𞤃𞤀𞤈𞤌𞤑 𞤂𞤓𞤃𞤄𞤋⹁ 𞤅𞤓𞤏𞤋𞤅 𞤂𞤓𞥅𞤄𞤀𞥄

𞤃𞤀𞤈𞤌𞤑 🇲🇦 𞥐 – 𞥐 🇪🇸 𞤉𞤅𞤆𞤀𞤙

𞤐𞤺𞤢𞤴𞤵𞥅𞤶𞤭 𞤃𞤀𞤈𞤌𞤑 𞤯𞤭𞤲 𞤤𞤵𞤥𞤦𞤭𞥅 𞤬𞤭𞥅 𞤲𞤢𞤴𞤢𞤩𞤢𞤤 𞤲𞤺𞤢𞤤 𞤩𞤢𞥄𞤱𞤮 𞤩𞤫 𞤴𞤢𞤤𞤼𞤭𞤲𞤣𞤫 𞤉𞤧𞤨𞤢𞤻 𞤸𞤢𞤲𞤳𞤭 𞤫 𞤃𞤢𞤱𞤦𞤢𞥄𞤪𞤫⹁ 𞥖 𞤄𞤮𞤱𞤼𞤮.

𞤇𞤢𞥄𞤱𞤮 𞤉𞤐𞤘𞤉𞤂𞤉 𞤴𞤢𞤤𞤼𞤭𞤲𞤣𞤫 𞤅𞤉𞤐𞤉𞤘𞤀𞤂 𞤫 𞤈𞤫𞤬𞤦𞤭𞤪𞥆𞤫⹁ 𞤳𞤮 𞤃𞤀𞤈𞤌𞤑 𞤼𞤢𞤲 𞤸𞤫𞤣𞥆𞤭𞤲𞤮𞥅 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲 𞤳𞤢 𞤬𞤮𞥅𞤤𞤮𞤼𞤭𞤪𞤮 𞤑𞤀𞤚𞤀𞤈. 𞤑𞤮𞤲𞤮 𞤲𞤺𞤢𞤴𞤵𞥅𞤶𞤭 𞤯𞤭𞤲 𞤦𞤮𞤲𞥆𞤢𞥄𞤤𞤭 𞤶𞤭𞤳𞥆𞤫 𞤬𞤭𞥅 𞤳𞤢𞤤𞤢 𞤳𞤮 𞤳𞤢𞤪𞤢𞤸𞤢𞤲 𞤩𞤫 𞤴𞤢𞤤𞤼𞤭𞤲𞤭𞤪𞤭 𞤉𞤧𞤨𞤢𞤻. 𞤇𞤫 𞤬𞤭𞤶𞤵𞤲𞤮 𞤸𞤢𞥄 𞤸𞤢𞤨𞥆𞤵 𞤲𞤺𞤵𞤲 𞤼𞤭𞤥𞥆𞤭⹁ 𞤸𞤢𞤴 𞤺𞤮𞥅𞤼𞤮 𞤸𞤫𞤩𞤢𞥄𞤤𞤭 𞤳𞤵𞥅𞤤𞤢𞤤. 𞤇𞤫 𞤬𞤭𞤶𞤭 𞤸𞤮𞤶𞤮𞤥𞤢𞥄𞤶𞤫 𞥓𞥐 𞤳𞤢𞤣𞤭⹁ 𞤬𞤢𞥄𞤸𞤭𞤲 𞤩𞤫 𞤧𞤫𞥅𞤣𞤭 𞤸𞤮𞥅𞤪𞤫 𞤩𞤮𞤤𞤢𞤤.

