𞤚𞤓𞤃𞤄𞤌𞤐𞥋𞤁𞤋𞤈𞤀𞤂 𞤀𞤊𞤈𞤋𞤑 – 𞤀𞤃𞤉𞤈𞤋𞤑

𞤑𞤮 𞤸𞤮𞥅𞤪𞤫𞥅𞤩𞤫 𞤤𞤫𞤴𞤯𞤫 𞤀𞤬𞤪𞤭𞤳 𞥔𞥙 𞤱𞤮𞤲𞤭 𞤳𞤮 𞤔𞤮 𞤄𞤢𞤴𞤣𞤫𞤲⹁ 𞤸𞤮𞥅𞤪𞤫𞥅𞤶𞤮 𞤀𞤥𞤫𞤪𞤭𞤳 𞤮𞤲⹁ 𞤼𞤮𞥅𞤤𞤲𞤭 𞤳𞤢 𞤤𞤢𞤥𞤮𞤪𞤣𞤫 𞤏𞤢𞥃𞤭𞤲𞤼𞤮𞤲 𞤬𞤭𞥅 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤀𞤥𞤫𞤪𞤭𞤳 𞤫 𞤤𞤫𞤴𞤯𞤫 𞤀𞤊𞤪𞤭𞤳 𞤯𞤫𞤲𞤣𞤫 𞤀𞤥𞤫𞤪𞤭𞤳 𞤫 𞤤𞤫𞤴𞤯𞤫 𞤀𞤊𞤪𞤭𞤳 𞤯𞤫𞤲.

𞤑𞤮 𞤄𞤢𞤪𞤢𞤳 𞤌𞤦𞤢𞤥𞤢 𞤱𞤮𞤲𞤭 𞤢𞤪𞤢𞤲𞤮 𞤫 𞤬𞤵𞤯𞥆𞤢𞤺𞤮𞤤 𞤲𞤺𞤢𞥄𞤤 𞤼𞤵𞤥𞤦𞤮𞥋𞤣𞤭𞤪𞤢𞤤 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔. 𞤑𞤮 𞤦𞤢𞤯𞤼𞤢𞤲𞤫 𞤴𞤭𞥅𞤤𞤮 𞤲𞤺𞤮 𞤮 𞤱𞤢𞤯𞤵𞤲𞤮𞥅 𞤀𞤬𞤪𞤭𞤳 𞤫 𞥒𞥐𞥑𞥓⹁ 𞤮 𞤬𞤮𞤣𞤵𞤲𞤮𞥅 𞤼𞤵𞤥𞤦𞤮𞤲𞥋𞤣𞤭𞤪𞤺𞤮𞤤 𞤫 𞤸𞤮𞥅𞤪𞤫𞥅𞤩𞤫 𞤀𞤬𞤪𞤭𞤳 𞤩𞤫𞤲 𞤬𞤭𞥅 𞤴𞤮 𞤢𞤬𞤪𞤭𞤳𞤲𞤢𞥄𞤩𞤫 𞤩𞤫𞤲 𞤩𞤫𞤲 𞤸𞤫𞤩𞤵 𞤤𞤭𞤣𞥆𞤵 𞤕𞤢𞤴𞤲𞤢 𞤫 𞤲𞤣𞤫𞤪 𞤀𞤬𞤪𞤭𞤳. 𞤑𞤮 𞤮𞤲𞤼𞤵𞤥𞤢 𞤮 𞤱𞤭𞤴𞤵𞤲𞤮𞥅 𞤱𞤮𞤲𞤣𞤫𞤥𞤢 𞤲𞤢𞥄𞤼𞤵𞤺𞤮𞤤 𞤶𞤢𞤱𞤤𞤫 𞤶𞤢𞤲𞤢𞤲𞤫 𞤫 𞤲𞤣𞤫𞤪 𞤀𞤬𞤪𞤭𞤳⹁ 𞤳𞤮 𞤸𞤵𞥅𞤲𞤣𞤫 𞤥𞤮𞤰𞥆𞤵𞤲𞥋𞤣𞤫⹁ 𞤳𞤮𞤲𞤮 𞤳𞤮 𞤧𞤭 𞤼𞤢𞤱𞤭𞥅 𞤱𞤮𞤲𞤢𞥄 𞤸𞤵𞥅𞤼𞤮𞤪𞤼𞤫𞥅𞤯𞤫 𞤲𞤺𞤢𞤥 𞤴𞤢𞤤𞤼𞤭𞤲𞤺𞤮𞤤 𞤲𞤺𞤢𞤤𞤵𞥅𞤶𞤭 𞤀𞤬𞤪𞤭𞤳 𞤯𞤭𞤲. 𞤌 𞤱𞤭𞤴𞤭 𞤱𞤮𞤼𞤢 𞤢𞤬𞤪𞤭𞤳𞤲𞤢𞥄𞤩𞤫 𞤩𞤫𞤲 𞤶𞤢𞤩𞤵 𞤤𞤢𞥄𞤱𞤭 𞤱𞤮𞤲𞤢𞥄𞤯𞤭 𞤯𞤭𞤲 𞤢𞤧𞤫𞥅𞤣𞤫 𞤭𞤱𞤢 𞤳𞤮 𞤮𞥅𞤺𞤭𞤪𞤯𞤫 𞤬𞤫𞤱𞤲𞤢 𞤳𞤢 𞤣𞤢𞤪𞤮𞤪𞤯𞤫 𞤤𞤢𞥄𞤯𞤫 𞤬𞤭𞥅 𞤕𞤢𞤴𞤲𞤢.

