤲𞤺𞤢𞤤 𞤶𞤢𞤩𞤢𞥄𞤤𞤭. 𞤊𞤭𞥅 𞤤𞤢𞤲𞤷𞤵𞤺𞤮𞤤 𞤣𞤭𞤤𞥆𞤢𞤲𞤯𞤫 𞤦𞤢𞤲𞤺𞤤𞤭𞥅𞤩𞤫 𞤩𞤫𞤲⹁ 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤 𞤼𞤮𞤽𞤭 𞤧𞤫𞤨𞥆𞤵𞤪𞤵 𞤫 𞤥𞤮𞥅𞤩𞤼𞤮𞤲’𞤣𞤭𞤪𞤮.

 

𞤇𞤢𞥄𞤱𞤼𞤭 𞤯𞤵𞤥⹁ 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤩𞤫𞤲 𞤳𞤢 𞤔𞤢𞥄𞤩𞤭𞥅𞤪𞤣𞤫 𞤁𞤀𞤑𞥆𞤀 𞤫 𞤲𞤣𞤫𞤪 𞤄𞤢𞤲𞤺𞤭𞤤𞤢𞤣𞤫𞤧 𞤬𞤵𞤯𞥆𞤭 𞤥𞤮𞥅𞤩𞤼𞤮𞤲’𞤣𞤭𞤪𞤫 𞤥𞤢𞤱𞤯𞤫 𞤳𞤢𞤻𞤵𞤲 𞤫 𞤧𞤫𞤨𞥆𞤵𞤪𞤵𞥅𞤶𞤭 𞤼𞤭𞥅𞤯𞤵𞤯𞤭. 𞤙𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞥑𞥙𞥕𞥒⹁ 𞤨𞤮𞤤𞤭𞥅𞤧𞤢𞥄𞤩𞤫 𞤆𞤢𞤳𞤭𞤧𞤼𞤢𞤲 𞤩𞤫𞤲 𞤬𞤫𞤼𞥆𞤭𞤲𞤭 𞤤𞤮𞥅𞤱𞤢𞤲𞤯𞤫 𞤫 𞤥𞤮𞥅𞤩𞤼𞤮𞤲’𞤣𞤭𞤪𞤫 𞤯𞤫𞤲⹁ 𞤴𞤭𞤥𞤩𞤫 𞤲𞤶𞤮𞤱𞤮 𞤱𞤢𞤪𞤢𞥄⹁ 𞤼𞤫𞥅𞤥𞤫𞤯𞥆𞤫 𞤦𞤢𞤪𞤥𞤭.

 

𞤘𞤭𞤤𞤢 𞤮𞤲𞤼𞤵𞤥𞤢⹁ 𞤄𞤫𞤲𞤺𞤢𞤤𞤭𞥅𞤩𞤫 𞤩𞤫𞤲 𞤱𞤢𞤯𞤭 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮⹁ 𞤻𞤢𞤤𞤢𞥄𞤲𞤣𞤫 𞤥𞤢𞥄𞤲𞤣𞤭𞤼𞤮𞤪𞤣𞤫 𞤱𞤢𞤪𞤢𞤲𞤮𞥅𞤩𞤫 𞤬𞤭𞥅 𞤴𞤮 𞤯𞤫𞤲𞤺𞤢𞤤 𞤥𞤵𞤵𞤲 𞤱𞤵𞥅𞤪𞤵. 𞤇𞤫𞥅 𞤥𞤢𞥄𞤴𞤵𞤲𞤮𞥅𞤩𞤫 𞤲𞤣𞤫𞤲 𞤻𞤢𞤤𞤲𞤣𞤫 𞤲𞤮 𞤥𞤢𞤸𞤢𞤲𞤢𞥄 𞤳𞤢𞤣𞤭 𞤧𞤮𞤴𞤪𞤵 𞤳𞤮 𞤩𞤫 𞤥𞤢𞥄𞤲𞤣𞤭𞤼𞤮𞤪𞤫𞥅 𞤫 𞤳𞤢 𞤩𞤫 𞤶𞤵𞥅𞤪𞤫𞥅.

