𞤑𞤌 𞤀𞤈𞤔𞤀𞤐𞤚𞤋𞤐𞤀 𞤉 𞤊𞤀𞤈𞤀𞤐𞤅𞤋 𞤑𞤀 𞤚𞤋𞤃𞥆𞤀𞤂

𞤀𞤈𞤔𞤀𞤐𞤚𞤋𞤐𞤀 🇦🇷 𞥓 – 𞥐 🇭🇷 𞤑𞤌𞤈𞤌𞤏𞤀𞤅𞤋

𞤑𞤮 𞤼𞤭𞤶𞥆𞤢𞤲𞤮𞥅 𞤳𞤮𞤲 𞤼𞤵𞤤𞤼𞤢𞥄𞤤𞤭. 𞤊𞤭𞥅 𞤳𞤢𞤤𞤢 𞤦𞤵𞤴 𞤲𞤮 𞤶𞤮𞤺𞤢𞤲𞤭𞤲𞤮𞥅 𞤑𞤌𞤈𞤌𞤏𞤀𞤅𞤋 𞤼𞤢𞤥𞤢𞤱𞤵 𞤩𞤢𞥄𞤱𞤮 𞤩𞤫 𞤴𞤢𞤤𞤼𞤭𞤲𞤣𞤫 𞤄𞤀𞤈𞤀𞤅𞤋𞤂⹁ 𞤶𞤢𞤳𞤢 𞤸𞤢𞤪𞤭 𞤩𞤫 𞤬𞤮𞤼𞥆𞤢𞥄𞤤𞤭 𞤱𞤮𞤲𞤭 𞤫 𞤩𞤵𞤪𞤵𞤩𞤫 𞤩𞤫. 𞤉 𞤥𞤢𞤱𞤦𞤢𞥄𞤪𞤫 𞥑𞥓 𞤦𞤮𞤱𞤼𞤮 𞥒𞥐𞥒𞥒⹁ 𞤩𞤫 𞤬𞤮𞤼𞥆𞤵𞤲𞤮 𞤫 𞤀𞤈𞤔𞤀𞤐𞤚𞤋𞤐𞤀⹁ 𞤳𞤭𞤨𞥆𞤮𞤤 𞤃𞤉𞤅𞤋 𞤲𞤺𞤮𞤤⹁ 𞤩𞤫𞤲 𞤨𞤭𞤴𞤭 𞤩𞤫 𞤨𞤭𞤺𞥆𞤢𞤤 𞤲𞤺𞤢𞤤 𞤩𞤫 𞤴𞤢𞥄𞤱𞤢𞤼𞤢𞥄 𞤴𞤫𞤶𞥆𞤵𞤼𞤵𞤣𞤫.

𞤑𞤮 𞤳𞤵𞥅𞤤𞤫 𞥓 𞤀𞤈𞤔𞤀𞤐𞤚𞤋𞤐𞤀 𞤱𞤢𞤯𞤭 𞤩𞤫. 𞤉 𞤸𞤭𞤲𞤮 𞤤𞤫⹁ 𞤑𞤌𞤈𞤌𞤏𞤀𞤅𞤋 𞤲𞤮 𞤼𞤢𞤱𞤢𞤲𞤮𞥅 𞤫 𞤳𞤭𞤨𞥆𞤭 𞤩𞤵𞤪𞤢𞤲𞤮𞥅𞤯𞤭 𞤸𞤮𞥅𞤤𞤮𞤪𞤫𞥅𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮.

