𞤅𞤉𞤐𞤉𞤘𞤀𞤂: 𞤁𞤋𞤈𞤚𞤋𞤐𞤀𞤂 𞤅𞤓𞤇𞤌 𞤐𞤘𞤌𞤐 𞤚𞤀𞤄𞤋𞤐𞤚𞤋𞤐𞤀𞥄𞤃𞤀

𞤃𞤀𞤑𞤋 𞤅𞤀𞤂⹁ 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤅𞤫𞤲𞤫𞤺𞤢𞤤 𞤲𞤣𞤭𞤲⹁ 𞤬𞤢𞤩𞥆𞤭𞤲𞤭𞥅 𞤷𞤵𞤩𞤢𞤤 𞤸𞤮𞥅𞤪𞤢𞥄𞤳𞤵 𞤧𞤢𞥄𞤼𞤭𞤲𞤢𞤲𞤮𞥅𞤲𞤺𞤢𞤤 𞤫 𞤲𞤣𞤵𞥅 𞤤𞤫𞤱𞤪𞤵 𞤕𞤮𞤤𞤼𞤮⹁ 𞤻𞤢𞤤𞤲𞤣𞤫 𞥒𞥕 𞤥𞤢𞤴𞤪𞤵.

𞤉 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤢𞤲𞤭 𞤪𞤫𞤲𞤣𞤮 𞤅𞤫𞤲𞤫𞤺𞤢𞤤 𞤲𞤺𞤮𞤲 𞤳𞤢 𞤰𞤫𞤱𞤤𞤵⹁ 𞤫 𞤸𞤮𞥅𞤪𞤦𞤭𞤪𞥆𞤫 𞤻𞤢𞤤𞤲𞤣𞤫 𞥓 𞤕𞤮𞤤𞤼𞤮⹁ 𞤃𞤀𞤑𞤋 𞤅𞤀𞤂 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤮 𞤦𞤮𞤪𞤼𞤭𞥅 𞤧𞤢𞤪𞤯𞤮𞤤 𞤴𞤮𞤱𞤭𞤼𞤭𞥅𞤲𞤺𞤮𞤤 𞤫 𞤷𞤵𞤩𞤢𞤤 𞤲𞤺𞤢𞤤⹁ 𞤧𞤢𞤦𞤢𞤲𞤣𞤫𞤥𞤢 𞤤𞤵𞤪𞥆𞤢𞤤 𞤸𞤮𞥅𞤪𞤫 𞤤𞤭𞤥𞤼𞤮𞤤 𞤣𞤵𞤪𞤱𞤮𞥅𞤩𞤫 𞤥𞤢𞤤𞥆𞤢 𞤣𞤢𞤪𞤮𞤼𞤮𞥅𞤩𞤫 𞤩𞤫𞤲.

𞤌 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤮 “𞤵𞤣𞥆𞤭𞤼𞤢𞤴 𞤣𞤭𞥅𞤧𞤮𞤲𞥋𞤣𞤭𞤪𞤢𞤤 𞤸𞤵𞥅𞤩𞤲𞤢𞤴𞤲𞤺𞤢𞤤 𞤧𞤢𞤪𞤼𞤭𞥅𞤶𞤭 𞤬𞤭𞥅 𞤷𞤵𞤩𞤢𞤤 𞤲𞤫𞤱𞤭𞥅𞤲𞤺𞤢𞤤⹁ 𞤤𞤢𞥄𞤩𞤵𞤲𞥋𞤺𞤢𞤤⹁ 𞤸𞤵𞥅𞤩𞤵𞤲𞥋𞤺𞤢𞤤 𞤫 𞤲𞤣𞤫𞤪 𞤤𞤫𞤴𞤣𞤭 𞤅𞤫𞤲𞤫𞤺𞤢𞤤 𞤩𞤵𞥅𞤩𞤼𞤵𞤲𞥋𞤣𞤭 𞤫 𞤬𞤮𞤼𞥆𞤵𞤲𞥋𞤣𞤭.”