𞤚𞤵𞤥𞤦𞤮𞤲𞥋𞤣𞤭𞤪𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤⹁ 𞤳𞤮 𞤺𞤭𞤤𞤢 𞤻𞤢𞤤𞤲𞤣𞤫 𞥔 𞤸𞤢𞥄 𞤻𞤢𞤤𞤲𞤣𞤫 𞥖 𞤔𞤵𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔 𞤲𞤺𞤢𞤤 𞤱𞤢𞤯𞤭. 𞤑𞤮𞤲𞤮 𞤲𞤣𞤫 𞤁𞤮𞤲𞤢𞤤 𞤚𞤪𞤮𞤥𞤨 𞤤𞤮𞤲𞤼𞤭𞤲𞤮𞥅 𞤌𞤦𞤢𞤥𞤢 𞤸𞤮𞥅𞤪𞤫 𞤀𞤥𞤫𞤪𞤭𞤳⹁ 𞤲𞤺𞤢𞤤 𞤯𞤭𞤯𞤥𞤭𞤼𞤢𞥄𞤲𞤮.

𞤐𞤺𞤢𞥄𞤤 𞤼𞤵𞤥𞤦𞤮𞤲𞤣𞤭𞤪𞤢𞤤 𞤸𞤭𞤳𞥆𞤢 𞤲𞤮 𞤧𞤢𞥄𞤼𞤭𞤲𞤭 𞤤𞤫𞤴𞤯𞤫 𞤀𞤬𞤪𞤭𞤳 𞥔𞥙. 𞤑𞤮𞤲𞤮 𞤤𞤫𞤴𞤯𞤫 𞤳𞤢 𞤧𞤮𞥅𞤪𞤭𞥅𞤩𞤫 𞤩𞤫𞤲 𞤱𞤢𞤴𞤤𞤼𞤭𞤼𞤭 𞤤𞤢𞥄𞤥𞤵 𞤲𞤺𞤵𞤲 𞤷𞤢𞥄𞤼𞤢𞥄𞤳𞤢 𞤱𞤢𞤲𞤮 𞤘𞤭𞤲𞤫⹁ 𞤃𞤢𞤤𞤭 𞤫 𞤄𞤵𞤪𞤳𞤭𞤲𞤢. 𞤐𞤮 𞤼𞤢𞤱𞤼𞤭 𞤯𞤫𞤲 𞤳𞤢𞤣𞤭 𞤫 𞤼𞤵𞤤𞤼𞤵𞤺𞤮𞤤 𞤶𞤮𞤲𞤣𞤫 𞤲𞤣𞤫𞤲 𞤅𞤵𞤣𞤢𞤲 𞤫 𞤉𞤪𞤭𞤼𞤫𞤪𞤫.

