𞤊𞤌𞥅𞤂𞤌𞤚𞤋𞤈𞤌 𞤂𞤀𞤚𞤌 𞤃𞤓𞤂𞥆𞤉𞤈𞤉 𞤀𞤊𞤈𞤋𞤑 𞤐𞤘𞤌𞤐 𞤚𞤋𞤃𞥆𞤋𞤈𞤋𞥅 𞤐𞤌 𞤊𞤌𞤚𞤋𞤈𞤋 𞤀𞤄𞤋𞤔𞤀𞤐

𞤑𞤌𞤚𞤁𞤋𞤜𞤀𞥄𞤈 𞤎𞤉𞤚𞥆𞤋𞥅 𞤊𞤉𞤂𞤐𞤘𞤌 𞤐𞤘𞤌𞤐

𞤑𞤮 𞤖𞤢𞤲𞤳𞤭 𞤫 𞤈𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥑𞥑 𞤕𞤮𞤤𞤼𞤮 𞥒𞥐𞥒𞥔 𞤼𞤭𞤥𞥆𞤭 𞤊𞤮𞥅𞤤𞤮𞤼𞤭𞤪𞤮 𞤫 𞤂𞤢𞤼𞤮 𞤃𞤵𞤤𞥆𞤫𞤪𞤫 𞤬𞤭𞥅 𞤊𞤫𞤤𞤲𞤺𞤮 𞤀𞤬𞤪𞤭𞤳 𞤲𞤺𞤮𞤲.
𞤑𞤮 𞤑𞤌𞤚𞤁𞤋𞤏𞤀𞤈 𞤰𞤫𞤼𞥆𞤭 𞤲𞤺𞤮 𞤩𞤢𞥄𞤱𞤮 𞤩𞤫 𞤨𞤭𞤴𞤵𞤣𞤫 𞤐𞤀𞤔𞤉𞤈𞤋𞤒𞤀 𞤳𞤵𞥅𞤤𞤫 𞥒-𞥑.

𞤑𞤮 𞤻𞤢𞤤𞤲𞤣𞤫  𞥑𞥓 𞤅𞤭𞥅𞤤𞤮 𞥒𞥐𞥒𞥔 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮 𞤬𞤵𞤯𞥆𞤭𞥅. 𞤑𞤮 𞤑𞤌𞤚𞤁𞤋𞤏𞤀𞤈 𞤫 𞤘𞤋𞤐𞤉 𞤄𞤋𞤅𞤀𞤏𞤌 𞤵𞤣𞥆𞤭𞤼𞤵𞤲𞤮𞥅 𞤬𞤮𞥅𞤤𞤼𞤭𞤪𞤮 𞤲𞤺𞤮𞤲. 𞤃𞤢𞤱𞤯𞤭 𞤑𞤌𞤚𞤁𞤋𞤏𞤀𞤈 𞤯𞤭𞤲 𞤬𞤮𞥅𞤤𞤭𞤪𞤭 𞤕𞤢𞥄𞤨𞤢𞥄𞤤𞤭 𞤄𞤋𞤅𞤀𞤏𞤌𞥅 𞤯𞤭𞤲 𞤳𞤵𞥅𞤤𞤫 𞤯𞤭𞤯𞤭. 𞤇𞤢𞥄𞤱𞤼𞤭 𞤯𞤵𞤲 𞤑𞤌𞤚𞤁𞤋𞤏𞤀𞤈 𞤨𞤭𞤴𞤢𞥄 𞤫 𞤨𞤭𞤶𞤫 𞤣𞤫𞤲𞤼𞤫 𞤯𞤭𞤯𞤭 𞤸𞤫𞤣𞥆𞤭𞤲𞤮𞥅𞤯𞤫 𞤯𞤫𞤲. 𞤑𞤮 𞤸𞤮𞥅𞤪𞤫 𞤳𞤢𞤪𞤢𞤸𞤢𞤲 𞤩𞤫 𞤤𞤵𞤥𞤦𞤭𞤪𞤭 𞤬𞤭𞥅 𞤶𞤫𞥅𞤼𞤢𞤼𞤢𞤩𞤢𞤤 𞤲𞤺𞤢𞤤 𞤩𞤢𞥄𞤱𞤮 𞤃𞤀𞤈𞤌𞤑 𞤨𞤭𞤴𞤵𞤣𞤫 𞤟𞤀𞤃𞤄𞤋𞤒𞤀.

