𞤊𞤀𞤐𞤘𞤀 𞤁𞤀𞤃𞥆𞤀𞥄: 𞤑𞤋𞤆𞥆𞤌𞤂 𞤃𞤋𞤅𞤈𞤀 𞤐𞤌 𞤖𞤋𞤈𞤅𞤋 𞤐𞤀𞤘𞥆𞤉

𞤔𞤢𞤳𞤢 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤳𞤢 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤲𞤮 𞤱𞤵𞤤𞤭⹁ 𞤲𞤮 𞤥𞤢𞥄𞤨𞤭𞤲𞤭. 𞤖𞤮𞥅𞤪𞤫𞥅𞤩𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤃𞤭𞤧𞤪𞤢 𞤩𞤫𞤲 𞤲𞤮 𞤸𞤭𞤪𞤧𞤭 𞤲𞤢𞤺𞥆𞤫 𞤭𞤼𞥆𞤭 𞤼𞤫𞥅𞤱𞤵 𞤲𞤺𞤵𞤲 𞤧𞤢𞤣𞤢𞤳𞤢 𞤬𞤭𞥅 𞤴𞤮 𞤳𞤭𞤨𞥆𞤮𞤤 𞤥𞤢𞤩𞥆𞤫 𞤲𞤺𞤮𞤤 𞤥𞤢𞤤𞤵. 𞤐𞤺𞤮𞥅𞤤 𞤑𞤭𞤨𞥆𞤮𞤤 𞤲𞤺𞤮𞤤 𞤬𞤮𞥅𞤤𞤢𞥄𞤤𞤭 𞤸𞤢𞤴 𞤲𞤣𞤫 𞤱𞤮𞥅𞤼𞤫𞤪𞤫 𞤼𞤢𞤸𞤮 𞤺𞤭𞤦𞤭 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲 𞤬𞤵𞤯𞥆𞤭 𞤸𞤭𞤳𞥆𞤢.

𞤑𞤮 𞤯𞤭𞥅 𞤊𞤭𞤪𞥇𞤢𞤱𞤲𞤢𞥄𞤶𞤭 𞤃𞤋𞤅𞤈𞤀 𞤳𞤢𞤻𞤵𞤲 𞤫 𞤄𞤵𞥅𞤼𞤮𞥅𞤶𞤭 𞤑𞤌𞤐𞤘𞤌 𞤁𞤋𞥅𞤅𞤌𞤁𞤀𞥄𞤈𞤋 𞤯𞤭𞤲 𞤱𞤮𞤲𞤭 𞤳𞤭𞤨𞥆𞤭 𞤤𞤵𞤥𞤦𞤵𞤯𞤭 𞤳𞤢 𞤶𞤫𞥅𞤼𞤢𞤩𞤢𞤤 𞤸𞤢𞤪𞤢 𞤬𞤮𞥅𞤤𞤢𞥄𞤤𞤭 𞤸𞤢𞤴 𞤳𞤭𞤨𞥆𞤮𞤤 𞤺𞤮𞥅𞤼𞤮𞤤.

𞤑𞤢 𞤬𞤭𞤶𞤮 𞤣𞤫𞤲𞤼𞤫⹁ 𞤳𞤮 𞤃𞤋𞤅𞤈𞤀 𞤫 𞤘𞤀𞤐𞤀⹁ 𞤉 𞤃𞤌𞤟𞤀𞤃𞤄𞤋𞤑 𞤉 𞤑𞤀𞤆 𞤏𞤉𞤈𞤁𞤉 𞤸𞤢𞤱𞤼𞤵𞤲𞤮𞥅 𞤣𞤫𞤲𞤼𞤢𞤤. 𞤉 𞤬𞤭𞤶𞤢𞤲𞤯𞤫 𞤯𞤫𞤲 𞤼𞤢𞤼𞤭 𞤳𞤢𞤤𞤢⹁ 𞤳𞤮 𞤸𞤮𞥅𞤪𞤫 𞥒-𞥒 𞤩𞤫 𞤧𞤫𞥅𞤪𞤼𞤭. 𞤀𞤥𞥆𞤢𞥄 𞤲𞤮𞤲 𞤑𞤌𞤐𞤘𞤌⹁ 𞤳𞤮 𞤳𞤢𞤥𞤩𞤫 𞤫 𞤟𞤀𞤃𞤄𞤋𞤒𞤀 (𞥑 -𞥑) 𞤳𞤢𞤻𞤵𞤲 𞤫 𞤃𞤀𞤈𞤌𞤑 (𞥑- 𞥑) 𞤫 𞤚𞤀𞤐𞤅𞤀𞤐𞤋𞤒𞤀 (𞥐 -𞥐) 𞤸𞤢𞤱𞤪𞤵𞤲𞤮𞥅.

𞤔𞤢𞤲𞤺𞤮 𞤫 𞤈𞤫𞤬𞤦𞤭𞤪𞥆𞤫⹁ 𞤳𞤮 𞤯𞤭𞥅 𞤳𞤭𞤨𞥆𞤭 𞤯𞤭𞤯𞤭 𞤯𞤭 𞤬𞤮𞥅𞤤𞤢𞥄𞤲𞤭 𞤸𞤢𞤴 𞤸𞤢𞤪𞤮 𞤥𞤵𞥅𞤯𞤵𞤲 𞤱𞤮𞥅𞤼𞤮 𞤧𞤢𞥄𞤼𞤭𞥅 𞤬𞤭𞤶𞤵𞤺𞤮𞤤 𞤼𞤮 𞤧𞤢𞤸𞤪𞤫 𞤅𞤀𞤐 𞤆𞤉𞤁𞤌𞤈𞤌. 𞤐𞤣𞤫𞤲 𞤻𞤢𞤤𞤲𞤣𞤫 𞤳𞤮 𞤦𞤫𞥅 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤬𞤮𞥅𞤤𞤢. 𞤐𞤢𞤲𞤣𞤭 𞤳𞤮 𞤳𞤵𞤤𞤮𞤤 𞤯𞤵𞤥⹁ 𞤱𞤢𞤯𞤭 𞤧𞤭 𞤢𞤪𞤣𞤭𞥅𞤩𞤫 𞤃𞤋𞤅𞤈𞤀 𞤩𞤫𞤲 𞤳𞤢 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤱𞤮𞤲𞤭 𞤧𞤢𞤳𞥆𞤮𞤪𞤢𞥄𞤣𞤫 𞤲𞤢𞤺𞥆𞤫.

