𞤑𞤌𞤈𞤌𞥅𞤐𞤀 𞤏𞤀𞤒𞤂𞤀𞤒 𞤔𞤋𞤑𞥆𞤓

𞤊𞤭𞤴𞤢𞥄𞤳𞤵 𞤲𞤫𞤯𞥆𞤢𞤲𞤳𞤫 𞤲𞤮 𞤱𞤢𞤴𞤤𞤮𞤪𞤢 𞤲𞤮 𞤸𞤢𞤱𞤲𞤮𞤪𞤭 𞤳𞤫𞤲𞤫𞤲. 𞤖𞤢𞤳𞥆𞤫𞤪𞤫𞤲 𞤫𞤯𞤫𞤲 𞤸𞤮𞥅𞤤𞤭𞥅 𞤱𞤮𞤲𞤣𞤫 𞤫𞤯𞤫𞤲 𞤸𞤭𞤧𞤭⹁ 𞤫𞤲 𞤧𞤭𞤳𞥆𞤢𞤴 𞤢𞤤𞤢𞥄 𞤳𞤮 𞤪𞤮𞤲𞤳𞤭𞤲𞤼𞤢 𞤫𞤲 𞤱𞤢𞤯𞤵𞤺𞤮𞤤 𞤳𞤢𞤤𞤢 𞤳𞤮 𞤬𞤢𞥄𞤤𞤢 𞤯𞤫𞤲. 𞤐𞤣𞤫𞤲𞤧𞤢𞤴 𞤼𞤵𞤲⹁ 𞤼𞤢𞤺𞤢𞥄𞤲𞤺𞤫𞤤 𞤨𞤢𞤥𞤢𞤪𞤫𞤤 𞤭𞤱𞤪𞤢 𞤳𞤢 𞤭𞤱𞤪𞤢𞤼𞤢 𞤱𞤮𞥅⹁ 𞤢𞤪𞤢 𞤣𞤭𞤥𞤦𞤢 𞤳𞤮 𞤣𞤫𞥅𞤰𞤵𞤲𞤮𞥅 𞤬𞤮𞤱⹁ 𞤱𞤢𞤴𞤤𞤭𞤼𞤢 𞤢𞤣𞤵𞤲𞤢 𞤥𞤫𞤲 𞤮𞤲.

𞤑𞤮 𞤱𞤮𞥅𞤱𞤵𞤲𞤮𞥅⹁ 𞤧𞤭 𞤢 𞤲𞤢𞤲𞤭𞥅 𞤺𞤮𞥅𞤼𞤯𞤮 𞤲𞤮 𞤭𞥅𞤤𞤢⹁ 𞤳𞤮 𞤴𞤮 𞤢 𞤻𞤢𞥄𞤺𞤢𞤲𞤮 𞤥𞤮 𞤴𞤵𞤪𞤥𞤫𞥅𞤲𞤣𞤫 𞤅𞤫𞤲𞤭𞥅𞤯𞤮 𞤮𞤲 (يرحمك الله)⹁ 𞤫 𞤸𞤮𞥅𞤪𞤫 𞤴𞤭𞤯𞤭 𞤫 𞤲𞤫𞥅𞤣𞤭 𞤳𞤢𞤣𞤭.
𞤑𞤮𞤲𞤮 𞤶𞤮𞥅𞤲𞤭⹁ 𞤧𞤢𞤦𞤵 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫 𞤳𞤮𞤪𞤮𞥅𞤲𞤢𞤾𞤭𞤪𞤭𞥅𞤧⹁ 𞤺𞤮𞥅𞤼𞤯𞤮 𞤯𞤮𞤶𞥆𞤢𞤴 𞤼𞤵𞤲 𞤥𞤢𞤤𞥆𞤢 𞤭𞥅𞤤𞤢𞤴 𞤼𞤵𞤲 𞤧𞤫𞤪𞤢 𞤥𞤢𞥄⹁ 𞤇𞤫𞤪𞤲𞤣𞤫 𞤥𞤢𞥄 𞤲𞤣𞤫𞤲 𞤻𞤭𞤤𞤳𞤢. 𞤖𞤢𞤪𞤢 𞤢𞤯𞤢 𞤶𞤭𞤩𞤭𞥅⹁ 𞤢𞤯𞤢 𞤢𞥄𞤲𞤭 𞤬𞤭𞥅 𞤱𞤮𞤼𞤢 𞤼𞤢𞤱𞤵 𞤯𞤵𞤥 𞤳𞤮 𞤯𞤮𞤶𞥆𞤢𞤲𞤣𞤫 𞤥𞤢𞥄 𞤭𞥅𞤤𞤢𞤲𞤣𞤫 𞤳𞤮𞤪𞤮𞥅𞤲𞤢𞥄. 𞤦𞤫𞤲𞤭𞤲 𞤼𞤢𞤰𞤢𞥄 𞤬𞤮𞥅𞤬𞤢𞥄𞤲𞤺𞤮 𞤥𞤢𞥄 𞤲𞤺𞤮𞤲 𞤼𞤢𞤸𞤮⹁ 𞤧𞤢𞤦𞤵 𞤳𞤵𞤤𞤮𞤤 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫. 𞤚𞤢𞤥𞤢𞥄 𞤯𞤮𞤲 𞤸𞤢𞥄 𞤸𞤫𞤲𞤣𞤵 𞤲𞤣𞤵𞤲 𞤲𞤢𞤩𞤢 𞤦𞤢𞤯𞤼𞤫 𞤯𞤮𞤶𞤢𞤲𞤣𞤫 𞤲𞤣𞤫𞤲 𞤥𞤢𞥄 𞤭𞥅𞤤𞤢𞤲𞤣𞤫 𞤲𞤣𞤫𞤲⹁ 𞤧𞤭 𞤬𞤵𞤯𞥆𞤭𞤼𞤮𞤯𞤢𞥄 𞤬𞤮𞥅𞤬𞤵𞤺𞤮𞤤 𞤲𞤮𞤲 𞤳𞤢𞤣𞤭.