𞤅𞤭 𞤟𞤀𞤃𞤄𞤋𞤒𞤀 𞤴𞤢𞤤𞤼𞤢𞥄𞤲𞤮⹁ 𞤑𞤌𞤚𞤁𞤋𞤏𞤀𞤈 𞤬𞤫𞤰𞥆𞤢𞤼𞤢𞥄𞤲𞤮 𞤧𞤢𞤳𞤢 𞤩𞤫 𞤸𞤫𞤱𞤼𞤢 𞤳𞤢 𞤼𞤭𞤥𞥆𞤢𞤤 𞤬𞤭𞥅 𞤳𞤢𞤤𞤢 𞤳𞤮 𞤳𞤢𞤥𞤩𞤫 𞤼𞤮𞥅𞤤𞤲𞤵𞤲𞤮𞥅 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲. 𞤅𞤭 𞤩𞤫 𞤴𞤢𞤤𞤼𞤵𞤲𞤮⹁ 𞤯𞤵𞤥 𞤱𞤮𞤲𞤢𞤴𞤲𞤮 𞤸𞤫𞤪𞤧𞤢 𞤥𞤢𞤱𞤳𞤢 𞤱𞤮𞤲𞤢𞤲𞤣𞤫 𞤥𞤢𞤱𞤯𞤭 𞤑𞤌𞤚𞤁𞤋𞤏𞤀𞤈 𞤯𞤭𞤲.

𞤍𞤵𞥅𞤯𞤵𞤩𞤫 𞤼𞤭𞤶𞥆𞤢𞤲𞤮𞥅𞤳𞤭 𞤯𞤭𞥅 𞤃𞤢𞤱𞤯𞤭 𞤑𞤌𞤚𞤁𞤋𞤏𞤀𞤈 𞤥𞤵𞥅𞤼𞤮𞤼𞤮𞤲𞤮 𞤩𞤢𞥄𞤱𞤮 𞤃𞤀𞤈𞤌𞤑 𞤤𞤵𞤥𞤦𞤭𞤲𞤣𞤫 𞤯𞤭⹁ 𞤼𞤫𞤽𞤼𞤭𞤲𞤭 𞤲𞤣𞤫 𞤩𞤢𞤲𞤺𞤵𞤲𞤮𞥅 𞤱𞤮𞤲𞤣𞤫𞤥𞤢 𞤳𞤮 𞤳𞤢𞤲𞤶𞤭 𞤫 𞤐𞤘𞤢𞤴𞤵𞥅𞤶𞤭 𞤅𞤉𞤐𞤉𞤘𞤀𞤂 𞤯𞤭𞤲 𞤬𞤮𞤼𞥆𞤢𞤴𞤲𞤮𞥅 𞤳𞤢 𞤶𞤫𞥅𞤼𞤢𞤼𞤢𞤩𞤢𞤤. 𞤑𞤮𞤲𞤮 𞤯𞤭𞥅 𞤃𞤢𞤱𞤯𞤭 𞤶𞤵𞤸𞤭 𞤢𞤣𞤵𞤲𞤢𞥄𞤪𞤵 𞤲𞤣𞤵𞤲 𞤬𞤮𞤨 𞤩𞤢𞥄𞤱𞤮 𞤯𞤭 𞤴𞤢𞤤𞤼𞤭𞤲𞤣𞤫 𞤅𞤉𞤐𞤉𞤘𞤀𞤂 𞤸𞤢𞤴 𞤧𞤭 𞤼𞤢𞤱𞤭𞥅 𞤳𞤮 𞤳𞤢 𞤤𞤢𞤼𞤮 𞤳𞤵𞥅𞤤𞤫. 𞤇𞤢𞥄𞤱𞤼𞤭 𞤯𞤵𞤥⹁ 𞤯𞤭𞥅 𞤃𞤢𞤱𞤯𞤭 𞤣𞤵𞤯𞥆𞤭 𞤃𞤀𞤂𞤋 𞤫 𞤑𞤌𞤐𞤘𞤌 𞤁𞤋𞥅𞤅𞤐𞤀𞥄𞤈𞤋 𞤧𞤭 𞤯𞤭 𞤸𞤢𞤱𞤪𞤭 𞤫 𞤁𞤵𞤼𞤫 𞤐𞤀𞤔𞤉𞤈𞤋𞤒𞤀 𞤯𞤫𞤲 𞤳𞤢 𞤼𞤭𞤥𞥆𞤢𞤤.