𞤘𞤭𞤦𞤭 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲 𞤬𞤵𞤯𞥆𞤭⹁ 𞤃𞤵𞤸𞤢𞤥𞥆𞤢𞤣 𞤅𞤢𞥄𞤤𞤢⹁ 𞤬𞤭𞤶𞤮𞥅𞤱𞤮 𞤥𞤢𞤩𞥆𞤫 𞤩𞤵𞤪𞤵𞤯𞤮 𞤤𞤮𞤤𞥆𞤵𞤣𞤫 𞤮𞤲⹁ 𞤲𞤮 𞤦𞤢𞤪𞤥𞤭. 𞤑𞤮 𞤧𞤫𞥅𞤯𞤢 𞤫 𞤬𞤭𞤶𞤢𞤲𞤣𞤫 𞤢𞤪𞤢𞤲𞤫𞤪𞤫 𞤲𞤣𞤫𞤲 𞤮 𞤼𞤢𞤱𞤢𞤲𞤮𞥅. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤃𞤮𞤸𞤢𞤥𞥆𞤢𞤣 𞤀𞤤 𞤡𞤫𞤲𞤢𞥄𞤱𞤭𞥅⹁ 𞤢𞤴𞤲𞤢𞥄𞤶𞤮 𞤥𞤢𞤩𞥆𞤫 𞤥𞤢𞤱𞤯𞤮 𞤮𞤲 𞤲𞤮 𞤦𞤢𞤪𞤥𞤵𞤲𞤮𞥅 𞤳𞤢𞤻𞤵𞤲 𞤳𞤢𞤣𞤭.

𞤃𞤵𞤸𞤢𞤥𞥆𞤢𞤣 𞤅𞤢𞥄𞤤𞤢 𞤲𞤮𞤲 𞤬𞤮𞤣𞤭𞥅 𞤪𞤵𞤼𞥆𞤢𞤺𞤮𞤤 𞤼𞤢𞤱𞤫𞥅 𞤫 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤. 𞤄𞤵𞤴 𞤽𞤭𞤻𞤵𞤲𞤮 𞤥𞤮⹁ 𞤬𞤭𞥅 𞤮 𞤱𞤮𞤲𞤢𞥄𞤲𞤮 𞤑𞤮𞤼𞤣𞤭𞤱𞤢𞤪 𞤮 𞤳𞤫𞤤𞥆𞤢𞤲𞤢 𞤬𞤭𞤶𞤭𞤣𞤭𞥅𞤩𞤫 𞤥𞤢𞤳𞥆𞤮 𞤩𞤫𞤲 𞤩𞤢𞥄𞤱𞤮 𞤮 𞤦𞤢𞤪𞤥𞤵𞤣𞤫.

𞤑𞤮 𞤸𞤢𞤲𞤳𞤭 𞤫 𞤃𞤢𞤱𞤲𞤣𞤫⹁ 𞤩𞤫 𞤸𞤭𞤪𞤧𞤭 𞤲𞤢𞤺𞥆𞤫 𞤲𞤺𞤫𞤲 𞤳𞤢 𞤤𞤢𞥄𞤥𞤮𞤪𞤣𞤫 𞤥𞤢𞤩𞥆𞤫 𞤑𞤢𞤴𞤪𞤮. 𞤇𞤫 𞤪𞤮𞤳𞥆𞤭 𞤼𞤫𞥅𞤱𞤵 𞤲𞤺𞤵𞤲 𞤴𞤮𞤺𞤢 𞤫 𞤼𞤢𞤥𞤨𞤵𞤩𞤫 𞤧𞤢𞤸𞤪𞤫 𞤲𞤣𞤫𞤲.

𞤉 𞤸𞤭𞤼𞤢𞥄𞤲𞤣𞤫 𞥒𞥐𞥐𞥘⹁ 𞤩𞤫𞥅 𞤃𞤭𞤧𞤪𞤢𞤲𞤳𞤮𞥅𞤩𞤫 𞤸𞤭𞤪𞤧𞤵𞤲𞤮 𞤻𞤢𞤤𞤫 𞤧𞤢𞤣𞤢𞤳𞤢 𞤧𞤭 𞤩𞤫 𞤴𞤢𞤸𞤭 𞤩𞤫 𞤰𞤫𞤼𞥆𞤮𞤴𞤭 𞤬𞤫𞤤𞤲𞤺𞤮 𞤲𞤺𞤮𞤲 𞤘𞤢𞤲𞤢.

𞤔𞤢𞤳𞤢 𞤱𞤮𞤲𞤢𞥄 𞤘𞤭𞤲𞤫 𞤼𞤵𞤲 𞤢𞤲𞤣𞤭 𞤊𞤀𞤐𞤘𞤀-𞤁𞤀𞤃𞥆𞤀𞥄.

𞤒𞤮𞤼𞥆𞤭𞤲𞤢𞤲𞤣𞤫 𞤀𞤴𞥃𞤢 𞤅𞤮𞥅