𞤘𞤋𞤐𞤉𞤐𞤀𞥄𞤇𞤉 𞤇𞤉𞤐 𞤐𞤌𞥅𞤚𞤋𞤑𞤉
𞤑𞤮 𞤧𞤢𞥄𞤼𞤭𞤲𞤢𞤲𞤮𞥅 𞤳𞤮𞤲 𞤻𞤢𞤤𞤲𞤣𞤫 𞤀𞥄𞤩𞤵𞤲𞤣𞤫 𞤤𞤢𞥄𞤼𞤭𞤳𞤫.
𞤐𞤮𞤣𞥆𞤢𞥄𞤲𞤣𞤵⹁ 𞤲𞤣𞤵 << 𞤃𞤌𞤔𞤌𞤄𞤉𞤈𞤉 𞤐’𞤘𞤉𞤐𞤁𞤋𞤒𞤀𞤐𞤑𞤌𞥅𞤈𞤉 𞤁𞤀𞤈𞤚𞤀𞤐𞤋𞥅𞤐𞤁𞤉 𞤁𞤌𞤅𞤚𞤉𞤈𞤉 𞤐𞤁𞤉𞤐 >> 𞤲𞤮𞤣𞥆𞤵𞤲𞤮𞥅 𞤲𞤣𞤵𞤲 𞤬𞤭𞥅 𞤸𞤢𞤲𞤣𞤫 𞥑𞥔 𞤒𞤀𞤈𞤑𞤌 𞥒𞥐𞥑𞥙 𞤤𞤢𞥄𞤼𞤭𞤲𞤮. 𞤊𞤢𞥄𞤲𞤣𞤢𞥄𞤪𞤫 𞤲𞤮𞤣𞥆𞤢𞥄𞤲𞤣𞤵 𞤲𞤣𞤵𞤲⹁ 𞤳𞤮 𞤣𞤢𞤪𞤼𞤢𞤺𞤮𞤤 𞤫𞤩𞥆𞤮𞥅𞤪𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤬𞤢𞥄 𞤱𞤢𞤴𞤤𞤵𞤺𞤮𞤤 𞤁𞤌𞤅𞤚𞤉𞤈𞤉 𞤘𞤭𞤲𞤫 𞤲𞤣𞤫𞤲.𞤅𞤭 𞤲𞤣𞤫𞥅 𞤫𞤩𞥆𞤮𞥅𞤪𞤫 𞤥𞤢𞤳𞥆𞤮 𞤣𞤢𞤪𞤼𞤢𞥄𞤳𞤢 𞤸𞤢𞥄 𞤲𞤣𞤫 𞤢𞤪𞤭𞥅 𞤫 𞤤𞤢𞥄𞤼𞤢𞥄𞤣𞤫⹁ 𞤸𞤢𞤪𞤢𞤴 𞤳𞤮 𞤤𞤮𞤪𞥆𞤢 𞤱𞤮𞤲𞤢𞤣𞤫 𞤤𞤫𞤴𞤣𞤭 𞤲𞤣𞤭𞤲.