“𞤉𞤲𞤫𞥅 𞤢𞤯𞤢 𞤫 𞤶𞤢𞤥 𞤥𞤵𞤧𞤭𞤣𞤯𞤮؟” 𞤀 𞤢𞥄𞤥𞤢𞤼𞤢𞥄 𞤤𞤢𞤲𞤣𞤢𞥄𞤣𞤫 𞤯𞤵𞤥⹁ 𞤧𞤮 𞤢 𞤲𞤢𞤲𞤭 𞤲𞤫𞤯𞥆𞤮 𞤲𞤮 𞤭𞥅𞤤𞤢 𞤥𞤢𞥄 𞤯𞤮𞤶𞥆𞤢 𞤼𞤢𞤳𞥆𞤮 𞤥𞤢𞥄. 𞤖𞤢𞤪𞤢 𞤳𞤢𞤣𞤭 𞤢𞤯𞤢 𞤢𞥄𞤲𞤭 𞤱𞤮𞤼𞤢 𞤮 𞤧𞤭𞤳𞥆𞤵 𞤢 𞤼𞤵𞥅𞤥𞤢𞤴 𞤥𞤮 𞤱𞤮𞤲𞤭 𞤱𞤮𞤲𞤣𞤵𞤺𞤮𞤤 𞤫 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫. 𞤉 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤸𞤢𞤪𞤢𞤴 𞤢𞤯𞤢 𞤱𞤮𞤯𞥆𞤭𞤼𞤮𞤪𞤮𞥅 𞤥𞤮 𞤧𞤫𞥅𞤯𞤢 𞤧𞤫𞥅𞤯𞤢 𞤱𞤮𞤼𞤢 𞤮 𞤧𞤭𞤳𞥆𞤵 𞤢 𞤣𞤮𞤺𞤢𞤴 𞤥𞤮 𞤱𞤮𞤲𞤭.

𞤉𞤥𞤦𞤢 𞤯𞤵𞤥 𞤲𞤮 𞤥𞤢𞥄𞤨𞤭𞤲𞤭!

𞤏𞤮𞤲𞤣𞤫 𞤸𞤢𞤴 𞤧𞤮 𞤼𞤢𞤱𞤭𞥅 𞤱𞤮𞤲𞤢𞥄 𞤭𞥅𞤤𞤮𞤤 𞤥𞤢𞥄 𞤯𞤮𞤶𞥆𞤢𞤲𞤣𞤫. 𞤒𞤮 𞤲𞤢𞤲𞤣𞤵 𞤼𞤵𞤲 𞤫 𞤺𞤮𞥅𞤼𞤫𞤤 𞤫 𞤯𞤭𞥅 𞤯𞤭𞤯𞤭. 𞤐𞤮𞤨𞥆𞤭 𞤯𞤭𞤲 𞤼𞤵𞤯𞤮𞤼𞤮 𞤳𞤭𞤧𞤢𞤲⹁ 𞤺𞤭𞤼𞤫 𞤨𞤢𞤪𞤼𞤭𞤲𞤮𞥅⹁ 𞤬𞤫𞤱𞤼𞤢 𞤳𞤢 𞤸𞤭𞤼𞤮 𞤲𞤺𞤮𞤲 𞤭𞤱𞤪𞤭 𞤼𞤮𞤲⹁ 𞤸𞤢𞤪𞤢 𞤮𞤲𞤼𞤭𞤺𞤭 𞤲𞤮 𞤶𞤭𞤩𞤭𞥅 𞤧𞤭 𞤱𞤮𞤲𞤢𞥄 𞤲𞤢𞤱𞤲𞤵𞤯𞤮 𞤑𞤮𞤪𞤮𞥅𞤲𞤢 𞤱𞤮𞤲𞤭 𞤧𞤫𞤪𞤢 𞤥𞤵𞤲.