𞤉 𞤲𞤣𞤫𞤪 𞤴𞤫𞤱𞤼𞤫𞤪𞤫 𞤲𞤣𞤫 𞤮 𞤱𞤢𞤯𞤭 𞤲𞤣𞤫𞤲⹁ 𞤮 𞤼𞤮𞤯𞥆𞤢𞤲𞤮𞥅𞤳𞤭 𞤻𞤢𞤤𞤢𞥄𞤲𞤣𞤫 𞤸𞤫𞤧𞤪𞤫 𞤬𞤭𞥅 𞤤𞤢𞥄𞤼𞤢𞤺𞤮𞤤 𞤷𞤵𞤩𞤢𞤤 𞤲𞤺𞤢𞤤. 𞤑𞤮𞤲𞤮 𞤬𞤫𞤣𞥆𞤫 𞤀𞤄𞤁𞤓𞤂𞥆𞤀𞥄𞤖𞤋 𞤏𞤀𞥄𞤁 𞤲𞤣𞤫𞤲 𞤢𞤪𞤣𞤭𞤲𞥆𞤮 𞤳𞤢 𞤦𞤭𞤥𞤦𞤭 𞤖𞤮𞥅𞤪𞤦𞤭𞤪𞥆𞤫⹁ 𞤬𞤫𞤸𞤪𞤫 𞤧𞤢𞤪𞤯𞤮𞤤 𞤬𞤭𞥅 𞤣𞤭𞤪𞤼𞤭𞤲𞤺𞤮𞤤 𞤻𞤢𞤤𞤢𞥄𞤲𞤣𞤫 𞤲𞤣𞤫𞤲⹁ 𞤼𞤢𞤱𞤵𞤣𞤫 𞤑𞤀𞤈𞤋𞥅𞤃 𞤏𞤀𞥄𞤁⹁ 𞤣𞤵𞤪𞤱𞤢𞤲𞤮𞥅𞤱𞤮 𞤩𞤫 𞤮𞤲 𞤴𞤭𞤤𞤼𞤢𞤲𞤮.

𞤖𞤢𞤲𞤳𞤭 𞤳𞤭𞥅𞤳𞤭𞥅𞤯𞤫 𞤫 𞤀𞥄𞤩𞤵𞤲𞥋𞤣𞤫⹁ 𞤻𞤢𞤤𞤲𞤣𞤫 𞥕 𞤕𞤮𞤤𞤼𞤮⹁ 𞤯𞤵𞥅𞤯𞤢𞤤 𞤧𞤢𞤪𞤮𞥅𞤩𞤫 𞤐𞤦𞤢𞤼𞤭𞤪𞤣𞤵 𞤅𞤉𞤲𞤫𞤺𞤢𞤤 𞤲𞤣𞤵𞤲 𞤧𞤢𞤪𞤯𞤭𞤲𞥆𞤮 𞤣𞤭𞤪𞤼𞤭𞤲𞤺𞤮𞤤 𞤷𞤵𞤩𞤢𞤤 𞤲𞤺𞤢𞤤 𞤸𞤢𞥄 𞤫 𞥑𞥕 𞤄𞤮𞤱𞤼𞤮 𞥒𞥐𞥒𞥔. 𞤍𞤵𞤥 𞤲𞤮𞤲 𞤺𞤢𞤧𞤵𞤣𞤫 𞤱𞤮𞥅⹁ 𞤲𞤣𞤫 𞤧𞤢𞤪𞤮𞥅𞤩𞤫 𞤤𞤭𞤣𞥆𞤮 𞤲𞤺𞤮𞤲 𞤴𞤢𞤤𞤼𞤭𞤲𞤢𞤲𞤮𞥅 𞤫 𞤲𞤣𞤫𞤪 𞤲𞤦𞤢𞤼𞤭𞤪𞤣𞤵 𞤲𞤣𞤵𞤲. 𞤑𞤮 𞤶𞤮𞤺𞤫𞤥𞤢𞥄𞤩𞤫 𞤩𞤫𞤲 𞤲𞤢𞤲𞤺𞤭 𞤩𞤫 𞤴𞤢𞤤𞤼𞤭𞤲𞤭𞤪𞤭 𞤩𞤫 𞤣𞤮𞥅𞤤𞤫.