𞤑𞤮 𞤑𞤢𞤥𞤢𞤤𞤢 𞤖𞤢𞤪𞤭𞤧⹁ 𞤷𞤵𞤳𞥆𞤮 𞤸𞤮𞥅𞤪𞤫𞥅𞤶𞤮 𞤤𞤫𞤴𞤧𞤣𞤭 𞤀𞤥𞤫𞤪𞤭𞤳 𞤲𞤣𞤭𞤲 𞤱𞤮𞤲𞤭 𞤳𞤮 𞤵𞤣𞥆𞤭𞤼𞤭 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤲𞤺𞤢𞤤 𞤸𞤢𞤲𞤳𞤭 𞤫 𞤃𞤢𞤱𞤦𞤢𞥄𞤪𞤫 𞤻𞤢𞤤𞤲𞤣𞤫 𞥑𞥓 𞤄𞤮𞤱𞤼𞤮 𞥒𞥐𞥒𞥒. 𞤌 𞤴𞤫𞤱𞤼𞤭 𞤸𞤮𞥅𞤪𞤫 𞤀𞤬𞤪𞤭𞤳𞤲𞤢𞥄𞤩𞤫 𞤴𞤢𞤤𞤼𞤵𞤩𞤫 𞤩𞤫𞤲 𞤳𞤢𞤻𞤵𞤲 𞤫 𞤧𞤵𞤳𞤢𞥄𞤩𞤫 𞤀𞤬𞤪𞤭𞤳 𞤱𞤮𞤲𞤵𞤩𞤫 𞤢𞤪𞤣𞤢𞥄𞤣𞤫 𞤥𞤵𞤪𞤢𞥄𞤯𞤭 𞤫 𞤲𞤣𞤫𞤪 𞤀𞤬𞤪𞤭𞤳. 𞤑𞤮 𞤸𞤢𞤲𞤣𞤫 𞤫 𞤐𞤶𞤫𞤧𞤤𞤢𞥄𞤪𞤫⹁ 𞤄𞤢𞤴𞤣𞤫𞤲 𞤱𞤢𞤯𞤢𞤼𞤢 𞤴𞤫𞤱𞤼𞤫𞤪𞤫.

𞤊𞤢𞥄𞤲𞤣𞤢𞥄𞤪𞤫 𞤲𞤺𞤢𞥄𞤤 𞤼𞤵𞤥𞤦𞤮𞤲𞥋𞤣𞤭𞤪𞤢𞤤 𞤳𞤮 𞤸𞤫𞥅𞤯𞤭𞤲𞤼𞤭𞤲𞤺𞤮𞤤 𞤸𞤵𞥅𞤱𞤮𞤲𞥋𞤣𞤭𞤪𞤢𞤤 𞤸𞤢𞤳𞥆𞤵𞤲𞥋𞤣𞤫 𞤀𞤥𞤫𞤪𞤭𞤳 𞤫 𞤤𞤫𞤴𞤯𞤫 𞤀𞤬𞤪𞤭𞤳 𞤯𞤫𞤲.

𞤐𞤮 𞤼𞤭𞤶𞥆𞤢𞥄 𞤳𞤢 𞤼𞤫𞥅𞤥𞤭𞤲𞤢𞤲𞤣𞤫 𞤧𞤢𞥄𞤼𞤭𞥅𞤲𞤣𞤫 𞤲𞤣𞤫𞤲 𞤤𞤢𞥄𞤼𞤮𞥅 𞤼𞤫𞥅𞤥𞤭𞤲𞤢𞤲𞤣𞤫 𞤀𞤬𞤪𞤭𞤳. 𞤑𞤮 𞤯𞤵𞤥 𞤱𞤢𞤯𞤭 𞤧𞤭 𞤤𞤫𞤴𞤯𞤫 𞤥𞤢𞤱𞤯𞤫 𞤩𞤢𞤥𞤼𞤭𞥅𞤯𞤫 𞤯𞤫𞤲 𞤱𞤢𞤲𞤮 𞤕𞤢𞤴𞤲𞤢⹁ 𞤈𞤵𞥅𞤧𞤭𞤴𞤢⹁ 𞤚𞤵𞤪𞤳𞤭 𞤲𞤮 𞤺𞤭𞤣𞥆𞤢𞤲𞤭 𞤀𞤬𞤪𞤭𞤳 𞤬𞤫𞤱𞤲𞤣𞤮 𞤸𞤢𞤲𞤣𞤫 𞤬𞤭𞥅 𞤸𞤫𞤦𞤤𞤢𞤲𞤢𞤺𞤮𞤤 𞤳𞤮 𞤢𞤪𞤢𞤼𞤢 𞤳𞤮𞤲. 