𞤐𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤦𞤫𞥅 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤬𞤮𞥅𞤤𞤢⹁ 𞤩𞤫 𞤴𞤢𞤸𞤭 𞤫 𞤤𞤢𞤼𞤮 𞤳𞤵𞥅𞤤𞤫. 𞤑𞤮𞤲𞤮 𞤸𞤢𞤴 𞤬𞤭𞤶𞤢𞤲𞤮𞥅𞤱𞤮 𞤉𞤅𞤆𞤀𞤙 𞤸𞤢𞤴 𞤺𞤮𞥅𞤼𞤮 𞤱𞤢𞥄𞤱𞤢𞥄𞤤𞤭 𞤲𞤢𞥄𞤣𞤵𞤣𞤫 𞤥𞤵𞥅𞤤𞥆𞤫𞤪𞤫 𞤲𞤣𞤫𞤲. 𞤒𞤀𞥄𞤅𞤋𞤐 𞤄𞤓𞤐𞤓⹁ 𞤸𞤭𞤱𞤮𞥅𞤱𞤮 𞤃𞤀𞤈𞤌𞤑 𞤮𞤲 𞤣𞤢𞤪𞤲𞤭 𞤤𞤢𞤼𞤫 𞤉𞤅𞤆𞤀𞤙 𞤯𞤫𞤲 𞤼𞤢𞤼𞤭 𞤳𞤢𞤤𞤢. 𞤊𞤭𞥅 𞤳𞤢𞤤𞤢 𞤄𞤀𞤁𞤈 𞤄𞤀𞤐𞤓𞤐⹁ 𞤬𞤭𞤶𞤢𞤲𞤮𞥅𞤱𞤮 𞤃𞤀𞤈𞤌𞤑 𞤺𞤮𞥅𞤼𞤮 𞤱𞤮𞥅𞤨𞤵𞤲𞤮 𞤸𞤵𞥅𞤤𞤢𞤲𞤣𞤫 𞤥𞤵𞥅𞤯𞤵𞤲 𞤲𞤣𞤫𞤲⹁ 𞤃𞤀𞤈𞤌𞤑 𞤬𞤮𞥅𞤤𞤭 𞤩𞤢𞥄𞤱𞤮 𞤀𞤡𞤈𞤀𞤊 𞤖𞤀𞤑𞤋𞥅𞤃𞤋𞥅 𞤲𞤢𞥄𞤣𞤵𞤣𞤫 𞤸𞤵𞥅𞤤𞤢𞤲𞤣𞤫 𞤥𞤵𞤵𞤲 𞤣𞤫𞤲.

𞤑𞤮 𞤃𞤀𞤈𞤌𞤑 𞤱𞤮𞤲𞤭 𞤤𞤫𞤴𞤣𞤭 𞤀𞤊𞤈𞤋𞤑 𞤲𞤢𞤴𞤢𞤩𞤭𞤪𞤭 𞤫 𞤤𞤵𞤥𞤦𞤵𞤣𞤫 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤. 𞤑𞤮 𞤑𞤀𞤃𞤉𞤈𞤓𞤐 𞤱𞤮𞤲𞤭 𞤤𞤫𞤴𞤣𞤭 𞤀𞤊𞤈𞤋𞤑 𞤢𞤪𞤢𞤲𞤭𞤪𞤭 𞤫 𞤬𞤫𞤰𞥆𞤵𞤺𞤮𞤤 𞤳𞤢 𞤐𞤀𞤒𞤀𞤇𞤀𞤂. 𞤐𞤮 𞤸𞤭𞤳𞥆𞤭𞥅 𞤩𞤫 𞤅𞤉𞤐𞤉𞤘𞤀𞤂 𞤫 𞤘𞤀𞤐𞤀.