𞤘𞤭𞤦𞤭 𞤮𞤲𞤼𞤵𞤥𞤢⹁ 𞤤𞤢𞥄𞤥𞤵 𞤲𞤺𞤵𞤲 𞤼𞤮𞤽𞤭𞥅 𞤥𞤮𞥅𞤩𞤼𞤮𞤲𞥋𞤣𞤭𞤪𞤺𞤮𞤤 𞤫 𞤲𞤣𞤫𞤪 𞤤𞤢𞥄𞤥𞤮𞤪𞤣𞤫 𞤁𞤢𞤳𞤢𞤪 𞤲𞤣𞤫𞤲. 𞤖𞤮𞥅𞤪𞤫 𞤯𞤵𞤥⹁ 𞤳𞤢𞤣𞤭⹁ 𞤤𞤢𞥄𞤥𞤵 𞤲𞤺𞤵𞤲 𞤼𞤢𞤰𞤭𞥅 𞤸𞤢𞤳𞤼𞤭𞤧𞤵 𞤲𞤺𞤵𞤲.

𞤑𞤮𞥅𞤸𞤮𞥅𞤩𞤫 𞤅𞤫𞤲𞤫𞤺𞤢𞤤 𞤯𞤵𞥅𞤯𞤵𞤩𞤫 𞤽𞤭𞤻𞤭𞥅 𞤲𞤣𞤫𞥅 𞤫𞤩𞥆𞤮𞥅𞤪𞤫. 𞤏𞤵𞤪𞤭𞤲 𞤴𞤮𞤺𞤢 𞤫 𞤼𞤢𞤱𞤢𞥄𞤩𞤫 𞤩𞤫𞤲 𞤳𞤢 𞤤𞤢𞥄𞤥𞤵 𞤧𞤮𞤪𞤼𞤭𞤳𞤫⹁ 𞤱𞤢𞤲𞤮 𞤄𞤭𞤲𞤣𞤮 𞤥𞤢𞤱𞤯𞤮 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤.

𞤉 𞤥𞤭𞥅𞤶𞤮 𞤤𞤭𞤣𞥆𞤭𞥅𞤩𞤫 𞤩𞤫𞤲⹁ 𞤲𞤺𞤮𞥅𞤤 𞤧𞤢𞤪𞤯𞤮𞤤 𞤣𞤭𞤪𞤼𞤭𞤲𞤺𞤮𞤤 𞤷𞤵𞤩𞤢𞤤 𞤲𞤺𞤢𞤤⹁ 𞤲𞤮 𞤤𞤵𞤲𞤣𞤭𞥅 𞤧𞤢𞤪𞤯𞤭 𞤱𞤢𞤤𞥆𞤢 𞤧𞤢𞤪𞤭𞤴𞤢𞥄𞤶𞤭 𞤣𞤮𞤧𞤼𞤫𞤪𞤫 𞤤𞤢𞥄𞤼𞤭𞥅𞤲𞤣𞤫 𞤼𞤵𞤺𞤢𞤤𞤢𞤤 𞤤𞤫𞤴𞤣𞤭 𞤲𞤣𞤭𞤲. 𞤑𞤮 𞤣𞤵𞥅𞤩𞤭 𞤶𞤮𞤱𞤭 𞤨𞤫𞤼⹁ 𞤁𞤮𞤧𞤼𞤫𞤪𞤫 𞤤𞤫𞤴𞤣𞤭 𞤲𞤣𞤫𞤲 𞤸𞤢𞤨𞥆𞤢𞤲𞤭 𞤳𞤢𞤤𞤢 𞤸𞤮𞥅𞤪𞤫𞥅𞤶𞤮 𞤤𞤫𞤧𞤣𞤭 𞤲𞤣𞤭𞤲. 𞤑𞤮𞤲𞤮 𞤲𞤺𞤮𞥅𞤤 𞤧𞤢𞤪𞤯𞤮𞤤 𞤳𞤫𞤧𞤮𞤤 𞤲𞤮 𞤶𞤵𞥅𞤼𞤭𞤲𞤭 𞤸𞤢𞤨𞥆𞤵 𞤲𞤺𞤵𞤲.