𞤖𞤢𞤪𞤭 𞤩𞤫𞥅 𞤯𞤭𞤯𞤮 𞤬𞤮𞤼𞥆𞤭𞥅𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤮 𞤫 𞤣𞤫𞤲𞤼𞤢𞤤 𞤺𞤮𞥅𞤼𞤢𞤤 𞤲𞤺𞤢𞤤 𞤩𞤫 𞤶𞤫𞤴𞤢𞤲𞤮𞥅. 𞤌𞤲𞤼𞤵𞤥𞤢 𞤐𞤀𞤔𞤉𞤈𞤋𞤒𞤀 𞤨𞤭𞤴𞤵𞤲𞤮 𞤑𞤌𞤚𞤁𞤋𞤏𞤀𞤈 𞤳𞤵𞥅𞤤𞤢𞤤 𞤺𞤮𞥅𞤼𞤢𞤤. 𞤑𞤮𞤲𞤮⹁ 𞤱𞤮𞤲𞤢𞥄 𞤳𞤮 𞤱𞤮𞥅𞤱𞤭 𞤳𞤮𞤲 𞤱𞤢𞤯𞤭 𞤸𞤢𞤲𞤳𞤭 𞤳𞤢 𞤊𞤭𞤶𞤭𞤪𞤣𞤫 𞤃𞤢𞤱𞤲𞤣𞤫 𞤀𞤂𞤖𞤀𞤅𞤀𞥄𞤐 𞤏𞤀𞤚𞤀𞤈𞤀.

𞤑𞤮 𞤐𞤀𞤔𞤉𞤈𞤋𞤒𞤀 𞤤𞤫 𞤢𞤣𞤭𞥅 𞤲𞤢𞥄𞤣𞤵𞤣𞤫 𞤳𞤵𞥅𞤤𞤢𞤤 𞤢𞤪𞤢𞤲𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥘.  𞤑𞤮 𞤏𞤋𞤂𞤋𞤒𞤀𞤃𞤅 𞤉𞤑𞤌𞤐𞤘 𞤱𞤮𞤲𞤭 𞤳𞤮 𞤲𞤢𞥄𞤣𞤢𞤲𞤭 𞤲𞤺𞤢𞤤 𞤐𞤀𞤔𞤉𞤈𞤋𞤒𞤀. 𞤑𞤮 𞤑𞤌𞤚𞤁𞤋𞤏𞤀𞤈 𞤩𞤵𞤪𞤵𞤲𞤮𞥅  𞤤𞤫 𞤶𞤢𞥄𞤤𞤢𞥄𞤣𞤫 𞤫 𞤬𞤭𞤶𞤮 𞤲𞤺𞤮𞤲.

