𞤇𞤫𞥅 𞤺𞤢𞤴𞤲𞤭𞥅 𞤴𞤫𞥅𞤴𞤵𞤣𞤫 𞤶𞤢𞤱𞤤𞤫 𞤥𞤫𞤲 𞤯𞤫𞤲

Si vous n’avez pas Android 8, cliquez ici

𞤐𞤣𞤫 𞤫𞤩𞤫 𞤱𞤫𞤤𞤧𞤭𞤲𞤣𞤭𞤲𞤭𞤪𞤢 𞤫𞤲 𞤣𞤢𞤱𞤪𞤮 𞤫 𞤣𞤭𞥅𞤧𞤮𞤲’𞤣𞤭𞤪𞤢𞤤 𞤸𞤮𞥅𞤪𞤫 𞤥𞤫𞤸𞤪𞤫⹁ 𞤫𞤩𞤫 𞤶𞤮𞤳𞥆𞤭⹁ 𞤫𞤩𞤫 𞤱𞤢𞤲𞤼𞤢 𞤤𞤫𞤴𞤯𞤫 𞤥𞤫𞤲 𞤯𞤫𞤲. 𞤊𞤫𞤱𞤲𞤣𞤮 𞤳𞤢 𞤸𞤭𞤤𞤲𞤭 𞤯𞤫𞤲 𞤯𞤮𞤲 𞤱𞤫𞤲𞤶𞤮𞤲’𞤣𞤭𞤪𞤮⹁ 𞤩𞤫 𞤺𞤢𞤴𞤲𞤭𞥅 𞤴𞤫𞥅𞤴𞤵𞤣𞤫 𞤧𞤫𞤸𞤪𞤫 𞤐𞤭𞤥𞤦𞤢𞥄 𞤲𞤣𞤫𞤲. 𞤉𞤩𞤫 𞤧𞤢𞥄𞤼𞤭𞤲𞤭 𞤳𞤢𞤣𞤭 𞤴𞤫𞥅𞤴𞤵𞤺𞤮𞤤 𞤅𞤭𞤥𞤢𞤲𞤣𞤵 𞤫 𞤯𞤫𞥅 𞤦𞤢𞥄𞤤𞤯𞤫.

𞤐𞤣𞤭𞤺𞤢 𞤮 𞤤𞤢𞥄𞤥𞤭𞥅⹁ 𞤀𞤤𞤬𞤢𞥄 𞤑𞤮𞤲𞤣𞤫 𞤲𞤮 𞤱𞤭𞤢 𞤫𞤲 𞤱𞤮𞤲𞤣𞤫 𞤳𞤮 𞤣𞤫𞤥𞤢𞤤 𞤩𞤢𞤲𞤼𞤢𞤼𞤢 𞤤𞤫𞤴𞤣𞤭. 𞤉 𞤖𞤭𞤲𞤮 𞤤𞤫⹁ 𞤢𞤣𞤮 𞤮 𞤤𞤢𞥄𞤥𞤢𞥄𞤣𞤫⹁ 𞤘𞤭𞤲𞤫 𞤳𞤮 𞤼𞤮𞥅𞤲𞤶𞤭 𞤣𞤵𞤦𞤵𞥅𞤶𞤫 𞥑𞥕 𞤤𞤫𞤴𞤣𞤭 𞤬𞤵𞤺𞤢𞤲 𞤴𞤫𞥅𞤴𞤢𞤴𞤲𞤮𞥅. 𞤑𞤮𞤲𞤮 𞤶𞤮𞥅𞤲𞤭⹁ 𞤤𞤢𞥄𞤥𞤯𞤮 𞤮𞤲 𞤳𞤮 𞤱𞤢𞤧𞤮𞤪𞤼𞤢⹁ 𞤳𞤮 𞤼𞤮𞥅𞤲𞤶𞤭 𞤣𞤵𞤦𞤵𞥅𞤶𞤫 𞥖𞥐 𞤬𞤵𞤺𞤢𞤲 𞤴𞤢𞤤𞤼𞤢𞤴 𞤯𞤵𞤲 𞤘𞤭𞤲𞤫 𞤸𞤭𞤼𞤢𞥄𞤲𞤣𞤫 𞤳𞤢𞤤𞤢. 𞤖𞤮𞤤 𞤼𞤮 𞤲𞤢𞤬𞤮𞥅𞤪𞤫 𞤯𞤵𞤲 𞤱𞤮𞤲𞤭؟ 𞤏𞤮𞤲𞤢𞥄 𞤤𞤢𞥄𞤱𞤭 𞤥𞤮𞤰𞥆𞤭⹁ 𞤱𞤮𞤲𞤢𞥄 𞤲𞤣𞤭𞤴𞤢𞤲 𞤤𞤢𞥄𞤩𞤵𞤯𞤢𞤲⹁ 𞤱𞤮𞤲𞤢𞥄 𞤤𞤫 𞤳𞤢𞤣𞤭 𞤷𞤢𞤸𞤫 𞤤𞤢𞥄𞤩𞤵𞤯𞤫. 

𞤘𞤭𞤤𞤢 𞤮 𞤤𞤢𞥄𞤥𞤭𞥅⹁ 𞤣𞤵𞤽𞤢𞤴𞤫𞥅𞤶𞤭 𞤳𞤫𞥅𞤱𞤵𞤯𞤭 𞤶𞤮𞤺𞤲𞤢𞥄𞤥𞤢 𞤴𞤭𞤥𞤩𞤫 𞤯𞤵𞥅𞤯𞤵𞤩𞤫 𞤬𞤭𞥅 𞤴𞤢𞤤𞤼𞤭𞤲𞤺𞤮𞤤 𞤶𞤢𞤱𞤤𞤫 𞤤𞤫𞤴𞤣𞤭 𞤲𞤣𞤭𞤲. 𞤑𞤮𞤲𞤮 𞤯𞤵𞤲 𞤸𞤢𞤯𞤢𞥄𞤤𞤭 𞤼𞤢𞤥𞤨𞤫𞤪𞤫 𞤲𞤣𞤫𞤲 𞤲𞤮 𞤼𞤢𞤦𞤭𞤼𞤭 𞤫 𞤤𞤫𞤴𞤣𞤭 𞤲𞤣𞤭𞤲. 𞤑𞤮 𞤴𞤮𞤺𞤢𞥄𞤩𞤫 𞤼𞤢𞤲 𞤸𞤵𞤩𞤭𞤼𞤵𞤩𞤫 𞤤𞤢𞥄𞤥𞤵 𞤲𞤺𞤵𞤲 𞤱𞤮𞤲𞤭 𞤲𞤢𞤬𞤭𞤼𞤮𞤪𞤣𞤫 𞤯𞤫𞥅 𞤶𞤢𞤱𞤤𞤫. 