𞤒𞤭𞤥𞤩𞤫 𞤩𞤫𞤲 𞤲𞤮𞥅𞤼𞤮𞤪𞤭 𞤲𞤮 𞤼𞤭𞤶𞥆𞤮𞤪𞤢𞤲𞤮𞥅⹁ 𞤧𞤢𞤦𞤵𞤲𞤢 𞤴𞤭𞤩𞤫𞥅 𞤩𞤫𞤲 𞤴𞤢𞤤𞤼𞤵𞤲𞤮 𞤬𞤮𞤼𞤢. 𞤉 𞤷𞤫𞤲𞤯𞤫 𞤯𞤫𞤲 𞤬𞤮𞤨⹁ 𞤫 𞤤𞤫𞤴𞤣𞤭 𞤺𞤭𞤲𞤫 𞤲𞤣𞤭𞤲⹁ 𞤴𞤭𞤥𞤩𞤫 𞤩𞤫𞤲 𞤴𞤢𞤤𞤼𞤵𞤲𞤮⹁ 𞤲𞤣𞤭𞤺𞤢 𞤑𞤮𞤲𞤢𞥄𞤳𞤭𞤪𞤭 𞤸𞤢𞥄 𞤅𞤫𞤪𞤫𞤳𞤮𞤪𞤫 𞤳𞤢 𞤸𞤮𞤪𞤯𞤮𞥅𞤪𞤫 𞤘𞤭𞤲𞤫. 𞤖𞤢𞤴 𞤳𞤢 𞤶𞤢𞤲𞤢𞤲𞤭𞤪𞤭⹁ 𞤱𞤢𞤲𞤮 𞤑𞤮𞤼𞤣𞤭𞤱𞤢𞥄𞤪⹁ 𞤅𞤫𞤲𞤫𞤺𞤢𞤤⹁ 𞤊𞤢𞤪𞤢𞤲𞤧𞤭…⹁ 𞤺𞤭𞤲𞤫𞤲𞤢𞥄𞤩𞤫 𞤩𞤫𞤲 𞤴𞤢𞤤𞤼𞤵𞤲𞤮 𞤤𞤭𞤣𞥆𞤢𞤺𞤮𞤤 𞤱𞤢𞤴𞤤𞤮 𞤣𞤮𞤧𞤼𞤫𞤪𞤫 𞤲𞤣𞤫𞤲. 𞤑𞤢 𞤲𞤣𞤫𞤪 𞤤𞤫𞤴𞤣𞤭 𞤘𞤭𞤲𞤫⹁ 𞤼𞤢𞤱𞤼𞤭 𞤑𞤮𞤲𞤢𞥄𞤳𞤭𞤪𞤭⹁ 𞤷𞤢𞤫 𞤱𞤢𞤲𞤮 𞤑𞤭𞤲𞤣𞤭𞤴𞤢𞥄⹁ 𞤁𞤵𞤦𞤫𞤪𞤫𞤳𞤢𞥄⹁ 𞤚𞤫𞤤𞤫𞤥𞤫𞤤𞤫⹁ 𞤆𞤭𞤼𞤢⹁ 𞤃𞤢𞥄𞤥𞤵𞤲⹁ 𞤁𞤢𞥄𞤦𞤮𞤤𞤢𞥄⹁ 𞤂𞤢𞤦𞤫⹁ ….
𞤑𞤮𞤲𞥆𞤮⹁ 𞤼𞤫𞤤𞤫𞤲 𞤑𞤢𞤲𞤳𞤢𞤲⹁ 𞤴𞤭𞤥𞤩𞤫 𞤊𞤐𞤁𞤅 𞤩𞤫𞤲⹁ 𞤱𞤢𞥄𞤱𞤢𞥄𞤲𞤮 𞤴𞤢𞤤𞤼𞤵𞤣𞤫 𞤲𞤣𞤫 𞤼𞤢𞤱𞤲𞤮𞥅 𞤳𞤮 𞤴𞤭𞤥𞤩𞤫 𞤤𞤢𞥄𞤥𞤵 𞤲𞤺𞤵𞤲 𞤩𞤵𞤪𞤭 𞤯𞤵𞥅𞤯𞤵𞤣𞤫 𞤼𞤮𞤲. 𞤘𞤮𞤤𞥆𞤫 𞤫 𞤶𞤢𞤲𞤺𞤣𞤫 𞤣𞤢𞤪𞤢𞤲𞤮𞥅𞤳𞤭 𞤼𞤮𞤲. 𞤅𞤫𞤪𞤫𞤳𞤮𞤪𞤫 𞤳𞤢𞤲⹁ 𞤬𞤭𞥅 𞤳𞤢𞤤𞤢 𞤴𞤢𞤤𞤼𞤢𞥄𞤳𞤢 𞤴𞤢𞥄𞤧𞤭⹁ 𞤳𞤮𞤲𞤮 𞤺𞤮𞤤𞥆𞤫 𞤫 𞤲𞤶𞤢𞥄𞤺𞤮 𞤱𞤢𞤯𞤢𞥄𞤤𞤭.
