𞤖𞤀𞤆𞥆𞤓𞤘𞤌𞤂 𞤕𞤌𞤘𞥆𞤓 𞤐𞤌 𞤀𞤁𞥆𞤓𞤁𞤉 𞤕𞤀𞤍𞤉𞥅𞤂𞤉

𞤖𞤫𞤱𞤼𞤭𞥅 𞤳𞤢 𞤴𞤫𞥅𞤴𞤵𞤺𞤮𞤤 𞤥𞤢𞥄𞤪𞤮 𞤼𞤫𞤣𞥆𞤭𞤼𞤭𞤪𞤢 𞤴𞤫𞥅𞤴𞤭𞤼𞤮𞥅𞤩𞤫 𞤩𞤫𞤲 𞤳𞤢 𞤳𞤢𞤱𞤼𞤫 𞤫 𞤳𞤢 𞤣𞤮𞤱𞤪𞤭 𞤘𞤭𞤲𞤫.

𞤒𞤫𞥅𞤴𞤭𞤪𞤯𞤫 𞤥𞤢𞥄𞤪𞤮 𞤺𞤮𞥅 𞤮𞤥𞤦𞤢𞥄𞤥𞤢 𞤫 𞤲𞤣𞤫𞤪 𞤑𞤮𞤲𞤢𞥄𞤳𞤪𞤭𞤪𞤭 𞤧𞤢𞤦𞤵 𞤤𞤵𞤲𞤣𞤢𞤺𞤮𞤤 𞤷𞤮𞤺𞥆𞤵 𞤲𞤺𞤵 𞤶𞤢𞥄𞤺𞤮𞤪𞤢𞤤 𞤘𞤭𞤲𞤫 𞤲𞤺𞤢𞤤 𞤸𞤢𞤨𞥆𞤭.

𞤚𞤭𞤨𞥆𞤵𞤣𞤫 𞤫 𞤳𞤢𞥄𞤤𞤣𞤭𞤺𞤢𞤤 𞤸𞤢𞤳𞥆𞤵𞤲’𞤣𞤫 𞤶𞤢𞥄𞤺𞤮𞤪𞤢𞤤 𞤘𞤋𞤐𞤉 𞤲𞤺𞤢𞤤 𞤳𞤢 𞤲𞤺𞤫𞤴𞤺𞤵 𞤫 𞤅𞤵𞥅𞤣𞤵 𞤐𞤘𞤫𞤴𞤺𞤵 𞤘𞤫𞤲𞤣𞤭𞥅𞤪𞤵 𞤲𞤣𞤵𞤲⹁ 𞤤𞤢𞥄𞤥𞤵 𞤲𞤺𞤵𞤲 𞤸𞤢𞤨𞥆𞤭𞥅 𞤷𞤮𞤺𞥆𞤵 𞤻𞤢𞥄𞤥𞤤𞤭 𞤸𞤭𞤼𞥆𞤵𞤯𞤭 𞤯𞤭𞤲 𞤬𞤮𞤨 𞤫 𞤲𞤣𞤫𞤪 𞤤𞤫𞤴𞤣𞤭 𞤺𞤭𞤲𞤫 𞤲𞤣𞤭𞤲. 𞤍𞤵𞤥 𞤳𞤮 𞤱𞤢𞤲𞤮 𞤥𞤢𞥄𞤪𞤮⹁ 𞤲𞤫𞤦𞥆𞤢𞤲⹁ 𞤨𞤫𞤪𞤳𞤢𞤲 𞤥𞤢𞤤𞥆𞤢 𞤤𞤫𞤱𞤻𞤢𞤲⹁ 𞤼𞤭𞤲𞤺𞤫𞥅𞤪𞤫 𞤥𞤢𞤤𞥆𞤢 𞤦𞤢𞤧𞤢𞤤𞥆𞤫⹁ 𞤫 𞤳𞤮 𞤲𞤢𞤲𞤣𞤭 𞤫 𞤯𞤭𞥅.

𞤘𞤭𞤦𞤭 𞤻𞤢𞤤𞤲𞤣𞤫 𞤩𞤫 𞤳𞤮𞤤𞥆𞤭𞤲𞤭 (𞤧𞤭𞥅𞤻𞤭) 𞤳𞤢𞥄𞤤𞤣𞤭𞤺𞤢𞤤 𞤲𞤺𞤢𞤤⹁ 𞤯𞤵𞤥 𞤸𞤢𞤱𞤪𞤭 𞤻𞤢𞤤𞤲𞤣𞤫 𞥓𞥑 𞤅𞤭𞥅𞤤𞤮 𞥒𞥐𞥒𞥔⹁ 𞤳𞤮 𞤯𞤭𞥅 𞤷𞤮𞤺𞥆𞤭 𞤯𞤮𞤮 𞤸𞤢𞤨𞥆𞤢𞥄 𞤲𞤣𞤫𞤪 𞤑𞤮𞤲𞤢𞥄𞤳𞤭𞤪𞤭:

