𞤙𞤀𞤂𞤀𞥄𞤐𞤁𞤉 𞤍𞤉𞤐𞤘𞤀𞤂 𞤃𞤓𞤒𞤐𞤀𞥄𞤐𞤘𞤀𞤂

𞤳𞤮 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞤱𞤮𞤲𞤭 𞤳𞤮 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 𞤬𞤭𞥅 𞤘𞤢𞤲𞤣𞤢𞤤⹁ 𞤔𞤢𞤲𞤺𞤣𞤫 𞤫 𞤆𞤭𞤲𞤢𞤤 (UNESCO) 𞤼𞤮𞤯𞥆𞤭𞥅 𞤳𞤮 𞤤𞤢𞥄𞤼𞤮𞥅 𞤻𞤢𞤤𞤢𞥄𞤲𞤣𞤫 𞤯𞤫𞤲𞤺𞤢𞤤 𞤥𞤵𞥅𞤴𞤲𞤢𞥄𞤺𞤢𞤤.

𞤑𞤮 𞤄𞤢𞤲𞤺𞤤𞤢𞤣𞤫𞤧 𞤱𞤮𞤲𞤭 𞤤𞤫𞤴𞤣𞤭 𞤢𞤪𞤢𞤲𞤭𞤪𞤭 𞤫 𞤢𞤣𞥆𞤵𞤺𞤮𞤤 𞤫𞤩𞥆𞤮𞥅𞤪𞤫 𞤬𞤭𞥅 𞤼𞤮𞤯𞥆𞤢𞤺𞤮𞤤 𞤻𞤢𞤤𞤢𞥄𞤲𞤣𞤫 𞤱𞤮𞥅𞤼𞤫𞤪𞤫 𞤳𞤮 𞤤𞤢𞥄𞤼𞤮𞥅 𞤻𞤢𞤤𞤢𞥄𞤲𞤣𞤫 𞤯𞤫𞤲𞤺𞤢𞤤 𞤥𞤵𞥅𞤴𞤲𞤢𞥄𞤺𞤢𞤤.

𞤖𞤮𞤤 𞤲𞤮 𞥒𞥑 𞤕𞤮𞤤𞤼𞤮 𞤧𞤵𞤩𞤮𞤪𞤢𞥄؟

𞤐𞤣𞤫 𞤆𞤢𞤳𞤭𞤧𞤼𞤢𞤲 𞤧𞤭𞤲𞤷𞤢𞤲𞤮𞥅 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥔𞥗 𞤩𞤢𞥄𞤱𞤮 𞤧𞤮𞤪𞤼𞤢𞤺𞤮𞤤 𞤥𞤢𞤴𞤪𞤭 𞤫 𞤲𞤣𞤫𞤪 𞤋𞤲𞤣𞤭𞤴𞤢⹁ 𞤸𞤢𞤪𞤭 𞤸𞤭𞤲’𞤣𞤭 𞤥𞤢𞤪𞤭 𞤷𞤫𞤲𞤯𞤫 𞤯𞤭𞤯𞤭 𞤧𞤱𞤪𞤼𞤵𞤯𞤫: 𞤆𞤢𞤳𞤭𞤧𞤼𞤢𞤲 𞤊𞤵𞤯𞤲𞤢𞥄𞤲𞤺𞤫 𞤫 𞤆𞤢𞤳𞤭𞤧𞤼𞤢𞤲 𞤖𞤭𞤪𞤲𞤢𞥄𞤲𞤺𞤫. 𞤑𞤮𞤲𞤮 𞤤𞤫𞤴𞤣𞤭 𞤋𞤲𞤣𞤭𞤴𞤢 𞤲𞤣𞤭𞤲 𞤲𞤮 𞤥𞤢𞤪𞤭 𞤼𞤵𞤥𞤦𞤫𞤪𞤫 𞤩𞤭𞤧𞤭𞥅𞤲𞤣𞤫 𞤸𞤢𞤳𞤵𞤲’𞤣𞤫 𞤯𞤫𞤲 𞤷𞤫𞤲𞤯𞤫 𞤯𞤭𞤯𞤭. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤯𞤫𞤲 𞤷𞤫𞤲𞤯𞤫 𞤯𞤭𞤯𞤭 𞤲𞤮 𞤧𞤫𞤪𞤼𞤵𞤲𞤮𞥅 𞤧𞤫𞥅𞤯𞤢. 𞤊𞤭𞥅 𞤳𞤢𞤤𞤢 𞤩𞤪 𞤬𞤮𞤨 𞤳𞤮 𞤩𞤫 𞤳𞤮 𞤶𞤵𞥅𞤤𞤩𞤫⹁ 𞤧𞤫𞤲𞤺𞤮 𞤸𞤭𞤳𞥆𞤮𞤪𞤲𞤺𞤮 𞤲𞤺𞤮𞤲 𞤳𞤢 𞤬𞤵𞤯𞤲𞤢𞥄𞤲𞤺𞤫⹁ 𞤳𞤮 𞤵𞤪𞤣𞤵𞥅𞤪𞤫 𞤲𞤣𞤫𞤲 𞤩𞤵𞤪𞤢𞤼𞤢 𞤸𞤢𞥄𞤤𞤵𞤣𞤫⹁ 𞤳𞤢 𞤊𞤵𞤯𞤲𞤢𞥄𞤲𞤺𞤫 𞤲𞤮𞤲⹁ 𞤳𞤮 𞤄𞤫𞤲𞤺𞤢𞤤𞤭𞥅𞤪𞤫 𞤲𞤣𞤫𞤲 𞤸𞤢𞥄𞤤𞤢𞤼𞤢.