𞤑𞤮 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥓𞥓 𞤃𞤉𞤅𞤋 𞤵𞤣𞥆𞤭𞤼𞤭 𞤳𞤵𞥅𞤤𞤫 𞤯𞤫𞤲 𞤲𞤣𞤫 𞤮 𞤴𞤫𞤯𞤢𞤲𞤮𞥅 𞤤𞤢𞤼𞤫𞤪𞤫 𞤩𞤢𞥄𞤱𞤮 𞤂𞤋𞤏𞤀𞤑𞤌𞤜𞤋𞤕⹁ 𞤸𞤭𞤱𞤮𞥅𞤱𞤮 𞤑𞤌𞤈𞤌𞤏𞤀𞤅𞤋 𞤮𞤲 𞤦𞤵𞤩𞥆𞤢𞥄𞤣𞤫 𞤀𞤂𞤜𞤀𞤈𞤉𞤅. 𞤑𞤢 𞤸𞤮𞤶𞤮𞤥𞤢𞥄𞤪𞤫 𞥓𞥙⹁ 𞤀𞤂𞤜𞤀𞤈𞤉𞤅 𞤯𞤭𞤯𞤥𞤭𞤼𞤭. 𞤑𞤮 𞤸𞤮𞥅𞤪𞤫 𞤯𞤫𞤲 𞤳𞤵𞥅𞤤𞤫 𞤯𞤭𞤯𞤭 𞤩𞤫 𞤸𞤮𞤥𞤦𞤭𞤪𞤭 𞤬𞤫𞤷𞥆𞤫𞤪𞤫 𞤢𞤪𞤢𞤲𞤫𞤪𞤫 𞤲𞤣𞤫𞤲. 𞤇𞤢𞤴𞤼𞤭 𞤩𞤫 𞤪𞤵𞤼𞥆𞤭𞤳𞤫⹁ 𞤀𞤂𞤜𞤀𞤈𞤉𞤅 𞤼𞤢𞤼𞤥𞤭𞤼𞤢𞤲𞤭
𞤀𞤈𞤔𞤀𞤐𞤚𞤋𞤐𞤀 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥖𞥙. 𞤑𞤮 𞤮𞤲𞤼𞤵𞤥𞤢 𞤑𞤮𞤪𞤮𞤱𞤢𞤧𞤭𞥅𞤩𞤫 𞤩𞤫𞤲 𞤼𞤢𞤰𞤭𞥅. 𞤇𞤫 𞤫𞤼𞤭𞤲𞤮 𞤳𞤮𞤲𞤮 𞤩𞤫 𞤱𞤢𞥄𞤱𞤢𞤤𞤭. 𞤑𞤢 𞤃𞤉𞤅𞤋 𞤲𞤢𞥄𞤣𞤵𞤲𞤮𞥅 𞤤𞤢𞤼𞤫𞤪𞤫 𞤲𞤣𞤫𞤲⹁ 𞤫𞤩𞥆𞤮𞥅𞤶𞤫 𞤑𞤌𞤈𞤌𞤏𞤀𞤅𞤋 𞤯𞤫𞤲 𞤬𞤮𞤨 𞤶𞤭𞥅𞤩𞤮𞤪𞤭 𞤩𞤫.