𞤐𞤣𞤫𞥅 𞤻𞤢𞤤𞥆𞤢𞥄𞤲𞤣𞤫 𞤸𞤢𞤲𞤣𞤫 𞤦𞤢𞤯𞤼𞤭𞤲𞤭𞤪𞤭𞥅 𞤣𞤢𞤪𞤢𞤺𞤮𞤤 𞤺𞤮𞤤𞥆𞤫𞥅𞤶𞤭 𞤯𞤭𞤲 𞤫 𞤲𞤣𞤫𞤪 𞤤𞤫𞤴𞤣𞤭 𞤲𞤣𞤭𞤲. 𞤊𞤮𞤼𞤭 𞤳𞤢 𞤤𞤢𞥄𞤥𞤵⹁ 𞤥𞤢𞤤𞥆𞤢 𞤳𞤢 𞤲’𞤺𞤫𞤴𞤲𞤺𞤵 𞤫 𞤳𞤢 𞤶𞤢𞤲𞤺𞤣𞤫⹁ 𞤫 𞤯𞤫𞤴𞤢 𞤷𞤫𞤲𞤯𞤫 𞤸𞤫𞤣𞥆𞤭𞥅𞤯𞤫 𞤬𞤮𞤨⹁ 𞤼𞤫𞤲𞤼𞤭𞤲𞤭𞥅 𞤳𞤢 𞤤𞤢𞥄𞤥𞤮𞤪𞤣𞤫 𞤑𞤮𞤲𞤢𞥄𞤳𞤭𞤪𞤭. 𞤅𞤵𞤳𞤢𞥄𞤩𞤫 𞤱𞤮𞤪𞤩𞤫 𞤫 𞤪𞤫𞤱𞤩𞤫 𞤴𞤢𞤤𞤼𞤭𞥅 𞤬𞤮𞤼𞤢.
𞤳𞤮𞤲𞤮 𞤲𞤣𞤫 𞤩𞤫 𞤸𞤢𞤦𞥆𞤢𞤲𞤮𞥅𞤳𞤢 𞤩𞤫𞤲 𞤵𞤳𞥆𞤭𞤼𞤲𞤮𞥅⹁ 𞤯𞤵𞤲 𞤳𞤮 𞤖𞤋𞤏𞤌𞥅𞤇𞤉 𞤩𞤫𞤲⹁ 𞤫 𞤸𞤭𞤲𞤮 𞤤𞤫 𞤱𞤭𞤢𞤲𞤮 𞤩𞤫𞥅 𞤼𞤢𞤱𞤫𞤼𞤢𞥄𞤳𞤫⹁ 𞤩𞤫 𞤻𞤢𞤤𞥆𞤭 𞤪𞤢𞤯𞤮𞤲’𞤣𞤭𞤪𞤣𞤫 𞤫 𞤩𞤫𞥅 𞤴𞤢𞤤𞤼𞤵𞤩𞤫. 𞤍𞤵𞤲 𞤱𞤮𞤲𞤭 𞤧𞤢𞤦𞤵 𞤲𞤢𞤲𞤺𞤫𞤺𞤮𞤤 𞤧𞤵𞤳𞤢𞥄𞤩𞤫 𞤸𞤫𞥅𞤱𞤵𞤩𞤫. 𞤄𞤵𞤴 𞤫 𞤥𞤢𞤩𞥆𞤫 𞤦𞤢𞤪𞤥𞤭𞤲𞤢𞥄⹁ 𞤲𞤶𞤮𞤱𞤮 𞤱𞤢𞤪𞤢𞥄.
𞤐𞤺𞤮𞥅 𞤴𞤢𞤤𞤼𞤮 𞤸𞤢𞤲𞤣𞤫 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤴𞤭𞤥𞤩𞤫 𞤩𞤫𞤲 𞤲𞤮 𞤸𞤫𞤦𞤭𞤤𞤢𞤲𞤭𞥅 𞤬𞤭𞥅 𞤘𞤭𞤲𞤫.
𞤉 𞤶𞤮𞥅𞤲𞤭 𞤲𞤮𞤲⹁ 𞤯𞤵𞤲 𞤯𞤮𞤮 𞤤𞤢𞥄𞤼𞤭𞤳𞤫.