𞤊𞤭𞥅 𞤳𞤢𞤤𞤢 𞤧𞤭 𞤯𞤫𞥅 𞤷𞤫𞤲𞤯𞤫 𞤯𞤭𞤯𞤭 𞤸𞤢𞤱𞤼𞤭𞤲’𞤣𞤭𞤪𞤢𞥄𞤥𞤢⹁ 𞤼𞤢𞤱𞤢𞤴 𞤳𞤮 𞤄𞤫𞤲𞤺𞤢𞤤𞤭𞥅𞤪𞤫 𞤲𞤣𞤫𞤲 𞤩𞤵𞤪𞤫𞤼𞤫𞥅 𞤸𞤢𞥄𞤤𞤫𞥅𞤣𞤫⹁ 𞤫 𞤖𞤭𞤼𞤢𞥄𞤲𞤣𞤫 𞥑𞥙𞥔𞥘⹁ 𞤶𞤢𞥄𞤺𞤮𞤪𞤢𞤤 𞤆𞤢𞤳𞤭𞤧𞤼𞤢𞤲 𞤲𞤺𞤢𞤤 𞤱𞤢𞤯𞤭 𞤓𞤪𞤣𞤵𞥅𞤪𞤫 𞤲𞤣𞤫𞤲⹁ 𞤯𞤫𞤲𞤺𞤢𞤤 𞤤𞤢𞥄𞤥𞤮𞤪𞤲𞤺𞤢𞤤 𞤲𞤺𞤢𞤤 𞤲𞤣𞤫𞤪 𞤆𞤢𞤳𞤭𞤧𞤼𞤢𞤲 𞤬𞤮𞤨.