𞤒𞤮 𞤀𞤤𞤤𞤢𞤸𞤵 𞤣𞤢𞤲𞤣𞤵 𞤫𞤲 𞤣𞤢𞤲𞤣𞤢𞤲𞤢 𞤫𞤲⹁ 𞤲𞤢𞤲𞤭.
𞤑𞤮 𞤩𞤵𞤪𞤭 𞤫 𞤥𞤵𞤰𞥆𞤢𞤲𞤣𞤫 𞤲𞤫𞤯𞥆𞤮 𞤸𞤢𞤲𞤣𞤫⹁ 𞤳𞤮 𞤱𞤮𞤲𞤵𞤺𞤮𞤤 𞤳𞤢 𞤧𞤵𞥅𞤣𞤵 𞤥𞤵𞤲 𞤲𞤢𞤲𞤭. 𞤅𞤮 𞤼𞤢𞤱𞤭𞥅 𞤲𞤮𞤲 𞤳𞤮 𞤦𞤫𞥅 𞤴𞤢𞤤𞤼𞤢⹁ 𞤮𞤲𞤼𞤭𞤺𞤭 𞤲𞤮 𞤸𞤢𞥄𞤲𞤭 𞤱𞤢𞤯𞤼𞤢𞤲𞤣𞤫 𞤸𞤭𞥅𞤤𞤢 𞤬𞤮𞤼𞤢⹁ 𞤸𞤵𞥅𞤱𞤼𞤮𞤪𞤢 𞤯𞤫𞥅 𞤨𞤫𞤸𞤫 𞤯𞤮𞥅:

𞥑 – 𞤔𞤓𞥅𞤍𞤉 𞤍𞤉𞤐, 𞤤𞤮𞥅𞤼𞤢 𞤯𞤫 𞤧𞤮𞥅𞤲𞤮 𞤳𞤢𞤤𞤢. 𞤂𞤮𞥅𞤼𞤭𞤪𞤢 𞤯𞤫 𞤲𞤣𞤭𞤴𞤢𞤲 𞤫 𞤧𞤢𞥄𞤦𞤵𞤲𞤣𞤫.
𞥒 – 𞤅𞤌𞤇𞥆𞤓𞤐’𞤘𞤌 𞤐𞤘𞤌𞤐⹁ 𞤯𞤮𞤶𞥆𞤢 𞤥𞤢𞥄 𞤭𞥅𞤤𞤢 𞤫 𞤲𞤣𞤫𞤪 𞤥𞤢𞤺𞥆𞤮. 𞤏𞤮𞤼𞤢 𞤮𞤲𞤼𞤭𞤺𞤭 𞤯𞤮𞤶𞥆𞤵 𞤳𞤢 𞤲𞤣𞤫𞤪 𞤲𞤫𞤱𞤫 𞤥𞤵𞤲 𞤬𞤫𞤧.
𞥓 – 𞤒𞤉𞥅𞤅𞤌 𞤐𞤘𞤌𞤐⹁ 𞤱𞤮𞤼𞤢 𞤮𞤲𞤼𞤭𞤺𞤭 𞤥𞤫𞥅𞤥𞤵 𞤲𞤺𞤮. 𞤏𞤮𞤼𞤢 𞤮𞤲𞤼𞤭𞤺𞤭 𞤱𞤢𞤯𞤵 𞤶𞤵𞥅𞤯𞤫 𞤥𞤵𞤲 𞤯𞤫𞤲 𞤳𞤢 𞤲𞤣𞤫𞤪 𞤸𞤵𞤲𞤣𞤵𞤳𞤮.
𞥔 – 𞤚𞤉𞤆𞥆𞤉 𞤼𞤢𞤼𞤭⹁ 𞤴𞤮 𞤯𞤵𞤥 𞤱𞤮𞤲𞤵 𞤸𞤢𞤳𞥆𞤵𞤲’𞤣𞤫 𞤮𞤲𞤼𞤭𞤺𞤭 𞤫 𞤴𞤭𞤥𞤩𞤫 𞤩𞤫𞤲.
𞥕 – 𞤃𞤌 𞤅𞤌𞤋𞥅 𞤲𞤢𞤱𞤲𞤵𞤣𞤫⹁ 𞤳𞤮 𞤴𞤮 𞤤𞤵𞤼𞥆𞤵 𞤳𞤢 𞤧𞤵𞥅𞤣𞤵 𞤥𞤵𞤲. 𞤏𞤮𞤼𞤢 𞤮𞤲𞤼𞤭𞤺𞤭 𞤴𞤢𞤤𞤼𞤵 𞤸𞤢𞥄 𞤪𞤢𞥄𞤩𞤭𞤲𞤢 𞤴𞤭𞤥𞤩𞤫 𞤺𞤮𞥅.