𞤐𞤮 𞤶𞤢𞤪𞤭 𞤢𞤲𞤣𞤭𞤲𞤼𞤭𞤲𞤣𞤫 𞤱𞤮𞤲𞤣𞤫𞤥𞤢 𞤀𞤡𞤈𞤀𞥄𞤊 𞤖𞤀𞤑𞤋𞥅𞤃𞤋𞥅 𞤳𞤮 𞤃𞤀𞤁𞤈𞤋𞤁⹁ 𞤳𞤢 𞤤𞤢𞥄𞤥𞤮𞤪𞤣𞤫 𞤉𞤅𞤆𞤀𞤙 𞤮 𞤶𞤭𞤦𞤭𞤲𞤢𞥄. 𞤑𞤮 𞤫 𞤫𞤤𞤼𞤮𞤪𞤣𞤫 𞤈𞤉𞤒𞤀𞤂 𞤃𞤀𞤁𞤈𞤋𞤁 𞤮 𞤫𞤤𞤼𞤭𞥅. 𞤉𞤅𞤆𞤀𞤙 𞤫𞤼𞤭𞤲𞤮 𞤬𞤭𞥅 𞤰𞤫𞤼𞥆𞤵𞤺𞤮𞤤 𞤥𞤮 𞤳𞤢 𞤳𞤭𞤨𞥆𞤮𞤤 𞤥𞤢𞤩𞥆𞤫 𞤳𞤮𞤲𞤮 𞤮 𞤧𞤵𞤩𞤭𞥅 𞤬𞤭𞤶𞤢𞤲𞤺𞤮𞤤 𞤃𞤀𞤈𞤌𞤑⹁ 𞤤𞤫𞤴𞤣𞤭 𞤳𞤢 𞤥𞤢𞤱𞤩𞤫 𞤥𞤢𞤳𞥆𞤮 𞤩𞤫𞤲 𞤭𞤱𞤭 𞤯𞤮𞤲. 𞤖𞤢𞤪𞤭 𞤴𞤵𞤥𞥆𞤢 𞤥𞤢𞤳𞥆𞤮 𞤳𞤮 𞤺𞤭𞤼𞥆𞤮𞥅𞤸𞤮 𞤷𞤵𞥅𞤯𞤭 𞤴𞤭𞤥𞤩𞤫⹁ 𞤦𞤢𞥄𞤦𞤢 𞤥𞤢𞤳𞥆𞤮 𞤲𞤮 𞤸𞤢𞤴𞤤𞤭𞤲𞤢 𞤳𞤢 𞤧𞤫𞤪𞤢 𞤤𞤢𞥄𞤱𞤭.

𞤔𞤮𞥅𞤲𞤭 𞤳𞤮 𞤃𞤀𞤈𞤌𞤑 𞤫 𞤆𞤌𞤈𞤚𞤌𞤘𞤀𞤂 𞤬𞤭𞤶𞤮𞤴𞤼𞤢 𞤳𞤢 𞤲𞤢𞤴𞤢𞤩𞤢𞤤 𞤩𞤢𞥄𞤱𞤮 𞤩𞤫𞤲 𞤦𞤮𞤲𞥆𞤵𞤣𞤫 𞤬𞤭𞥅 𞤅𞤓𞤏𞤋𞤅.

𞤆𞤌𞤈𞤚𞤌𞤘𞤀𞤂 🇵🇹 𞥖 – 𞥑 🇨🇭 𞤅𞤓𞤏𞤋𞤅

𞤘𞤭𞤤𞤢 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤬𞤵𞤯𞥆𞤭 𞤑𞤀𞤚𞤀𞤈 𞤸𞤭𞤳𞥆𞤢⹁ 𞤸𞤢𞤪𞤭 𞤸𞤢𞤴 𞤺𞤮𞥅𞤼𞤮 𞤸𞤫𞤩𞤢𞥄𞤤𞤭 𞤱𞤢𞤲𞤮 𞤨𞤭𞤺𞥆𞤢𞤤 𞤲𞤺𞤢𞤤 𞤅𞤓𞤏𞤋𞤅 𞤸𞤫𞤩𞤭 𞤲𞤺𞤢𞤤 𞤫 𞤤𞤫𞤴 𞤳𞤮𞤴𞤯𞤫 𞤆𞤌𞤈𞤚𞤋𞤘𞤀𞤂 𞤯𞤫𞤲. 𞤖𞤢𞤴 𞤋𞤈𞤀𞤐 𞤧𞤮𞤰𞤭𞤪𞤢𞤲𞤮𞥅𞤳𞤢 𞤱𞤢𞤲𞤮 𞤲𞤭𞥅 𞤧𞤢𞤦𞤵𞤲𞤢 𞤬𞤢𞥄𞤪𞤭𞤧𞤢𞥄𞤩𞤫 𞤩𞤫𞤲 𞤱𞤢𞤳𞥆𞤭𞤤𞤭𞤲𞤮 𞤸𞤢𞥄 𞤭𞤼𞥆𞤭 𞤳𞤵𞥅𞤤𞤫 𞤯𞤭𞤯𞤭 𞤲𞤣𞤫 𞤉𞤐𞤘𞤉𞤂𞤉 𞤨𞤭𞤴𞤵𞤲𞤮𞥅 𞤩𞤫 𞤳𞤢𞤥𞤩𞤫 𞤳𞤢𞤣𞤭 𞤶𞤫𞥅𞤺𞤮𞤮. 𞤑𞤮𞤲𞤮 𞤅𞤓𞤏𞤋𞤅 𞤳𞤮 𞤳𞤵𞥅𞤤𞤫𞤤 𞤺𞤮𞥅𞤼𞤫𞤤 𞤨𞤫𞤼 𞤩𞤫 𞤸𞤫𞤩𞤭𞤪𞤭 𞤸𞤮𞥅𞤪𞤫 𞤳𞤢𞤪𞤢𞤸𞤢𞤲. 𞤀 𞤱𞤭𞤴𞤢𞤴𞤥𞤢 𞤱𞤮𞤲𞤢𞥄 𞤳𞤮𞤴𞤯𞤫 𞤯𞤭𞤯𞤭 𞤀𞤤𞤤𞤢 𞤪𞤮𞤳𞥆𞤭 𞤩𞤫 𞤥𞤢𞥄𞤯𞤵𞤲 𞤱𞤮𞤲𞤢𞥄 𞤩𞤫 𞤧𞤢𞤨𞥆𞤮-𞤫-𞤺𞤮𞤮 𞤱𞤮𞤲𞤵𞤲𞤮𞥅 𞤬𞤭𞤶𞤵𞤣𞤫. 𞤆𞤮𞤪𞤼𞤭𞤺𞤢𞥄𞤩𞤫 𞤩𞤫𞤲 𞤼𞤢𞥄𞤪𞤭𞤲𞤭 𞤩𞤫 𞤸𞤢𞥄 𞤩𞤫 𞤺𞤭𞥅𞤤𞤢𞥄. 𞤐𞤢𞤲𞤣𞤭 𞤸𞤢𞤪𞤭 𞤩𞤫 𞤱𞤵𞤤𞤯𞤢𞥄𞤥𞤢 𞤨𞤫𞤤𞥆𞤫 𞤥𞤢𞤩𞥆𞤫 𞤯𞤫𞤲.