𞤇𞤫𞥅 𞤳𞤢 𞤊𞤵𞤯𞤲𞤢𞥄𞤲𞤺𞤫 𞤥𞤵𞤪𞤼𞤭⹁ 𞤩𞤫 𞤱𞤭𞤭 𞤩𞤫 𞤶𞤢𞤩𞥆𞤢𞤼𞤢𞥄 𞤯𞤵𞤥 𞤧𞤢𞤦𞤵𞤲𞤢 𞤳𞤮 𞤳𞤢 𞤊𞤵𞤯𞤲𞤢𞥄𞤲𞤺𞤫 𞤴𞤭𞤥𞤩𞤫 𞤩𞤫𞤲 𞤩𞤵𞤪𞤭 𞤯𞤵𞥅𞤯𞤵𞤣𞤫. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤳𞤮 𞤯𞤫𞤲𞤺𞤢𞤤 𞤬𞤵𞤯𞤲𞤢𞥄𞤺𞤫𞤴𞤢𞤲𞤳𞤮𞤱𞤢𞤤 𞤲𞤺𞤢𞤤⹁ 𞤄𞤢𞤲𞤺𞤭𞤤𞤢𞥄𞤪𞤫 𞤲𞤣𞤫𞤲⹁ 𞤩𞤵𞤪𞤭 𞤶𞤢𞥄𞤤𞤢𞥄𞤣𞤫. 𞤇𞤫 𞤱𞤭𞤭⹁ 𞤦𞤫𞤼𞤫 𞤴𞤮 𞤲𞤣𞤫 𞤩𞤫𞤴𞤣𞤭𞤼𞤫 𞤫 𞤓𞤪𞤣𞤵𞥅𞤪𞤫 𞤲𞤣𞤫𞤲⹁ 𞤯𞤫 𞤯𞤭𞤯𞤭 𞤳𞤢𞤤𞤢 𞤯𞤫 𞤤𞤢𞥄𞤼𞤮𞥅 𞤯𞤫𞤲𞤯𞤫 𞤤𞤢𞥄𞤥𞤮𞤪𞤯𞤫.

𞤑𞤮 𞤧𞤢𞤪𞤮𞥅𞤱𞤮 𞤱𞤭𞤫𞤼𞤫𞥅𞤯𞤮 𞤁𞤭𞤪𞤫𞤲𞤣𞤢𞤪𞤢𞤲𞤢𞤬 𞤁𞤢𞤼𞥆𞤢⹁ 𞤢𞤣𞥆𞤵𞤲𞤮𞥅 𞤲𞤣𞤫𞤲 𞤫𞤩𞥆𞤮𞥅𞤪𞤫 𞤳𞤢 𞤧𞤢𞤪𞤭𞤪𞤣𞤵 𞤻𞤢𞤤𞤲𞤣𞤫 𞥒𞥓 𞤕𞤮𞤤𞤼𞤮 𞥑𞥙𞥔𞥘. 𞤑𞤮𞤲𞤮 𞤶𞤢𞥄𞤺𞤮𞤪𞤢𞤤 𞤆𞤢𞤳𞤭𞤧𞤼𞤢𞤲 𞤲𞤺𞤢𞤤 𞤲𞤫𞤱𞤭𞤲𞤢𞥄𞤤𞤭. 𞤊𞤭𞥅 𞤤𞤢𞤲𞤷𞤵𞤺𞤮𞤤 𞤣𞤭𞤤𞥆𞤢𞤲𞤯𞤫 𞤴𞤭𞤥𞤩𞤫 𞤩𞤫𞤲⹁ 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤 𞤼𞤮𞤽𞤭 𞤧𞤫𞤨𞥆𞤵𞤪𞤵 𞤫 𞤥𞤮𞤩𞤼𞤮𞤲’𞤣𞤭𞤪𞤮.