𞤁𞤉𞤐𞤘𞤖𞤀 (CEDEAO – ECOWAS) 𞤴𞤢𞤥𞤭𞤪𞤭𞥅 𞤻𞤭𞥅𞤩𞤲𞤵𞤺𞤮𞤤 𞤻𞤢𞤤𞤢𞥄𞤲𞤣𞤫 𞤲𞤣𞤫 𞤁𞤮𞤧𞤼𞤫𞤪𞤫 𞤲𞤣𞤫𞤲 𞤼𞤮𞤯𞥆𞤭𞥅.

𞤔𞤮𞥅𞤲𞤭 𞤳𞤮 𞤐𞤄𞤢𞤼𞤵 𞤁𞤮𞤧𞤼𞤫𞤪𞤫𞤴𞤢𞤲𞤳𞤮𞥅𞤪𞤵 𞤲𞤣𞤵𞤲 𞤸𞤢𞤦𞥆𞤢𞥄 𞤴𞤮 𞤻𞤢𞥄𞤱𞤵 𞤧𞤮 𞤼𞤢𞤱𞤭𞥅 𞤲𞤺𞤮𞥅𞤤 𞤧𞤢𞤪𞤯𞤮𞤤 𞤼𞤢𞤦𞤭𞤼𞤢𞤴.

𞤐𞤮 𞤶𞤢𞤪𞤭 𞤲𞤮𞤲 𞤢𞤲𞤣𞤭𞤲𞤼𞤭𞤲𞤣𞤫 𞤱𞤮𞤲𞤣𞤫𞤥𞤢⹁ 𞤲𞤣𞤫 𞤃𞤀𞤑𞤋 𞤅𞤀𞤂 𞤫𞤩𞥆𞤵𞤲𞤮𞥅 𞤪𞤢𞤩𞥆𞤭𞤲𞤯𞤭𞤲𞤭𞤪𞤺𞤮𞤤 𞤣𞤵𞥅𞤩𞤭 𞤯𞤭𞤯𞤭 𞤸𞤢𞤨𞥆𞤵 𞤥𞤢𞤳𞥆𞤮 𞤢𞤪𞤢𞤲𞤵 𞤲𞤺𞤵𞤲 𞤲𞤮 𞤮 𞤬𞤮𞤣𞤭𞤪𞤲𞤮𞥅 𞤲𞤮𞤲⹁ 𞤵𞤧𞤼𞤢 𞤲𞤺𞤵 𞤳𞤢 𞤣𞤵𞥅𞤩𞤭 𞤶𞤫𞥅𞤯𞤭𞤯𞤭 𞤢𞤪𞤼𞤭𞤪𞤢 𞤳𞤢 𞤣𞤵𞥅𞤩𞤭 𞤶𞤮𞤱𞤭⹁ 𞤄𞤢𞤼𞤵 𞤲𞤺𞤵𞤲 𞤶𞤢𞤩𞤢𞥄𞤲𞤮.

𞤊𞤢𞤩𞥆𞤭𞤲𞤺𞤮𞤤: 𞤲𞤫𞥅𞤩𞤲𞤵𞤼𞤵𞤺𞤮𞤤⹁ 𞤣𞤭𞤪𞤼𞤭𞤲𞤺𞤮𞤤 𞤻𞤢𞤤𞤢𞥄𞤲𞤣𞤫

𞤕𞤵𞤩𞤢𞤤: 𞤧𞤵𞤩𞤮⹁ 𞤧𞤵𞤩𞤲𞤺𞤮

𞤔𞤮𞤺𞤫𞤥𞤢𞥄𞤩𞤫: 𞤧𞤢𞤲𞤣𞤢𞤪𞤥𞤢𞥄𞤩𞤫