𞤑𞤮 𞤸𞤭𞤳𞥆𞤢 𞤯𞤮𞥅 𞤼𞤭𞤥𞥆𞤢𞤼𞤢 𞤤𞤢𞥄𞤦𞤭 𞤶𞤫𞥅𞤺𞤮𞤮 𞤀𞤈𞤔𞤀𞤐𞤚𞤋𞤐𞤀 𞤲𞤮 𞤼𞤢𞤱𞤫𞥅𞤣𞤫 𞤫 𞤼𞤭𞤥𞥆𞤢𞤤 𞤬𞤮𞥅𞤤𞤮𞤼𞤭𞤪𞤮 𞤬𞤭𞥅 𞤬𞤫𞤤𞤺𞤮 𞤢𞤣𞤵𞤲𞤢𞤴𞤢𞤲𞤳𞤮𞤱𞤮 𞤲𞤺𞤮𞤲. 𞤉 𞤲𞤣𞤫𞤪 𞤤𞤢𞥄𞤦𞤭 𞤶𞤮𞤱𞤭 𞤯𞤭 𞤩𞤫 𞤬𞤭𞤶𞤭 𞤯𞤭𞤲 𞤼𞤢𞤸𞤮⹁ 𞤑𞤭𞤨𞥆𞤮𞤤 𞤀𞤈𞤔𞤀𞤐𞤚𞤋𞤐𞤀 𞤰𞤫𞤼𞥆𞤭𞥅 𞤬𞤫𞤤𞤺𞤮 𞤲𞤺𞤮𞤲 𞤤𞤢𞥄𞤦𞤭 𞤯𞤭𞤯𞤭. 𞤉 𞤸𞤭𞤼𞤢𞥄𞤲𞤣𞤫 𞥑𞥙𞥗𞥘 𞤴𞤫𞥅𞤧𞤮 𞤖𞤌𞤂𞤀𞤐𞤁 𞤲𞤣𞤫 𞤩𞤫 𞤱𞤫𞥅𞤪𞤲𞤵𞤲𞤮𞥅 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲. 𞤍𞤭𞤯𞤢𞤩𞤵𞤲 𞤯𞤵𞤲 𞤳𞤮 𞤫 𞤸𞤭𞤼𞤢𞥄𞤲𞤣𞤫 𞥑𞥙𞥘𞥖 𞤲𞤣𞤫 𞤬𞤮𞥅𞤤𞤮𞤼𞤭𞤪𞤮 𞤲𞤺𞤮𞤲 𞤱𞤢𞤯𞤵𞤲𞤮𞥅 𞤃𞤉𞤑𞤅𞤋𞤑𞤌. 𞤌𞤲𞤼𞤵𞤥𞤢 𞤔𞤌𞤘𞤌 𞤃𞤀𞤈𞤀𞤁𞤌𞤐𞤀 𞤱𞤢𞤤𞥆𞤭 𞤀𞤈𞤔𞤀𞤐𞤚𞤋𞤐𞤀 𞤨𞤭𞤴𞤵𞤺𞤮𞤤 𞤀𞤂𞤃𞤀𞤙 𞤖𞤋𞤈𞤐𞤀 𞤳𞤵𞥅𞤤𞤫 𞤼𞤢𞤼𞤭 𞤩𞤫𞤲 𞤱𞤵𞤪𞤼𞤭 𞤯𞤭𞤯𞤭. 𞤘𞤢𞥄𞤴𞤭 𞤯𞤭𞥅 𞤤𞤢𞥄𞤦𞤭 𞤯𞤭𞤯𞤭 𞤯𞤮𞤮⹁ 𞤀𞤈𞤔𞤀𞤐𞤚𞤋𞤐𞤀 𞤬𞤭𞤶𞤭𞥅 𞤳𞤢𞤣𞤭 𞤼𞤭𞤥𞥆𞤫 𞤼𞤢𞤼𞤭 𞤳𞤮𞤲𞤮 𞤩𞤫 𞤬𞤮𞥅𞤤𞤢𞥄.
𞤓𞤪𞤵𞤺𞤵𞤱𞤫 𞤨𞤭𞤴𞤵𞤲𞤮 𞤩𞤫 𞤳𞤢 𞤼𞤭𞤥𞥆𞤢𞤤 𞤸𞤭𞤼𞤢𞥄𞤲𞤣𞤫 𞥑𞥙𞥓𞥐⹁ 𞤫 𞥑𞥙𞥙𞥐⹁ 𞤀𞤂𞤃𞤀𞤙 𞤨𞤭𞤴𞤭 𞤩𞤫 𞤳𞤢𞤣𞤭 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔.

𞤃𞤉𞤅𞤋 𞤸𞤮𞤤𞥆𞤭𞥅 𞤱𞤮𞤲𞤣𞤫𞤥𞤢 𞤮 𞤬𞤭𞤶𞤭𞤼𞤢𞤼𞤢𞥄 𞤫 𞤬𞤮𞥅𞤤𞤮𞤼𞤭𞤪𞤮 𞤬𞤭𞥅 𞤬𞤫𞤤𞤺𞤮 𞤢𞤣𞤵𞤲𞤢𞤴𞤢𞤲𞤳𞤮𞤱𞤮 𞤲𞤺𞤮𞤲 𞤩𞤢𞥄𞤱𞤮 𞤸𞤭𞤳𞥆𞤢 𞤬𞤭𞥅 𞤳𞤢𞤤𞤢 𞤸𞤢𞤪𞤭 𞤮 𞤸𞤢𞥄𞤤𞤭𞥅𞤲𞤮 𞤯𞤵𞤲 𞤳𞤮𞤲𞤮 𞤮 𞤬𞤭𞤪𞤼𞤭.