𞤇𞤢𞥄𞤱𞤼𞤭 𞤯𞤵𞤥⹁ 𞤶𞤢𞤲𞤺𞤢𞤲𞤢𞥄𞤳𞤵𞥅𞤩𞤫 𞤩𞤫𞤲 𞤳𞤢 𞤔𞤢𞥄𞤩𞤭𞥅𞤪𞤣𞤫 𞤁𞤀𞤑𞥆𞤀 𞤫 𞤲𞤣𞤫𞤪 𞤄𞤢𞤲𞤺𞤭𞤤𞤢𞤣𞤫𞤧 𞤭𞤥𞥆𞤭𞤲𞤭 𞤥𞤮𞤩𞤼𞤮𞤲’𞤣𞤭𞤪𞤫 𞤥𞤢𞤱𞤯𞤫 𞤳𞤢𞤻𞤵𞤲 𞤫 𞤧𞤫𞤨𞥆𞤵𞤪𞤵𞥅𞤶𞤭 𞤼𞤭𞥅𞤯𞤵𞤯𞤭. 𞤙𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞥑𞥙𞥕𞥒⹁ 𞤨𞤮𞤤𞤭𞥅𞤧𞤢𞥄𞤩𞤫 𞤆𞤢𞤳𞤭𞤧𞤼𞤢𞤲 𞤩𞤫𞤲 𞤬𞤫𞤼𞥆𞤭𞤲𞤭 𞤤𞤮𞥅𞤱𞤢𞤲𞤯𞤫 𞤫 𞤥𞤮𞤩𞤼𞤮𞤲’𞤣𞤭𞤪𞤫 𞤯𞤫𞤲⹁ 𞤴𞤭𞤥𞤩𞤫 𞤲𞤶𞤮𞤱𞤮 𞤥𞤢𞥄𞤴𞤭⹁ 𞤼𞤫𞥅𞤥𞤫𞤯𞥆𞤫 𞤦𞤢𞤪𞤥𞤭.

𞤘𞤭𞤤𞤢 𞤮𞤲𞤼𞤵𞤥𞤢⹁ 𞤄𞤫𞤲𞤺𞤭𞤤𞤢𞥄𞤩𞤫 𞤩𞤫𞤲 𞤱𞤢𞤯𞤭 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮⹁ 𞤻𞤢𞤤𞤢𞥄𞤲𞤣𞤫 𞤢𞤲𞤣𞤭𞤼𞤭𞤪𞤲𞤣𞤫 𞤥𞤢𞥄𞤴𞤵𞤲𞤮𞥅𞤩𞤫 𞤬𞤭 𞤴𞤮 𞤯𞤫𞤲𞤺𞤢𞤤 𞤥𞤵𞤵𞤲 𞤱𞤵𞥅𞤪𞤵. 𞤇𞤫𞥅 𞤥𞤢𞥄𞤴𞤵𞤲𞤮𞥅𞤩𞤫 𞤲𞤣𞤫𞤲 𞤻𞤢𞤤𞤲𞤣𞤫 𞤲𞤮 𞤥𞤢𞤸𞤢𞤲𞤢𞥄 𞤳𞤢𞤣𞤭 𞤧𞤮𞤴𞤪𞤵 𞤳𞤮 𞤩𞤫 𞤥𞤢𞥄𞤲𞤣𞤭𞤼𞤮𞤪𞤫𞥅 𞤫 𞤳𞤢 𞤩𞤫 𞤶𞤵𞥅𞤪𞤫𞥅.