𞤑𞤮 𞤘𞤌𞤐𞤑𞤀𞤂𞤌 𞤈𞤀𞤃𞤌𞤅 𞤵𞤣𞥆𞤭𞤼𞤢𞤲𞤭 𞤆𞤌𞤈𞤚𞤋𞤘𞤀𞤂 𞤳𞤵𞥅𞤤𞤫 𞤯𞤫𞤲 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥑𞥗 𞤪𞤫𞤬𞤼𞤭 𞤆𞤉𞤆𞤉 𞤩𞤫𞤴𞤣𞤭𞤼𞤭 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥓. 𞤑𞤮 𞤸𞤮𞥅𞤪𞤫 𞤯𞤮𞤲 𞤩𞤫 𞤬𞤮𞤱𞤼𞤭𞤲𞤭 𞤬𞤭𞤶𞤮 𞤲𞤺𞤮𞤲.

𞤐𞤣𞤫 𞤩𞤫 𞤪𞤵𞤼𞥆𞤭𞤲𞤮𞥅 𞤬𞤭𞥅 𞤬𞤫𞤷𞥆𞤫𞤪𞤫 𞤯𞤭𞤯𞤢𞤩𞤫𞤪𞤫 𞤲𞤣𞤫𞤲⹁ 𞤲𞤢𞤲𞤣𞤭 𞤤𞤫𞤴𞤣𞤭 𞤲𞤣𞤭𞤲 𞤵𞤤𞤬𞤭𞤼𞤭𞥅 𞤫 𞤤𞤫𞤴 𞤳𞤮𞤴𞤯𞤫 𞤧𞤵𞤱𞤭𞤧𞤢𞥄𞤩𞤫 𞤩𞤫𞤲. 𞤇𞤫 𞤱𞤢𞤯𞤢𞥄 𞤳𞤵𞥅𞤤𞤫 𞤲𞤢𞤴𞤭. 𞤊𞤢𞥄𞤸𞤭𞤲⹁ 𞤳𞤮 𞤘𞤌𞤐𞤑𞤀𞤂𞤌 𞤈𞤀𞤃𞤌𞤅 𞤶𞤢𞤺𞥆𞤭𞤼𞤭 𞤶𞤵𞥅𞤪𞤲𞤣𞤫 𞤳𞤵𞥅𞤤𞤫 𞤯𞤫𞤲 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥑. 𞤖𞤢𞤴 𞤼𞤭𞤥𞥆𞤢𞥄𞤤𞤭 𞤸𞤮𞤶𞤮𞤥𞤢𞥄𞤶𞤫 𞤶𞤮𞤱𞤭 𞤩𞤢𞥄𞤱𞤼𞤭 𞤯𞤵𞤥⹁ 𞤈𞤀𞤊𞤀𞤒𞤉𞤂 𞤘𞤉𞤈𞤉𞥅𞤈𞤌 𞤲𞤢𞥄𞤣𞤭 𞤲𞤢𞤴𞤩𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥕. 𞤑𞤮𞤲𞤮 𞤃𞤀𞤐𞤓𞤏𞤉𞤂 𞤀𞤑𞤀𞤐𞤔𞤋 𞤭𞤼𞥆𞤢𞤲𞤭 𞤧𞤵𞤱𞤭𞤧𞤢𞥄𞤩𞤫 𞤩𞤫𞤲 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕𞥘.