𞤀𞤲𞤣𞤭𞤼𞤢 𞤳𞤢𞤣𞤭 𞤱𞤮𞤲𞤣𞤫⹁ 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫 𞤲𞤮 𞤱𞤢𞥄𞤱𞤭 𞤧𞤮𞥅𞤥𞤢𞥄𞤣𞤫 𞤫 𞤲𞤫𞤯𞥆𞤮⹁ 𞤸𞤢𞤪𞤢 𞤸𞤢𞤴 𞤮𞤲𞤼𞤭𞤺𞤭 𞤧𞤮𞤢𞥄𞤤𞤭. 𞤅𞤮 𞤢 𞤴𞤭𞤭𞥅 𞤥𞤮⹁ 𞤸𞤢𞤪𞤢𞤴 𞤮𞤥𞤮 𞤲𞤢𞤲𞤣𞤭 𞤫 𞤧𞤫𞤤𞥆𞤵𞤯𞤮 𞤳𞤫𞤲. 𞤑𞤮𞤲𞤮 𞤸𞤢𞤪𞤢𞤤𞤫 𞤮𞤥𞤮 𞤱𞤢𞥄𞤱𞤭𞤱𞤮𞤲𞤣𞤫 𞤧𞤢𞥄𞤦𞤵 𞤲𞤮 𞤲𞤺𞤵𞥅 𞤻𞤢𞤱𞤵 𞤪𞤢𞥄𞤩𞤭𞤪𞤢 𞤴𞤭𞤥𞤩𞤫 𞤧𞤫𞤤𞥆𞤵𞤩𞤫 𞤺𞤮𞥅.

𞤍𞤵𞤥 𞤲𞤮 𞤼𞤢𞤱𞤢𞥄 𞤫 𞤳𞤮 𞤱𞤮𞤲𞤭 𞤧𞤢𞤦𞤵 𞤶𞤢𞥄𞤤𞤢𞤺𞤮𞤤 𞤲𞤺𞤵𞥅 𞤻𞤢𞤱𞤵 𞤫 𞤲𞤣𞤫𞤪 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲. 𞤑𞤮 𞤩𞤢𞤣𞤭𞥅 𞤵𞤶𞤵𞤲𞤫 𞤼𞤫𞥅𞤥𞤫𞤯𞥆𞤫 𞤶𞤫𞥅𞤯𞤭𞤯𞤭 𞤫 𞤵𞤶𞤵𞤲𞤫 𞤲𞤮𞤺𞤢𞤴 𞤫 𞤲𞤢𞤴𞤭 (𞥗𞥒𞥔𞥐𞥐𞥐) 𞤱𞤮𞤲𞤭 𞤳𞤮 𞤢𞤲𞤣𞤢𞥄 𞤲𞤮 𞤱𞤮𞤲𞤣𞤭 𞤫 𞤲𞤺𞤵𞥅 𞤻𞤢𞤱𞤵. 𞤐𞤮 𞤱𞤮𞥅𞤣𞤭 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫 𞤳𞤢𞤣𞤭 𞤱𞤮𞤲𞤣𞤵𞤩𞤫 𞤫 𞤲𞤺𞤵𞥅 𞤻𞤢𞤱𞤵 𞤸𞤢𞤪𞤢 𞤩𞤫 𞤢𞤲𞤣𞤢𞥄. 𞤐𞤺𞤵𞥅 𞤻𞤢𞤱𞤵 𞤳𞤢𞤣𞤭 𞤱𞤢𞤪𞤭𞥅 𞤳𞤮 𞤴𞤢𞤱𞤼𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤷𞤢𞤨𞥆𞤢𞤲𞤯𞤫 𞤼𞤢𞤼𞤭 𞤫 𞤵𞤶𞤵𞤲𞤫 𞤲𞤢𞤴𞤭 (𞥓𞥔𞥐𞥐𞥐) . 𞤑𞤮𞤲𞤮 𞤸𞤢𞤲 𞤶𞤮𞥅𞤲𞤭 𞤤𞤫𞤳𞥆𞤭 𞤥𞤢𞤺𞥆𞤵 𞤸𞤫𞤩𞤢𞥄𞤳𞤭.