𞤑𞤮𞤲𞤮 𞤸𞤭𞤲𞤮 𞤲𞤺𞤮𞤰𞤭𞤲𞤭 𞤸𞤢𞥄 𞤶𞤮𞥅𞤲𞤭
𞤇𞤢𞤴 𞤲𞤮 𞤤𞤢𞤲𞤣𞤫𞥅𞤣𞤫 :
𞤅𞤭 𞤼𞤢𞤱𞤭𞥅 𞤲𞤣𞤫𞥅 𞤴𞤢𞤤𞤼𞤢𞤲𞤣𞤫 𞤯𞤮𞥅 𞤼𞤵𞤲 𞤴𞤮𞤲𞤭𞥅 𞤳𞤮 𞤣𞤢𞤪𞤼𞤭𞤲𞤢 𞤤𞤢𞥄𞤥𞤵 𞤲𞤺𞤵𞤲 𞤫 𞤱𞤢𞤯𞤵𞤺𞤮𞤤 𞤬𞤢𞥄𞤤𞤫 𞤥𞤢𞤩𞥆𞤫 𞤮𞤲؟
𞤃𞤢𞥄 𞤧𞤭 𞤼𞤢𞤱𞤲𞤮 𞤺𞤭𞤲𞤫𞤲𞤢𞥄𞤩𞤫 𞤩𞤫𞤲 𞤴𞤢𞤤𞤼𞤵𞤲𞤮 𞤩𞤵𞤪𞤭 𞤲𞤭𞥅⹁ 𞤸𞤮𞤤 𞤲𞤮 𞤱𞤢𞤢𞤴𞤲𞤮𞥅؟
𞤚𞤢𞤱𞤵 𞤧𞤭 𞤯𞤵𞤲 𞤶𞤮𞤳𞥆𞤭𞤪𞤢𞤴 𞤲𞤭𞥅 𞤸𞤢𞥄 𞤩𞤫 𞤸𞤫𞤩𞤢 𞤳𞤮 𞤩𞤫 𞤤𞤢𞤲𞤣𞤭𞥅 𞤳𞤮𞤲؟
𞤉 𞤧𞤭 𞤩𞤫 𞤶𞤢𞤩𞤢𞥄𞤤𞤭 𞤲𞤮𞤲⹁ 𞤸𞤮𞤤 𞤲𞤺𞤮𞤤 𞤤𞤢𞥄𞤱𞤮𞤤 𞤲𞤺𞤮𞤤 𞤩𞤫 𞤪𞤫𞤱𞤭𞤪𞤼𞤢 𞤳𞤢𞤣𞤭؟
𞤃𞤮𞤶𞤫𞤦𞤫𞤪𞤫 FNDC 𞤲𞤣𞤫𞤲 𞤸𞤮𞤤𞥆𞤭𞥅 𞤳𞤢𞤣𞤭⹁ 𞤱𞤮𞤲𞤣𞤫 𞤴𞤮 𞤴𞤭𞤥𞤩𞤫 𞤩𞤫𞤲 𞤬𞤮𞤨 𞤴𞤢𞤤𞤼𞤵 𞤳𞤢𞤣𞤭 𞤫 𞤥𞤢𞤱𞤦𞤢𞥄𞤪𞤫 𞤥𞤢𞤤𞥆𞤢 𞤼𞤢𞤤𞤢𞥄𞤼𞤢⹁ 𞤱𞤮𞤼𞤢 𞤩𞤫 𞤣𞤢𞤪𞤲𞤵 𞤸𞤢𞥄 𞤤𞤢𞥄𞤥𞤵 𞤲𞤺𞤵𞤲 𞤱𞤵𞤪𞤼𞤢 𞤲𞤣𞤫𞥅 𞤬𞤫𞤸𞤪𞤫 𞤦𞤮𞤲𞥆𞤢𞤴𞤲𞤣𞤫 𞤤𞤫𞤴𞤣𞤭 𞤲𞤣𞤭𞤲.
𞤑𞤓𞤍𞤌𞤂: 𞤖𞤀𞤗𞥆𞤋 𞤏𞤀𞤂𞥆𞤌𞥅𞤏𞤌
𞤌𞤲 𞤶𞤢𞥄𞤪𞤢𞥄𞤥𞤢