𞤕𞤮𞤺𞥆𞤵 𞤦𞤮𞥅𞤼𞤮 𞤥𞤢𞥄𞤪𞤮 𞤲𞤺𞤮 𞤑𞤭𞤤𞤮𞥅 𞥕𞥐⹁ 𞤳𞤮 𞥓𞥓𞥐.𞥐𞥐𞥐 𞤊𞤘 𞤳𞤢 𞤴𞤫𞥅𞤴𞤭𞤪𞤤𞤫 𞤥𞤢𞤱𞤯𞤫 𞤥𞤢𞤤𞥆𞤢 𞥓𞥔𞥐.𞥐𞥐𞥐 𞤊𞤘 𞤳𞤢 𞤴𞤫𞥅𞤴𞤭𞤼𞤮𞥅𞤩𞤫 𞤩𞤫𞤲. 𞤖𞤮𞥅𞤪𞤫 𞤯𞤵𞤲 𞤳𞤢𞤣𞤭⹁ 𞤳𞤢𞤤𞤢 𞤧𞤮𞥅𞤣𞤵𞤯𞤮 𞤳𞤢 𞤴𞤫𞥅𞤴𞤭𞤪𞤤𞤫 𞤥𞤢𞤱𞤯𞤫⹁ 𞤱𞤢𞤯𞤢𞤲𞤼𞤫 𞤳𞤢𞤴𞤣𞤭 𞤧𞤫𞥅𞤣𞤭𞤲𞤼𞤭𞤲𞤣𞤭 𞤳𞤮 𞤷𞤮𞤺𞥆𞤵 𞤸𞤢𞥄𞤲𞤵𞤲𞥋𞤺𞤵 𞤲𞤺𞤵𞤲 𞤮 𞤧𞤮𞥅𞤣𞤭𞤪𞤭.

𞤘𞤮𞤲𞤺𞤮𞥅𞤪𞤵 𞤥𞤢𞤤𞥆𞤢 𞤦𞤭𞤣𞤮𞤲𞤪𞤵 𞤲𞤫𞤦𞥆𞤢𞤲 CIAO 𞤲𞤣𞤵 𞤤𞤭𞥅𞤼𞤭 𞥒𞥐 𞤳𞤮 𞥒𞥙𞥐.𞥐𞥐𞥐 𞤊𞤘 𞤴𞤫𞥅𞤴𞤭𞤼𞤭𞤪𞤼𞤫𞥅

𞤄𞤮𞥅𞤼𞤮 𞤼𞤭𞤽𞤫 𞤥𞤢𞤤𞥆𞤢 𞤦𞤢𞤧𞤢𞤤𞥆𞤫 𞤳𞤮 𞥒𞥕𞥐.𞥐𞥐𞥐𞤊𞤘 𞤧𞤮𞥅𞤣𞤭𞤪𞤼𞤫𞥅⹁ 𞤴𞤫𞥅𞤴𞤭𞤼𞤭𞤪𞤫𞥅 𞥒𞥖𞥐.𞥐𞥐𞥐𞤊𞤘

𞤕𞤮𞤲𞤣𞤭 𞤳𞤢𞤥𞤢 (𞤬𞤢𞤪𞤭𞤲) 𞤳𞤮 𞥓𞥕𞥕.𞥐𞥐𞥐𞤊𞤘 𞤴𞤫𞥅𞤴𞤭𞤼𞤭𞤪𞤼𞤫𞥅.