𞤑𞤮 𞤯𞤵𞤥 𞤱𞤢𞤯𞤭 𞤧𞤭 𞤳𞤢𞤤𞤢 𞤲𞤮 𞤼𞤮𞤪𞤢𞥄 𞤪𞤫𞥅𞤲𞤢𞤺𞤮𞤤⹁ 𞤸𞤫𞤯𞤭𞤼𞤮𞥅 𞤴𞤢𞤥𞤭𞤪𞤮𞥅𞤶𞤫 𞤸𞤢𞤤𞤬𞤭𞤲𞤢𞥄𞤩𞤫 𞤩𞤫𞤲 𞤬𞤭𞥅 𞤷𞤫𞤤𞥆𞤢𞤤. 𞤑𞤮 𞤲𞤮𞤲 𞤼𞤢𞤲 𞤱𞤢𞥄𞤱𞤭𞤪𞤼𞤫𞤲 𞤬𞤮𞥅𞤤𞤵𞤣𞤫 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫 𞤱𞤮𞤲𞤣𞤵𞤣𞤫 𞤫 𞤦𞤢𞤤𞥆𞤢𞤤 𞤚𞤮𞥅𞤱𞤵𞤯𞤮 𞤅𞤫𞤲𞤭𞥅𞤯𞤮 𞤮𞤲.

𞤂𞤢𞤥𞤢𞤪𞤢𞥄𞤲𞤢 𞤐𞤣𞤵𞤨𞥆𞤵𞤼𞤫𞥅

𞤒𞤮 𞤘𞤫𞤲𞤮 𞤮𞤲 𞤪𞤫𞥅𞤲𞤵 𞤫𞤲 𞤮 𞤣𞤢𞤯𞤭𞤲𞤢 𞤫𞤲.

2 thoughts on “𞤑𞤌𞤈𞤌𞥅𞤐𞤀 𞤏𞤀𞤒𞤂𞤀𞤒 𞤔𞤋𞤑𞥆𞤓

  1. 𞤌𞤲 𞤶𞤢𞥄𞤪𞤢𞤥𞥆 𞤬𞤮𞤼𞤢⹁ 𞤲𞤮 𞤱𞤭𞤲𞤣𞤭𞥅 𞤬𞤴𞤱

  2. 𞤀𞥄𞤥𞤭𞥅𞤲 ! 𞤚𞤫𞤣𞥆𞤭𞤲𞤺𞤮𞤤 𞤯𞤭𞥅 𞤣𞤢𞤯𞤭𞤲𞤢𞤴𞤯𞤭 𞤯𞤮𞥅 𞤲𞤣𞤫𞥅 𞤲𞤢𞤱𞤲𞤢𞥄𞤪𞤫 𞤲𞤮 𞤲𞤫𞤱𞤭𞥅 𞤬𞤮𞤼𞤢 𞤫 𞤤𞤫𞤴𞤯𞤫 𞤢𞤤𞤯𞤵𞤯𞤫 𞤱𞤢𞤲𞤮 𞤢𞤥𞤫𞤪𞤭𞤳 𞤫 𞤫𞤪𞤮𞤨… 𞤑𞤮𞤲𞤮 𞤳𞤢 𞤤𞤫𞤴𞤯𞤫 𞤼𞤢𞤥𞤨𞤵𞤯𞤫 𞤱𞤢𞤲𞤮 𞤢𞤬𞤪𞤭𞤳𞤭… 𞤍𞤵𞤲 𞤲𞤮 𞤱𞤢𞤭 𞤱𞤢 𞤪𞤮𞤲𞤣𞤢𞤺𞤮𞤤 𞤬𞤫𞤤𞥆𞤮.
    𞤒𞤮 𞤢𞤤𞤤𞤢𞤸 𞤸𞤭𞤧𞤭𞤲 𞤫𞤲 𞤮 𞤸𞤭𞤧𞤭𞤲𞤢𞤲𞤢-𞤫𞤲.

𞤀𞤷𞥆𞤵 𞤃𞤢𞥄𞤼𞤭𞤲𞤮𞤤

𞤌𞤲 𞤶𞤢𞥄𞤪𞤢𞥄𞤥𞤢

%d مدونون معجبون بهذه: