𞤂𞤉𞤒𞤍𞤉 𞤅𞤀𞥄𞤖𞤀𞤂 𞤍𞤉𞤐 𞤊𞤋𞤇𞤋𞥅 𞤅𞤌𞤈𞤚𞤀𞤘𞤌𞤂 𞤉 𞤁𞤉𞤐𞤘𞤖𞤀

𞤔𞤵𞤲𞥆𞤭𞤼𞤫 𞤅𞤮𞥅𞤪𞤭 𞤷𞤭𞤤𞤭𞥅𞤯𞤫 𞤤𞤢𞥄𞤥𞤵 𞤫 𞤤𞤫𞤧𞤯𞤫 𞤸𞤵𞥅𞤩𞤭𞤼𞤢𞥄𞤯𞤫 𞤄𞤵𞤪𞤳𞤭𞤲𞤢⹁ 𞤃𞤢𞤤𞤭 𞤫 𞤐𞤭𞥅𞤶𞤫𞤪 𞤯𞤫𞤲⹁ 𞤬𞤭𞤩𞤭𞥅 𞤧𞤮𞤪𞤼𞤢𞤺𞤮𞤤 𞤳𞤭𞤧𞤢𞤲 𞤫 𞤁𞤫𞤲𞤼𞤢𞤤 𞤐𞤘𞤢𞤤𞤵𞤲𞤳𞤫𞤱𞤢𞤤 𞤘𞤫𞤲𞤯𞤫 𞤖𞤭𞥅𞤪𞤲𞤢 𞤀𞤬𞤪𞤭𞤳 (𞤁𞤉𞤐𞤘𞤖𞤀 -ECOWAS – CEDEAO).

𞤑𞤮 𞤸𞤢𞤲𞤣𞤫 𞤫 𞤈𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥒𞥘 𞤅𞤭𞥅𞤤𞤮⹁ 𞤳𞤮𞤤𞥆𞤭𞤼𞤢𞤤 𞤲𞤺𞤢𞤤 𞤴𞤢𞤤𞤼𞤭. 𞤑𞤮 𞤶𞤢𞥄𞤺𞤮𞤪𞤢𞥄𞤯𞤮 𞤃𞤢𞤤𞤭 𞤮𞤲 𞤳𞤢 𞤥𞤵𞤪𞤢𞥄𞤯𞤭 𞤶𞤢𞤲𞤢𞤲𞤭 𞤶𞤢𞤲𞤺𞤭 𞤳𞤮𞤤𞥆𞤭𞤼𞤢𞤤 𞤲𞤺𞤢𞤤 𞤫 𞤭𞤲𞤣𞤫 𞤣𞤫𞤲𞤼𞤢𞤤 𞤯𞤫𞥅 𞤤𞤫𞤧𞤯𞤫 𞤅𞤢𞥄𞤸𞤢𞤤 𞤼𞤢𞤼𞤭.

𞤅𞤭 𞤲𞤣𞤫 𞤼𞤢𞤦𞤭𞤼𞤭𞥅⹁ 𞤲𞤣𞤫𞥅 𞤬𞤭𞤩𞤪𞤫 𞤦𞤢𞤯𞤼𞤭𞤲𞤭𞤪𞤢𞤴 𞤲𞤮 𞤥𞤢𞤱𞤲𞤭𞤪𞤭 𞤸𞤮𞥅𞤪𞤫 𞤴𞤭𞥅𞤤𞤮 𞤴𞤭𞤥𞤩𞤫 𞤫 𞤨𞤭𞥅𞤶𞤭 𞤸𞤢𞤳𞥆𞤵𞤲𞤣𞤫 𞤯𞤫𞥅 𞤤𞤫𞤴𞤯𞤫 𞤼𞤢𞤼𞤭 𞤫 𞤤𞤫𞤴𞤯𞤫 𞤸𞤭𞥅𞤪𞤲𞤢 𞤀𞤬𞤪𞤭𞤳 𞤸𞤫𞤣𞥆𞤭𞥅𞤯𞤫 𞤫 𞤁𞤫𞤲𞤺𞤸𞤢 𞤯𞤫𞤲. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤁𞤫𞤲𞤺𞤸𞤢 𞤲𞤮 𞤥𞤢𞤪𞤭 𞤧𞤢𞤪𞤼𞤭𞥅𞤶𞤭 𞤯𞤭 𞤤𞤫𞤴𞤣𞤭 𞤳𞤢𞤤𞤢 𞤬𞤢𞥄𞤤𞤢𞥄𞤲𞤣𞤭 𞤴𞤢𞤤𞤼𞤵𞤣𞤫 𞤸𞤢𞥄𞤲𞤭 𞤼𞤮𞤼𞥆𞤵𞤣𞤫 𞤧𞤭 𞤴𞤢𞤤𞤼𞤢.

𞤑𞤢𞤤𞤢 𞤤𞤫𞤴𞤣𞤭 𞤬𞤢𞥄𞤤𞤢𞥄𞤲𞤣𞤭 𞤴𞤢𞤤𞤼𞤵𞤣𞤫 𞤲𞤮 𞤸𞤢𞥄𞤲𞤭 𞤸𞤮𞤤𞥆𞤭𞤼𞤵𞤣𞤫 𞤴𞤭𞥅𞤤𞤭𞤪𞤣𞤫 𞤁𞤉𞤐𞤘𞤖𞤀 𞤲𞤣𞤫𞤲 𞤸𞤭𞤼𞤢𞥄𞤲𞤣𞤫 𞤢𞤣𞤮. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤫 𞤲𞤣𞤫𞤪 𞤲𞤣𞤫𞤲 𞤸𞤭𞤼𞤢𞥄𞤲𞤣𞤫⹁ 𞤤𞤫𞤴𞤣𞤭 𞤬𞤢𞥄𞤤𞤢𞥄𞤲𞤣𞤭 𞤴𞤢𞤤𞤼𞤵𞤣𞤫 𞤲𞤣𞤭𞤲 𞤲𞤮 𞤸𞤢𞥄𞤲𞤭 𞤼𞤮𞤼𞥆𞤵𞤣𞤫 𞤻𞤭𞥅𞤩𞤲𞤢 𞤧𞤢𞤪𞤼𞤭𞥅𞤶𞤭 𞤁𞤉𞤐𞤘𞤖𞤀 𞤯𞤭𞤲 𞤬𞤮𞤨.

𞤑𞤮𞤲𞤮 𞤢𞤪𞤣𞤭𞥅𞤩𞤫 𞤁𞤉𞤐𞤘𞤖𞤀 𞤩𞤫𞤲 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤳𞤮 𞤲𞤮 𞤬𞤮𞤨 𞤲𞤢𞤲𞤭𞤪𞤭⹁ 𞤴𞤭𞤭𞤪𞤭 𞤳𞤮𞤤𞥆𞤭𞤼𞤢𞤤 𞤲𞤺𞤢𞤤 𞤲𞤮 𞤶𞤢𞤲𞤺𞤫𞥅 𞤳𞤢 𞤰𞤫𞤱𞤤𞤭 𞤩𞤫 𞤸𞤵𞤥𞤨𞤭𞤼𞤮𞤪𞤭 𞤳𞤢𞤥𞤩𞤫 𞤳𞤢𞤣𞤭. 𞤘𞤮𞥅𞤥𞤵 𞤁𞤉𞤐𞤘𞤖𞤀 𞤲𞤺𞤵𞤲 𞤸𞤮𞤤𞥆𞤭𞤼𞤭𞥅 𞤱𞤮𞤲𞤣𞤫𞤥𞤢 𞤩𞤫 𞤸𞤫𞤲𞤣𞤢𞥄𞤳𞤭 𞤩𞤢𞤼𞤢𞥄𞤳𞤵𞤪𞤵 𞤤𞤢𞤲𞤣𞤮𞤪𞤣𞤵 𞤴𞤢𞤤𞤼𞤢𞤤 𞤭𞤥𞥆𞤮𞤪𞤣𞤫 𞤫 𞤯𞤫𞥅 𞤤𞤫𞤧𞤯𞤫 𞤼𞤢𞤼𞤭.

𞤐𞤮 𞤱𞤢𞥄𞤱𞤭 𞤱𞤮𞤲𞤣𞤫 𞤸𞤢𞤪𞤢 𞤯𞤫𞥅 𞤤𞤫𞤧𞤯𞤫⹁ 𞤳𞤮 𞤲𞤮 𞤯𞤫 𞤻𞤮𞤰𞥆𞤭𞤪𞤢 𞤁𞤉𞤐𞤘𞤖𞤀⹁ 𞤯𞤫 𞤭𞤥𞥆𞤮𞤪𞤭 𞤬𞤭𞥅 𞤲𞤮 𞤁𞤉𞤐𞤘𞤖𞤀 𞤸𞤮𞤴𞤲𞤭𞤪𞤢 𞤶𞤵𞤳𞥆𞤫 𞤯𞤫𞤲 𞤸𞤮𞥅𞤪𞤫 𞤥𞤢𞤶𞥆𞤫. 𞤘𞤭𞤦𞤭 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤱𞤢𞤴𞤤𞤭𞤼𞤭𞤪𞤭 𞤣𞤮𞥅𞤤𞤫 𞤶𞤢𞥄𞤺𞤮𞤪𞤯𞤫 𞤯𞤫𞤲 𞤫 𞤲𞤣𞤫𞤪 𞤯𞤫 𞤤𞤫𞤧𞤯𞤫⹁ 𞤁𞤉𞤐𞤘𞤖𞤀 𞤲𞤮 𞤬𞤢𞤱𞤭 𞤯𞤫 𞤶𞤵𞤳𞥆𞤫.