𞤑𞤢 𞤸𞤮𞤶𞤮𞤥𞤢𞥄𞤪𞤫 𞥖𞥘⹁ 𞤘𞤌𞤐𞤑𞤀𞤂𞤌 𞤈𞤀𞤃𞤌𞤅 𞤩𞤫𞤴𞤣𞤭𞤼𞤢𞤲𞤭 𞤆𞤌𞤈𞤚𞤋𞤖𞤀𞤂 𞤳𞤵𞥅𞤤𞤢𞤤 𞤧𞤭 𞤈𞤀𞤊𞤀𞤒𞤉𞤂 𞤂𞤉𞤒𞤀𞤏 𞤸𞤮𞤥𞤦𞤭𞤪𞤭 𞤺𞤮𞥅𞤼𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥙𞥒 𞤸𞤢𞤪𞤭 𞤮𞤥𞤮 𞤤𞤮𞤲𞤼𞤭𞥅 𞤄𞤈𞤓𞤐𞤌𞥅 𞤊𞤉𞤈𞤐𞤀𞤐𞤁𞤉𞤅 𞤸𞤢𞤴 𞤼𞤭𞤥𞤢𞥄𞤤𞤭 𞤸𞤮𞤶𞤮𞤥𞤢𞥄𞤶𞤫 𞤶𞤮𞤱𞤭.

𞤈𞤌𞤐𞤀𞤂𞤁𞤌 𞤲𞤢𞥄𞤼𞤵𞤣𞤫 𞤱𞤮𞥅 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥗𞥔. 𞤖𞤢𞤴 𞤳𞤢𞤲𞤳𞤮 𞤼𞤭𞤺𞤭 𞤮 𞤸𞤫𞤩𞤵𞤲𞤮 𞤳𞤵𞥅𞤤𞤢𞤤⹁ 𞤳𞤮𞤲𞤮 𞤲𞤢𞤺𞤤 𞤣𞤢𞤺𞤭𞤲𞤢𞤲𞤮𞥅𞤳𞤢.


𞤔𞤮𞥅𞤲𞤭 𞤳𞤮 𞤃𞤀𞤈𞤌𞤑 𞤫 𞤆𞤌𞤈𞤚𞤋𞤘𞤀𞤂 𞤧𞤢𞥄𞤼𞤭𞤲𞤢𞥄 𞤫 𞤖𞤮𞤪𞤦𞤭𞤪𞥆𞤫 𞤻𞤢𞤤𞤲𞤣𞤫 𞥑𞥐 𞤄𞤮𞤱𞤼𞤮.

𞤙𞤮𞤺𞥆𞤢𞤲𞤣𞤫 𞤀𞤴𞥃𞤢 𞤅𞤮𞥅. 𞤋𞤥𞥆𞤭𞤲𞤢𞥄𞤯𞤮 𞤫 𞤭𞤲𞤣𞤫 𞤤𞤮𞤱𞤪𞤫 𞤼𞤢𞤦𞤢𞤤𞤣𞤫 𞤬𞤭𞥅 𞤸𞤵𞤥𞤨𞤭𞤼𞤵𞤺𞤮𞤤 𞤮𞤲 𞤳𞤮 𞤱𞤮𞤲𞤭 𞤫 𞤬𞤫𞤰𞥆𞤵𞤣𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤳𞤢𞤼𞤢𞤪 𞤳𞤢𞤼𞤢𞤪.