𞤑𞤮 𞤳𞤢𞤥𞤩𞤫 𞤳𞤢𞤣𞤭 𞤸𞤢𞤩𞥆𞤭𞥅 𞤱𞤮𞤲𞤣𞤫 𞤣𞤮𞤧𞤼𞤫𞤪𞤫 𞤲𞤣𞤫𞤲 𞤥𞤢𞤤𞥆𞤢 𞤧𞤢𞤪𞤭𞤴𞤢 𞤥𞤢𞤱𞤳𞤢 𞤳𞤢𞤲 𞤱𞤢𞤴𞤤𞤫𞤼𞤫 𞤬𞤭𞥅 𞤲𞤮 𞤀𞤤𞤬𞤢𞥄 𞤑𞤮𞤲𞤣𞤫 𞤸𞤫𞤣𞥆𞤮𞤪𞤢 𞤳𞤢 𞤤𞤢𞥄𞤥𞤵 𞤫 𞤬𞤭𞥅 𞤲𞤮 𞤺𞤫𞤯𞤼𞤢𞥄𞤲𞤯𞤫 (𞤫𞤲𞤼𞤫𞤪𞤫𞥅𞤶𞤭) 𞤥𞤢𞤩𞥆𞤫 𞤣𞤢𞤯𞤭𞤪𞤢. 𞤑𞤮𞤲𞤮 𞤻𞤢𞤤𞤲𞤣𞤫 𞤩𞤫 𞤢𞤲𞤣𞤭 𞤱𞤮𞤲𞤣𞤫 𞤯𞤵𞤲 𞤢𞤤𞤢𞥄 𞤤𞤢𞥄𞤼𞤢𞥄𞤣𞤫⹁ 𞤩𞤫 𞤼𞤢𞤱𞤫𞤼𞤫 𞤫 𞤢𞤣𞤮𞤼𞤮𞥅𞤩𞤫 𞤱𞤮𞤨𞥆𞤵𞤣𞤫 𞤲𞤣𞤫𞤲 𞤬𞤫𞤸𞤪𞤫 𞤬𞤭𞥅 𞤲𞤮 𞤩𞤫 𞤸𞤫𞤩𞤭𞤪𞤢 𞤶𞤮𞤲𞤣𞤫 𞤳𞤢 𞤤𞤮𞤲𞤼𞤮𞤼𞤮𞥅𞤩𞤫 𞤩𞤫𞤲. 𞤑𞤮⹁ 𞤲𞤮 𞤸𞤢𞥄𞤶𞤵 𞤥𞤢𞤩𞥆𞤫 𞤺𞤢𞤧𞤭𞤪𞤢 𞤼𞤢𞤲 𞤩𞤫 𞤸𞤭𞤤𞤲𞤭𞥅⹁ 𞤱𞤮𞤲𞤢𞥄 𞤳𞤮 𞤲𞤢𞤬𞤢𞤼𞤢 𞤤𞤫𞤴𞤣𞤭 𞤲𞤣𞤭𞤲 𞤥𞤢𞥄𞤨𞤭𞤲𞤭 𞤩𞤫.  

𞤑𞤮 𞤳𞤢𞤬𞤺𞤢𞤤 (𞤳𞤮𞤥𞤨𞤢𞤻𞤭𞥅) 𞤱𞤭𞤫𞤼𞤫𞥅𞤲𞤺𞤢𞤤 HPX⹁ 𞤲𞤺𞤢𞤤 𞤶𞤫𞤴𞤭 𞤯𞤵𞤲 𞤈𞤮𞤦𞤫𞥅𞤪 𞤊𞤪𞤭𞤣𞤤𞤢𞤲𞤣⹁ 𞤳𞤢𞤲𞤢𞤣𞤢𞥄𞤶𞤮⹁ 𞤱𞤮𞤲𞤭 𞤳𞤮 𞤧𞤮𞥅𞤣𞤭𞤼𞤭 𞤅𞤫𞤸𞤪𞤫 𞤐𞤭𞤥𞤦𞤢𞥄 𞤲𞤣𞤫𞤲. 𞤉 𞤲𞤣𞤫𞤪 𞤬𞤮𞤼𞥆𞤭𞥅𞤺𞤢𞤤 𞤥𞤢𞤩𞥆𞤫⹁ 𞤘𞤭𞤲𞤫 𞤳𞤮 𞥑𞥕% 𞤸𞤫𞤩𞤢𞤼𞤢. 𞤑𞤢𞤬𞤺𞤢𞤤 𞤲𞤺𞤢𞤤 𞤸𞤫𞤣𞥆𞤮𞤣𞤢 𞤫 𞥘𞥕%. 𞤑𞤮 𞤯𞤵𞤲 𞤬𞤭𞤪𞤼𞤭⹁ 𞤧𞤭 𞤶𞤢𞤱𞤤𞤫 𞤐𞤭𞤥𞤦𞤢𞥄 𞤯𞤫𞤲 𞤱𞤢𞤯𞤢𞥄𞤥𞤢 𞤺𞤫𞤩𞤫 𞤧𞤢𞤨𞥆𞤮 (𞥑𞥐)⹁ 𞤺𞤭𞤲𞤫 𞤳𞤮 𞤺𞤫𞤩𞤢𞤤 𞤺𞤮𞥅𞤼𞤢𞤤 𞤫 𞤬𞤫𞤷𞥆𞤫𞤪𞤫 𞤸𞤫𞤲𞤣𞤮𞤼𞤮𞥅⹁ HPX 𞤸𞤫𞤲𞤣𞤮𞥅 𞤺𞤫𞤩𞤫 𞤶𞤫𞥅𞤼𞤢𞤼𞤭 𞤫 𞤬𞤫𞤷𞥆𞤫𞤪𞤫.