 

𞤄𞤢𞤯𞤼𞤢𞤲𞤫 𞤯𞤵𞤥⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥘⹁ 𞤦𞤫𞤲𞤺𞤢𞤤𞤭𞥅𞤩𞤫 𞤯𞤭𞤯𞤮 𞤶𞤮𞥅𞤯𞤭𞥅𞤩𞤫 𞤑𞤢𞤲𞤢𞤣𞤢𞥄 𞤱𞤭𞤴𞤫𞤼𞤫𞥅𞤩𞤫 𞤈𞤢𞤬𞤭𞥅𞤹𞤵𞤤 𞤋𞤧𞤤𞤢𞥄𞤥 𞤫 𞤀𞤦𞤣𞤵𞤧𞥆𞤢𞤤𞤢𞥄𞤥⹁ 𞤱𞤭𞤲𞤣𞤭 𞤩𞤢𞤼𞤢𞥄𞤳𞤵𞤪𞤵 𞤲𞤫𞤤𞤣𞤭 𞤑𞤮𞤬𞤭 𞤀𞤲𞤢𞤲. 𞤊𞤫𞤱𞤲𞤣𞤮 𞤮𞤲𞤼𞤵𞤥𞤢⹁ 𞤳𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤄𞤭𞤲𞤣𞤮 𞤃𞤢𞤱𞤯𞤮 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 (ONU – UNO) . 𞤇𞤫 𞤼𞤮𞤪𞤭𞥅 𞤥𞤮 𞤫 𞤲𞤣𞤫𞤪 𞤲𞤣𞤵𞤲 𞤩𞤢𞤼𞤢𞥄𞤳𞤵𞤪𞤵 𞤰𞤫𞤼𞥆𞤵𞤺𞤮𞤤 𞤨𞤫𞤸𞤫 𞤸𞤭𞤱𞤭𞤪𞤯𞤫 𞤯𞤫𞤥𞤯𞤫 𞤢𞤣𞤵𞤲𞤢 𞤯𞤫𞤲 𞤬𞤭𞥅 𞤱𞤮𞤼𞤢 𞤯𞤫 𞤥𞤵𞤤𞤵⹁ 𞤳𞤢𞤻𞤵𞤲 𞤫 𞤼𞤮𞤯𞥆𞤢𞤺𞤮𞤤 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞤳𞤮 𞤱𞤮𞤲𞤢 𞤶𞤵𞥅𞤤𞤣𞤫𞥅𞤪𞤫 𞤯𞤫𞤲𞤯𞤫 𞤥𞤵𞤴𞤲𞤢𞥄𞤯𞤫.

𞤐𞤣𞤫𞥅 𞤫𞤩𞥆𞤮𞥅𞤪𞤫 𞤈𞤢𞤬𞤭𞥅𞤹 𞤫 𞤀𞤦𞤣𞤵𞤧𞥆𞤢𞤤𞤢𞥄𞤥 𞤲𞤢𞥄𞤣𞤢𞥄 𞤼𞤢𞤸𞤮 𞤳𞤢 𞤧𞤢𞤪𞤭𞤪𞤣𞤵 𞤄𞤫𞤲𞤺𞤤𞤢𞤣𞤫𞤧. 𞤇𞤢𞥄𞤱𞤼𞤭 𞤯𞤵𞤥⹁ 𞤶𞤢𞥄𞤺𞤮𞤪𞤢𞤤 𞤄𞤫𞤲𞤺𞤤𞤢𞤣𞤫𞤧 𞤲𞤺𞤢𞤤 𞤢𞤪𞤣𞤭𞤲𞤭 𞤲𞤣𞤫 𞤳𞤢 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 𞤬𞤭𞥅 𞤘𞤢𞤲𞤣𞤢𞤤⹁ 𞤔𞤢𞤲𞤺𞤣𞤫 𞤫 𞤆𞤭𞤲𞤢𞤤 (UNESCO).

 

𞤉 𞤼𞤵𞤥𞤦𞤮𞤲’𞤣𞤭𞤪𞤢𞤤 𞤷𞤢𞤨𞥆𞤢𞤲𞤯𞤫 𞤼𞤢𞤼𞤢𞤩𞤢𞤤 𞤋𞤲𞤫𞤧𞤳𞤮𞥅 𞤲𞤺𞤢𞤤⹁ 𞤱𞤢𞤯𞤵𞤲𞤮𞥅𞤲𞤺𞤢𞤤 𞤻𞤢𞤤𞤲𞤣𞤫 𞥑𞥗 𞤶𞤮𞤤𞤮 𞥑𞥙𞥙𞥙⹁ 𞤻𞤢𞤤𞤢𞥄𞤲𞤣𞤫 𞥒𞥑 𞤅𞤭𞥅𞤤𞤮 𞤣𞤫𞤲 𞤼𞤮𞤯𞥆𞤢𞥄 𞤳𞤮 𞤤𞤢𞥄𞤼𞤮 𞤻𞤢𞤤𞤢𞥄𞤲𞤣𞤫 𞤯𞤫𞤥𞤺𞤢𞤤 𞤥𞤵𞤴𞤲𞤢𞥄𞤲𞤺𞤢𞤤.