𞤊𞤀𞤈𞤀𞤐𞤅𞤋 🇫🇷 𞥒 – 𞥐 🇲🇦 𞤃𞤀𞤈𞤌𞤑

𞤊𞤀𞤈𞤀𞤐𞤅𞤋 𞤼𞤢𞤱𞤼𞤭𞥅 𞤀𞤈𞤔𞤀𞤐𞤚𞤋𞤐𞤀 𞤳𞤢 𞤼𞤭𞤥𞥆𞤮𞥅𞤣𞤫 𞤬𞤮𞥅𞤤𞤮𞤼𞤭𞤪𞤮 𞤫 𞤤𞤢𞤼𞤮 𞤥𞤵𞤤𞥆𞤫𞤪𞤫 𞤢𞤣𞤵𞤲𞤢𞤴𞤢𞤲𞤳𞤮𞤱𞤮 𞤲𞤺𞤮𞤲.

𞤑𞤮 𞤴𞤫𞤤𞤢 𞤀𞤬𞤪𞤭𞤳𞤲𞤢𞥄𞤩𞤫 𞤫 𞤢𞥄𞤪𞤢𞤦𞤫𞥅𞤩𞤫 𞤯𞤵𞥅𞤯𞤵𞤩𞤫⹁ 𞤊𞤀𞤈𞤀𞤐𞤅𞤋 𞤦𞤮𞤲𞥆𞤭𞤼𞤭 𞤲𞤣𞤫 𞤩𞤫 𞤨𞤭𞤴𞤵𞤲𞤮𞥅 𞤃𞤀𞤈𞤌𞤑 𞤬𞤭𞥅 𞤲𞤮 𞤩𞤫 𞤬𞤫𞤰𞥆𞤭𞤪𞤢. 𞤑𞤌 𞤳𞤵𞥅𞤤𞤫 𞤯𞤭𞤯𞤭 𞤩𞤫 𞤨𞤭𞤴𞤭𞤪𞤭 𞤩𞤫 𞤳𞤢 𞤬𞤭𞤶𞤭𞤪𞤣𞤫 𞤀𞤂 𞤄𞤀𞤒𞤚 𞤅𞤚𞤉𞤁𞤋𞤒𞤌𞤃.

𞤃𞤀𞤈𞤌𞤑 𞤫𞤼𞤭𞤲𞤮 𞤤𞤫 𞤬𞤮𞤼𞤢⹁ 𞤩𞤫 𞤱𞤮𞥅𞤨𞤭 𞤳𞤵𞥅𞤤𞤫 𞤯𞤵𞥅𞤯𞤵𞤯𞤫 𞤫 𞤸𞤮𞥅𞤪𞤫 𞤯𞤵𞤥 𞤳𞤢𞤣𞤭 𞤳𞤮 𞤳𞤢𞤥𞤩𞤫 𞤩𞤵𞤪𞤵𞤲𞤮𞥅 𞤬𞤭𞤶𞤵𞤣𞤫. 𞥖𞥐 𞤫 𞤲𞤣𞤫𞤪 𞤼𞤫𞥅𞤥𞤫𞤣𞤫𞤪𞤫⹁ 𞤳𞤮 𞤳𞤢𞤥𞤩𞤫 𞤶𞤮𞤺𞤭𞤲𞤮𞥅 𞤥𞤵𞤤𞥆𞤫𞤪𞤫 𞤲𞤣𞤫𞤲. 𞤑𞤮𞤲𞤮⹁ 𞤩𞤫 𞤼𞤢𞤱𞤵𞤲𞤮 𞤩𞤢𞥄𞤱𞤮𞥅𞤩𞤫 𞤊𞤢𞤪𞤢𞤲𞤧𞤭 𞤩𞤫𞤲 𞤲𞤮 𞤳𞤫𞤤𞤯𞤭. 𞤚𞤢𞤱𞤭 𞤳𞤢𞤣𞤭⹁ 𞤊𞤀𞤈𞤀𞤐𞤅𞤋 𞤲𞤮 𞤩𞤵𞤪𞤭 𞤩𞤫 𞤰𞤮𞤴𞤪𞤫 𞤫 𞤰𞤢𞤰𞥆𞤢𞤲𞤣𞤫 𞤬𞤭𞤶𞤮 𞤲𞤺𞤮𞤲 𞤧𞤢𞤦𞤵𞤲𞤢 𞤸𞤭𞤩𞤫 𞤩𞤵𞤪𞤭 𞤃𞤀𞤈𞤌𞤑 𞤱𞤮𞥅𞤱𞤼𞤵𞤺𞤮𞤤 𞤼𞤢𞤱𞤫𞥅𞤣𞤫 𞤫 𞤲𞤺𞤮𞥅 𞤬𞤮𞥅𞤤𞤮𞤼𞤭𞤪𞤮.