𞤔𞤢𞤱𞤣𞤭 𞤅𞤫𞤸𞤪𞤫 𞤐𞤭𞤥𞤦𞤢 𞤲𞤣𞤫𞤲⹁ 𞤱𞤮𞤲𞤢𞥄 𞤲𞤶𞤢𞤲𞤣𞤭 𞤼𞤵𞤲. 𞤐𞤮 𞤫 𞤲𞤣𞤫𞥅 𞤧𞤫𞤸𞤪𞤫 𞤳𞤵𞤤𞥆𞤫 𞤫 𞤨𞤵𞤯𞤭 𞤳𞤮 𞤴𞤭𞤫𞤼𞤢𞥄𞤳𞤫 𞤸𞤢𞤴 𞤲𞤮𞤳𞥆𞤵. 𞤏𞤢𞤲𞤮 𞤦𞤢𞥄𞤯𞤭 𞤼𞤮𞤳𞥆𞤢𞤴𞤯𞤭 𞤫𞤲𞤯𞤢𞤲⹁ 𞤳𞤢𞤻𞤵𞤲 𞤫 𞤨𞤢𞥄𞤦𞤭 𞤥𞤢𞤤𞥆𞤢 𞤼𞤮𞤼𞤭𞥅𞤶𞤭 𞤶𞤭𞤦𞤭𞤲𞤢𞤴𞤯𞤭. 𞤍𞤭𞥅 𞤨𞤢𞥄𞤦𞤭 𞤯𞤮𞥅 𞤶𞤮𞥅𞤪𞤢𞤼𞤢𞥄 𞤦𞤮𞥅𞤬𞤮 𞤱𞤢𞤲𞤮 𞤼𞤮𞤼𞤭𞥅𞤶𞤭 𞤸𞤫𞤣𞥆𞤭𞥅𞤯𞤭 𞤯𞤭𞤲. 𞤑𞤮 𞤯𞤵𞤲 𞤱𞤢𞤯𞤭 𞤧𞤭 𞤐𞤭𞤥𞤦𞤢𞥄 𞤲𞤮 𞤼𞤢𞤱𞤢𞥄 𞤫 𞤲𞤣𞤮𞤲𞤣𞤭 𞤢𞤣𞤵𞤲𞤢𞤴𞤢𞤲𞤳𞤮𞥅𞤪𞤭 𞤋𞤲𞤫𞤧𞤳𞤮𞥅 𞤲𞤣𞤭𞤲. 𞤅𞤭 𞤬𞤫𞤤𞥆𞤮 𞤲𞤺𞤮𞤲 𞤶𞤢𞤧𞤢𞥄𞤥𞤢⹁ 𞤯𞤫𞤲 𞤳𞤵𞤤𞥆𞤫 𞤫 𞤯𞤭𞤲 𞤨𞤵𞤯𞤭 𞤬𞤮𞤨⹁ 𞤴𞤫𞥅𞤦𞤮𞤼𞤮.

𞤑𞤵𞤯𞤮𞤤 𞤀𞤦𞤣𞤵𞤤𞤢𞥄𞤸𞤭 𞤔 𞤄𞤢𞤪𞤭