𞤄𞤢𞤯𞤼𞤢𞤲𞤫 𞤯𞤵𞤥⹁ 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥙𞥘⹁ 𞤦𞤫𞤲𞤺𞤢𞤤𞤭𞥅𞤩𞤫 𞤯𞤭𞤯𞤮 𞤶𞤮𞥅𞤯𞤭𞥅𞤩𞤫 𞤑𞤢𞤲𞤢𞤣𞤢𞥄 𞤱𞤭𞤼𞤫𞥅𞤩𞤫 𞤈𞤢𞤬𞤭𞥅𞤹𞤵𞤤 𞤋𞤧𞤤𞤢𞥄𞤥 𞤫 𞤀𞤦𞤣𞤵𞤧𞥆𞤢𞤤𞤢𞥄𞤥⹁ 𞤱𞤭𞤲𞤣𞤭 𞤩𞤢𞤼𞤢𞥄𞤳𞤵𞤪𞤵 𞤲𞤫𞤤𞤣𞤭𞤲𞤣𞤵 𞤑𞤮𞤬𞤭 𞤀𞤲𞤢𞤲. 𞤊𞤫𞤱𞤲𞤣𞤮 𞤮𞤲𞤼𞤵𞤥𞤢⹁ 𞤳𞤮 𞤳𞤢𞤲𞤳𞤮 𞤤𞤢𞥄𞤼𞤭𞤲𞤮𞥅 𞤄𞤭𞤲𞤣𞤮 𞤃𞤢𞤱𞤯𞤮 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 (ONU – UNO) . 𞤇𞤫 𞤼𞤮𞤪𞤭𞥅 𞤥𞤮 𞤫 𞤲𞤣𞤫𞤪 𞤲𞤣𞤵𞤲 𞤩𞤢𞤼𞤢𞥄𞤳𞤵𞤪𞤵 𞤰𞤫𞤼𞥆𞤵𞤺𞤮𞤤 𞤨𞤫𞤸𞤫 𞤸𞤭𞤱𞤭𞤪𞤯𞤫 𞤯𞤫𞤲𞤯𞤫 𞤢𞤣𞤵𞤲𞤢 𞤯𞤫𞤲 𞤬𞤭𞥅 𞤱𞤮𞤼𞤢 𞤯𞤫 𞤥𞤵𞤤𞤵⹁ 𞤳𞤢𞤻𞤵𞤲 𞤫 𞤼𞤮𞤯𞥆𞤢𞤺𞤮𞤤 𞤻𞤢𞤤𞤲𞤣𞤫 𞥒𞥑 𞤕𞤮𞤤𞤼𞤮 𞤳𞤮 𞤱𞤮𞤲𞤢 𞤶𞤵𞥅𞤤𞤣𞤫𞥅𞤪𞤫 𞤯𞤫𞤲𞤯𞤫 𞤥𞤵𞤴𞤲𞤢𞥄𞤯𞤫.

𞤐𞤣𞤫𞥅 𞤫𞤩𞥆𞤮𞥅𞤪𞤫 𞤈𞤢𞤬𞤭𞥅𞤹 𞤫 𞤀𞤦𞤣𞤵𞤧𞥆𞤢𞤤𞤢𞥄𞤥 𞤲𞤢𞥄𞤣𞤢𞥄 𞤼𞤢𞤸𞤮 𞤳𞤢 𞤧𞤢𞤪𞤭𞤪𞤣𞤵 𞤄𞤫𞤲𞤺𞤤𞤢𞤣𞤫𞤧. 𞤇𞤢𞤱𞤼𞤭 𞤯𞤵𞤥⹁ 𞤶𞤢𞥄𞤺𞤮𞤪𞤢𞤤 𞤄𞤫𞤲𞤺𞤤𞤢𞤣𞤫𞤧 𞤲𞤺𞤢𞤤 𞤢𞤪𞤣𞤭𞤲𞤭 𞤲𞤣𞤫 𞤳𞤢 𞤐𞤶𞤵𞤩𞥆𞤵𞤣𞤭 𞤘𞤫𞤲𞤯𞤭 𞤊𞤮𞤼𞥆𞤵𞤯𞤭 𞤬𞤭𞥅 𞤘𞤢𞤲𞤣𞤢𞤤⹁ 𞤔𞤢𞤲𞤺𞤣𞤫 𞤫 𞤆𞤭𞤲𞤢𞤤 (UNESCO).

𞤉 𞤼𞤵𞤥𞤦𞤮𞤲’𞤣𞤭𞤪𞤢𞤤 𞤥𞤢𞤱𞤲𞤺𞤢𞤤 𞤷𞤢𞤨𞥆𞤢𞤲𞤯𞤫 𞤼𞤢𞤼𞤢𞤩𞤢𞤤 𞤭𞤲𞤫𞤧𞤳𞤮𞥅 𞤲𞤺𞤢𞤤⹁ 𞤻𞤢𞤤𞤲𞤣𞤫 𞥑𞥗 𞤶𞤮𞤤𞤮 𞥑𞥙𞥙𞥙 𞤼𞤮𞤯𞥆𞤢𞥄 𞤳𞤮 𞤤𞤢𞥄𞤼𞤮 𞤻𞤢𞤤𞤢𞥄𞤲𞤣𞤫 𞤥𞤵𞤴𞤲𞤢𞥄𞤲𞤺𞤢𞤤.