𞤑𞤮 𞤸𞤮𞥅𞤪𞤫 𞥑 – 𞥐 𞤩𞤫 𞤬𞤮𞤱𞤼𞤮𞤪𞤭. 𞤇𞤢𞤴𞤼𞤭 𞤩𞤫 𞤪𞤵𞤼𞥆𞤭𞤳𞤫 𞤳𞤢 𞤼𞤢𞤴𞤪𞤫 𞤯𞤭𞤯𞤥𞤫𞤪𞤫⹁ 𞤊𞤈𞤀𞤐𞤑  𞤑𞤉𞤅𞤋𞤒𞤉 𞤱𞤵𞤪𞤼𞤢𞤲𞤭 𞤑𞤌𞤚𞤁𞤋𞤜𞤀𞥄𞤈 𞤳𞤵𞥅𞤤𞤢𞤤 𞤲𞤺𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥒. 𞤑𞤢 𞤸𞤮𞤶𞤮𞤥𞤢𞥄𞤪𞤫 𞥘𞥒⹁ 𞤅𞤉𞤄𞤀𞤅𞤚𞤋𞤒𞤉𞤐 𞤖𞤀𞤂𞤉𞥅𞤈 𞤯𞤭𞤯𞤥𞤭𞤼𞤢𞤲𞤭 𞤑𞤌𞤚𞤁𞤋𞤜𞤀𞥄𞤈 𞤩𞤢𞥄𞤱𞤮 𞤅𞤋𞤃𞤌𞤐 𞤀𞤁𞤉𞤐𞤘𞤈𞤀 𞤪𞤮𞤼𞥆𞤢𞤲𞤣𞤫 𞤥𞤮.

𞤑𞤮 𞤸𞤮𞥅𞤪𞤫 𞥒-𞥑 𞤱𞤮𞤲𞤢𞤲𞤣𞤫 𞤑𞤌𞤚𞤁𞤋𞤏𞤀𞤈 𞤬𞤭𞤶𞤮 𞤲𞤺𞤮𞤲 𞤼𞤭𞤥𞥆𞤭.

𞤑𞤌𞤚𞤁𞤋𞤏𞤀𞤈 𞤸𞤫𞤲𞤣𞤭 𞤊𞤫𞤤𞤲𞤺𞤮 𞤳𞤢𞤲𞤽𞤫 𞤲𞤺𞤮𞤲 𞤳𞤢𞤻𞤵𞤲 𞤫 𞤣𞤵𞤦𞤵𞤲𞤫 (𞤥𞤭𞤤𞤭𞤴𞤮𞤲) 𞤶𞤫𞥅𞤯𞤭𞤯𞤭 𞤣𞤢𞤤𞤢. 𞤐𞤀𞤔𞤉𞤈𞤋𞤒𞤀 𞤴𞤭𞤤𞤼𞤮𞤣𞤭 𞤫 𞤐𞤦𞤢𞤪𞤶𞤢𞥄𞤪𞤭 𞤑𞤢𞥄𞤤𞤭𞤧𞤭 𞤳𞤢𞤻𞤵𞤲 𞤫 𞤣𞤵𞤦𞤵𞤲𞤫 𞤲𞤢𞤴𞤭 𞤣𞤢𞤤𞤢. 𞤀𞤊𞤈𞤋𞤑 𞤙𞤀𞥄𞤃𞤐𞤀𞥄𞤈𞤋 𞤴𞤫𞤯𞤢𞥄 𞤧𞤭𞤤𞤢 𞤩𞤢𞥄𞤱𞤮 𞤩𞤫 𞤨𞤭𞤴𞤵𞤣𞤫 𞤑𞤌𞤐𞤘𞤌 𞤁𞤋𞥅𞤅𞤐𞤀𞥄𞤈𞤋. 𞤃𞤮 𞤳𞤢𞤤𞤢 𞤥𞤢𞤩𞥆𞤫 𞤲𞤮𞤲 𞤪𞤵𞤼𞥆𞤮𞤣𞤢𞤴 𞤫 𞤣𞤵𞤦𞤵𞤲𞤫 𞤯𞤭𞤯𞤭 𞤫 𞤬𞤫𞤷𞥆𞤫𞤪𞤫 𞤣𞤢𞤤𞤢.

𞤋𞤧𞤳𞤭𞤲 𞤑𞤌𞤚𞤁𞤋𞤜𞤀𞥄𞤈.
𞤉𞤲 𞤳𞤮 𞤢𞤪𞤮𞤴𞤼𞤢 𞤳𞤢𞤣𞤭 𞤃𞤀𞤈𞤌𞤑 𞥒𞥐𞥒𞥕🖐🏿


𞤒𞤮𞤼𞥆𞤭𞤲𞤢𞤲𞤣𞤫 𞤀𞤴𞥃𞤢 𞤅𞤮𞥅