𞤊𞤭𞤶𞤮 𞤲𞤺𞤮𞤲 𞤬𞤵𞤯𞥆𞤭 𞤼𞤵𞤲⹁ 𞤊𞤀𞤈𞤀𞤐𞤅𞤋 𞤸𞤫𞤩𞤭 𞤳𞤵𞥅𞤤𞤢𞤤 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥕. 𞤑𞤮 𞤖𞤉𞤈𞤐𞤀𞤐𞤁𞤉𞤅 𞤲𞤢𞥄𞤣𞤢𞤲𞤭 𞤩𞤫 𞤲𞤺𞤢𞤤. 𞤑𞤌𞤂𞤌 𞤃𞤓𞤖𞤀𞤐𞤋 𞤯𞤭𞤯𞤥𞤭𞤼𞤢𞤲𞤭 𞤊𞤀𞤈𞤀𞤐𞤅𞤋 𞤳𞤢 𞤸𞤮𞤶𞤮𞤥𞤢𞥄𞤪𞤫 𞥗𞥙 𞤸𞤢𞤪𞤭 𞤮𞤥𞤮 𞤲𞤢𞥄𞤼𞤭 𞤤𞤮𞤲𞤼𞤮 𞤓𞤅𞤃𞤀𞥄𞤐 𞤁𞤉𞤃𞤄𞤉𞤂𞤉 𞤸𞤢𞤴 𞤼𞤭𞤥𞥆𞤢𞤤𞤭 𞤸𞤮𞤶𞤮𞤥𞤢𞥄𞤶𞤫 𞤯𞤭𞤯𞤭.
𞤑𞤮 𞤫 𞤤𞤢𞤼𞥆𞤮 𞤥𞤵𞤤𞥆𞤫𞤪𞤫 𞤼𞤢𞤲⹁ 𞤴𞤭𞤫𞤼𞤫𞥅 𞤳𞤢 𞤲𞤣𞤮𞤲𞤼𞤮𞥅𞤪𞤭 𞤨𞤭𞤴𞤭 𞤲𞤺𞤢𞤴𞤵𞥅𞤶𞤭.

𞤊𞤫𞤱𞤲𞤣𞤮 𞤯𞤮𞥅 𞤳𞤮 𞤊𞤀𞤈𞤀𞤐𞤅𞤋 𞤶𞤮𞤺𞤭𞥅 𞤬𞤫𞤤𞤺𞤮 𞤲𞤺𞤮𞤲. 𞤲𞤢𞤲𞤣𞤭 𞤩𞤫 𞤬𞤢𞥄𞤤𞤢 𞤸𞤮𞥅𞤼𞤵𞤣𞤵𞤣𞤫 𞤫 𞤥𞤢𞤺𞥆𞤮 𞤧𞤭 𞤀𞤈𞤔𞤀𞤐𞤚𞤋𞤐𞤀 𞤢𞤷𞥆𞤭𞥅. 𞤑𞤢𞤥𞤩𞤫 𞤯𞤮𞥅 𞤯𞤭𞤯𞤮⹁ 𞤸𞤭𞤩𞤫 𞤬𞤮𞤼𞤢 𞤫 𞤰𞤫𞤼𞥆𞤵𞤺𞤮𞤤 𞤬𞤫𞤤𞤺𞤮 𞤧𞤢𞤦𞤵𞤲𞤢 𞤥𞤮 𞤳𞤢𞤤𞤢 𞤫 𞤥𞤢𞤩𞥆𞤫 𞤰𞤫𞤼𞥆𞤭𞥅 𞤤𞤢𞥄𞤦𞤭 𞤯𞤭𞤯𞤵.