𞤏𞤢𞤲𞤮 𞤬𞤫𞤰𞥆𞤭𞤪𞤲𞤮𞥅 𞤲𞤮𞤲 𞤳𞤢 𞤦𞤫𞤲𞤧𞤮𞤲𞥋𞤣𞤭𞤪𞤢𞤤 𞤄𞤫𞤪𞤤𞤫𞤲 𞤫 𞤸𞤭𞤼𞤢𞥄𞤲𞤣𞤫 𞥑𞥘𞥘𞥕⹁ 𞤬𞤫𞤱𞤲𞤣𞤮 𞤉𞤪𞤮𞤨𞤲𞤢𞥄𞤩𞤫 𞤩𞤫𞤲 𞤶𞤮𞥅𞤯𞤭𞤲𞤮𞥅 𞤧𞤫𞤲𞤣𞤭𞤼𞤭 𞤀𞤬𞤪𞤭𞤳 𞤸𞤢𞤳𞥆𞤵𞤲𞥋𞤣𞤫 𞤥𞤢𞤩𞥆𞤫⹁ 𞤳𞤮 𞤲𞤭𞥅 𞤳𞤢𞤣𞤭 𞤤𞤫𞤴𞤣𞤭 𞤳𞤢𞤤𞤢 𞤫 𞤯𞤫𞥅 𞤤𞤫𞤴𞤯𞤫 𞤩𞤢𞤥𞤼𞤭𞥅𞤯𞤫 𞤸𞤢𞤲𞤣𞤫⹁  𞤢𞤸𞤣𞤮𞤪𞤭 𞤷𞤭𞤤𞤢𞤺𞤮𞤤 𞤺𞤫𞤩𞤢𞤤 𞤫 𞤲𞤣𞤫𞤪 𞤀𞤬𞤪𞤭𞤳. 𞤅𞤭 𞤢𞤬𞤪𞤭𞤳𞤲𞤢𞥄𞤩𞤫 𞤩𞤫𞤲⹁ 𞤱𞤢𞤯𞤼𞤢𞤲𞤢𞥄𞤤𞤭 𞤴𞤭𞥅𞤤𞤭⹁ 𞤀𞤬𞤪𞤭𞤳 𞤧𞤫𞤲𞤣𞤭𞤼𞤫𞤼𞤫 𞤴𞤫𞥅𞤧𞤮 𞤥𞤢𞤩𞥆𞤫⹁ 𞤳𞤢𞤥𞤩𞤫 𞤶𞤫𞤴𞤵𞤩𞤫 𞤩𞤫𞤲⹁ 𞤩𞤫 𞤬𞤢𞤯𞤢.

𞤖𞤢𞤲𞤣𞤫 𞤼𞤵𞤥𞤦𞤮𞤲𞥋𞤣𞤭𞤪𞤫 𞤯𞤵𞥅𞤯𞤵𞤯𞤫 𞤲𞤮 𞤱𞤢𞤯𞤵𞤣𞤫 𞤸𞤢𞤳𞥆𞤵𞤲𞥋𞤣𞤫 𞤀𞤊𞤪𞤭𞤳 𞤫 𞤤𞤫𞤴𞤯𞤫 𞤩𞤢𞤥𞤼𞤭𞥅𞤯𞤫. 𞤂𞤢𞥄𞤥𞤯𞤮 𞤭𞤥𞥆𞤭𞥅𞤯𞤮 𞤳𞤢𞤤𞤢 𞤲𞤮 𞤲𞤮𞤣𞥆𞤵𞤼𞤵𞤣𞤫 𞤤𞤢𞥄𞤥𞤩𞤫 𞤀𞤬𞤪𞤭𞤳 𞤩𞤫𞤲⹁ 𞤩𞤫𞤲 𞤳𞤢𞤣𞤭 𞤲𞤮𞥅𞤼𞤮𞤪𞤢 𞤱𞤢 𞤨𞤢𞤴𞤳𞤮𞤴. 𞤅𞤭 𞤱𞤮𞤲𞤢𞥄 𞤕𞤢𞤴𞤲𞤢 – 𞤀𞤬𞤪𞤭𞤳⹁ 𞤳𞤮 𞤋𞤲𞤣𞤭𞤴𞤢 – 𞤀𞤬𞤪𞤭𞤳⹁ 𞤥𞤢𞤤𞥆𞤢 𞤈𞤵𞥅𞤧𞤭𞤴𞤢 – 𞤀𞤬𞤪𞤭𞤳. 𞤅𞤭 𞤫𞤲 𞤱𞤢𞤯𞤼𞤢𞤲𞤢𞥄𞤤𞤭 𞤸𞤢𞤳𞥆𞤭𞤤⹁ 𞤻𞤢𞤤𞤲𞤣𞤫 𞤺𞤮𞤮⹁ 𞤳𞤮 𞤅𞤪𞤭 𞤂𞤢𞤲𞤳𞤢 𞤲𞤮𞤣𞥆𞤭𞤼𞤢𞤼𞤢 𞤸𞤮𞥅𞤪𞤫𞥅𞤩𞤫 𞤀𞤬𞤪𞤭𞤳 𞤬𞤭𞥅 𞤼𞤵𞤥𞤮𞤲𞥋𞤣𞤭𞤪𞤢𞤤.