𞤅𞤮 𞤼𞤢𞤱𞤵𞤲𞤮 𞤳𞤮 𞤫 𞤧𞤮𞥅𞤦𞤫𞥅 𞤯𞤫 𞤱𞤮𞤲𞤵𞤲𞤮𞥅⹁ 𞤯𞤫𞥅 𞤤𞤫𞤧𞤯𞤫 𞤱𞤭𞤲𞤣𞤢𞤲𞤢𞤴𞤲𞤮 𞤁𞤉𞤐𞤘𞤖𞤢 𞤩𞤢𞤼𞤢𞥄𞤳𞤵𞤪𞤵⹁ 𞤢𞤲𞤣𞤭𞤲𞤢 𞤥𞤮𞤶𞤮𞤦𞤫𞤪𞤫 𞤲𞤣𞤫𞤲 𞤬𞤢𞥄𞤤𞤫 𞤧𞤮𞤪𞤼𞤢𞤺𞤮𞤤 𞤫 𞤁𞤉𞤐𞤘𞤖𞤀. 𞤅𞤮 𞤼𞤢𞤱𞤭𞥅 𞤯𞤫 𞤱𞤢𞤯𞤢𞥄𞤤𞤭 𞤯𞤵𞤲⹁ 𞤳𞤮 𞤲𞤮 𞤯𞤫 𞤦𞤢𞤼𞤭𞤪𞤢 (𞤲𞤫𞤺𞤮𞤧𞤭𞤴𞤭𞤪𞤢) 𞤯𞤫 𞤱𞤮𞤲𞤭 𞤯𞤢𞤩𞥆𞤵𞤣𞤫.

𞤅𞤭 𞤯𞤫𞥅 𞤤𞤫𞤧𞤯𞤫 𞤼𞤢𞤦𞤭𞤲𞤼𞤭𞤲𞤭𞥅 𞤧𞤮𞤪𞤼𞤢𞤺𞤮𞤤 𞤥𞤢𞤶𞥆𞤫⹁ 𞤯𞤵𞤥 𞤥𞤮𞤰𞥆𞤢𞤲𞤢𞥄 𞤴𞤭𞤥𞤩𞤫 𞤥𞤢𞤶𞥆𞤫. 𞤒𞤭𞤥𞤩𞤫 𞤯𞤫𞥅 𞤤𞤫𞤴𞤯𞤫 𞤲𞤮 𞤴𞤢𞤤𞤼𞤭 𞤬𞤮𞤼𞤢 𞤸𞤮𞤯𞤮𞤴𞤭𞥅 𞤫 𞤯𞤫𞤴𞤢 𞤤𞤫𞤴𞤯𞤫. 𞤄𞤵𞤪𞤳𞤭𞤲𞤢𞥄𞤩𞤫 𞤫 𞤃𞤢𞤤𞤭𞤲𞤢𞥄𞤩𞤫 𞤯𞤵𞥅𞤯𞤭 𞤬𞤮𞤼𞤢 𞤫 𞤲𞤣𞤫𞤪 𞤑𞤮𞤼𞤣𞤭𞤾𞤢𞤪. 𞤲𞤭𞥅𞤶𞤫𞤪𞤲𞤢𞥄𞤩𞤫 𞤩𞤫𞤲 𞤳𞤢𞤣𞤭 𞤲𞤮 𞤯𞤵𞥅𞤯𞤭 𞤐𞤢𞤶𞤫𞤪𞤭𞤴𞤢 𞤫 𞤑𞤮𞤼𞤣𞤭𞤱𞤢𞤪. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤯𞤫𞥅 𞤤𞤫𞤴𞤯𞤫 𞤢𞤤𞤢𞥄 𞤵𞤣𞥆𞤭𞤼𞤢𞤤 𞤳𞤢 𞤦𞤢𞤸𞤢𞤪𞤵.

𞤐𞤮 𞤸𞤢𞥄𞤲𞤭 𞤧𞤮 𞤼𞤢𞤱𞤭𞥅 𞤯𞤫𞥅 𞤤𞤫𞤴𞤯𞤫 𞤧𞤮𞤪𞤼𞤮𞤼𞤮 𞤫 𞤲𞤶𞤵𞤩𞥆𞤵𞤣𞤭 𞤸𞤭𞥅𞤪𞤲𞤢 𞤀𞤬𞤪𞤭𞤳 𞤲𞤣𞤭𞤲⹁ 𞤳𞤮 𞤤𞤢𞥄𞤥𞤩𞤫 𞤩𞤫 𞤴𞤭𞤥𞤩𞤫 𞤤𞤫𞤴𞤣𞤭 𞤲𞤣𞤭𞤲 𞤧𞤵𞤩𞤭𞥅 𞤸𞤢𞥄𞤲𞤭 𞤬𞤫𞤱𞤶𞤵𞤣𞤫 𞤯𞤵𞤥. 𞤖𞤢𞤪𞤢 𞤱𞤮𞤲𞤢𞥄 𞤰𞤫𞤼𞥆𞤭𞤪𞤩𞤫 𞤤𞤢𞥄𞤥𞤵 𞤲𞤺𞤵𞤲 𞤣𞤮𞥅𞤤𞤫.