𞤑𞤮 𞤉 𞤸𞤭𞤼𞤢𞥄𞤲𞤣𞤫 𞥑𞥙𞥙𞥘 𞤊𞤀𞤈𞤀𞤐𞤅𞤋 𞤰𞤫𞤼𞥆𞤭 𞤬𞤫𞤤𞤺𞤮 𞤲𞤺𞤮𞤲 𞤳𞤢 𞤢𞤪𞤢𞤲𞤵𞤲 𞤲𞤣𞤫 𞤩𞤫 𞤨𞤭𞤴𞤵𞤲𞤮𞥅 𞤄𞤀𞤈𞤀𞤅𞤋𞤂 𞤳𞤢 𞤼𞤭𞤥𞥆𞤢𞤤 𞤳𞤵𞥅𞤤𞤫 𞤼𞤢𞤼𞤭.
𞤉 𞤸𞤭𞤼𞤢𞥄𞤲𞤣𞤫 𞥒𞥐𞥑𞥘 𞤩𞤫 𞤰𞤫𞤼𞥆𞤭 𞤯𞤭𞤯𞤢𞤩𞤵𞤲 𞤲𞤣𞤫 𞤩𞤫 𞤬𞤮𞤼𞥆𞤵𞤲𞤮𞥅 𞤫 𞤑𞤌𞤈𞤌𞤏𞤀𞤅𞤋 𞤳𞤢 𞤼𞤭𞤥𞥆𞤢𞤤. 𞤇𞤫 𞤨𞤭𞤴𞤭 𞤩𞤫𞤲 𞤳𞤵𞥅𞤤𞤫 𞤲𞤢𞤴𞤭 𞤭𞤼𞥆𞤭 𞤯𞤭𞤯𞤭 .


𞤉 𞤬𞤮𞥅𞤤𞤮𞤼𞤭𞤪𞤢𞤤 𞤲𞤺𞤢𞤤 𞤑𞤀𞤚𞤀𞤈 𞤸𞤭𞤳𞤢𞥄 𞤲𞤮 𞤸𞤫𞤣𞥆𞤭𞥅 𞤬𞤭𞤶𞤢𞤲𞤯𞤫 𞤯𞤭𞤯𞤭. 𞤉 𞤖𞤮𞤪𞤦𞤭𞤪𞥆𞤫 𞤻𞤢𞤤𞤲𞤣𞤫 𞥑𞥗 𞤄𞤮𞤱𞤼𞤮⹁ 𞤃𞤀𞤈𞤌𞤑 𞤫 𞤑𞤌𞤚𞤌𞤏𞤀𞤅𞤋 𞤬𞤭𞤶𞤢𞤴 𞤬𞤭𞥅 𞤣𞤢𞤪𞤲𞤣𞤫 𞤼𞤢𞤼𞤢𞤩𞤫𞤪𞤫 𞤲𞤣𞤫𞤲. 𞤖𞤢𞤪𞤭 𞤩𞤫 𞤬𞤮𞤼𞥆𞤭𞥅𞤲𞤮 𞤳𞤢 𞤬𞤭𞤶𞤮 𞤣𞤫𞤲𞤼𞤫⹁ 𞤩𞤫 𞤧𞤫𞥅𞤣𞤭 𞤸𞤮𞥅𞤪𞤫 𞤩𞤮𞤤𞤢𞤤.

𞤑𞤮 𞤫 𞤪𞤫𞤬𞤦𞤭𞤪𞥆𞤫⹁ 𞤻𞤢𞤤𞤲𞤣𞤫 𞥑𞥘 𞤄𞤮𞤱𞤼𞤮⹁ 𞤢𞤲𞤣𞤫𞤲𞤼𞤫𞤲 𞤸𞤢𞤳𞥆𞤵𞤲’𞤣𞤫 𞤐𞤄𞤀𞤆𞤉 𞤫 𞤃𞤉𞤅𞤋 𞤳𞤮 𞤸𞤮𞤥𞤦𞤮 𞤩𞤢𞤥𞤼𞤢𞤼𞤢 𞤬𞤫𞤤𞤺𞤮 𞤲𞤺𞤮𞤲.