𞤂𞤢𞥄𞤥𞤵 𞤲𞤺𞤵𞤲 𞤭𞤥𞥆𞤭𞤲𞤭𞥅 𞤼𞤫𞤬𞤮𞥅𞤩𞤫 𞤳𞤢 𞤳𞤢𞤱𞤼𞤫 𞤬𞤭𞥅 𞤲𞤣𞤢𞥄𞤪𞤵𞤺𞤮𞤤 𞤧𞤭 𞤷𞤮𞤺𞥆𞤭 𞤸𞤢𞤨𞥆𞤢𞥄𞤯𞤭 𞤯𞤭𞤲 𞤲𞤮 𞤻𞤭𞥅𞤩𞤲𞤢𞥄. 𞤑𞤮𞤲𞤮 𞤻𞤭𞥅𞤩𞤲𞤵𞤺𞤮𞤤 𞤯𞤭𞤲 𞤷𞤮𞤺𞥆𞤭 𞤲𞤮 𞤱𞤮𞥅𞤲𞤣𞤢𞤲𞤭 𞤫 𞤴𞤫𞥅𞤴𞤭𞤼𞤮𞥅𞤩𞤫 𞤩𞤫𞤲 𞤷𞤢𞤯𞤫𞥅𞤤𞤫. 𞤉 𞤥𞤭𞤧𞤢𞤤⹁ 𞤧𞤭 𞤩𞤫 𞤧𞤮𞥅𞤣𞤭𞤪𞤭𞥅 𞤥𞤢𞥄𞤪𞤮 𞥓𞥓𞥐.𞥐𞥐𞥐𞤊𞤘 𞤳𞤢 𞤤𞤵𞥅𞤥𞤮 𞤃𞤢𞤣𞤭𞥅𞤲𞤢⹁ 𞤳𞤮 𞤦𞤫𞥅 𞤩𞤫 𞤦𞤢𞤳𞤭𞤪𞤢 𞤳𞤮 𞤬𞤢𞤥𞤯𞤭 𞤱𞤮𞥅 𞥗.𞥐𞥐𞥐𞤊𞤘 𞤬𞤭𞥅 𞤴𞤮 𞤳𞤮 𞤸𞤫𞤱𞤼𞤵 𞤳𞤢 𞤬𞤵𞤲𞤺𞤮𞥅𞤶𞤭 𞤴𞤫𞥅𞤴𞤭𞤼𞤭𞤪𞤯𞤭 𞤥𞤢𞤩𞥆𞤫. 𞤅𞤭 𞤩𞤫 𞤴𞤫𞥅𞤴𞤭𞤼𞤭𞤪𞤭𞥅 𞤥𞤢𞥄𞤪𞤮 𞤳𞤮𞤲 𞥓𞥔𞥐.𞥐𞥐𞥐𞤊𞤘⹁ 𞤳𞤮 𞥓.𞥐𞥐𞥐𞤊𞤘 𞤨𞤫𞤼 𞤩𞤫 𞤸𞤫𞤩𞤢𞤼𞤢 𞤫 𞤦𞤮𞥅𞤼𞤮 𞤥𞤢𞤪𞤮 𞤳𞤢𞤤𞤢.

𞤅𞤮𞤥𞤦𞤮 𞤯𞤵𞤥⹁ 𞤸𞤭𞤩𞤫 𞤴𞤫𞥅𞤴𞤭𞤼𞤭𞤪𞤣𞤫 𞤦𞤮𞥅𞤼𞤮 𞤲𞤺𞤮𞤲 𞥓𞥕𞥐.𞥐𞥐𞥐𞤊𞤘. 𞤖𞤭𞤲𞤮 𞤤𞤫⹁ 𞤯𞤵𞤲 𞤲𞤮 𞤤𞤵𞤲𞤣𞤭𞥅 𞤷𞤮𞤺𞥆𞤵 𞤸𞤢𞤨𞥆𞤢𞥄 𞤲𞤺𞤵 𞤲𞤺𞤵𞤲. 𞤚𞤢𞤱𞤼𞤭 𞤳𞤢𞤣𞤭⹁ 𞤯𞤵𞥅𞤯𞤵𞤩𞤫 𞤧𞤮𞥅𞤣𞤮𞤴𞤢𞤴 𞤃𞤢𞤣𞤭𞥅𞤲𞤢 𞤸𞤢𞤪𞤢 𞤱𞤢𞤯𞤢𞤲𞤢𞥄𞤳𞤢 𞤳𞤢𞤴𞤣𞤭 𞤧𞤫𞥅𞤣𞤭𞤲𞤣𞤭 𞤷𞤮𞤺𞥆𞤵 𞤲𞤺𞤵𞤲.

𞤔𞤮𞥅𞤲𞤭 𞤲𞤮𞤲 𞤧𞤭 𞤼𞤫𞤬𞤮𞥅𞤩𞤫 𞤷𞤮𞤺𞥆𞤵 𞤤𞤢𞤲𞤣𞤭𞤳𞤫 𞤳𞤮 𞤶𞤫𞤤𞤵⹁ 𞤴𞤫𞥅𞤴𞤭𞤼𞤮𞥅𞤱𞤮 𞤮𞤲 𞤸𞤢𞥄𞤤𞤭𞥅 𞤳𞤮 𞤤𞤵𞤲𞤣𞤭𞥅 𞤷𞤮𞤺𞥆𞤵 𞤸𞤢𞤨𞥆𞤢𞥄𞤲𞤺𞤵 𞤲𞤺𞤵𞤲⹁ 𞤥𞤢𞤤𞥆𞤢 𞤧𞤭 𞤮 𞤢𞤤𞤢𞥄 𞤳𞤢𞤴𞤣𞤭 𞤲𞤣𞤭 𞤮 𞤧𞤮𞥅𞤣𞤭𞤪𞤭 𞤲𞤣𞤭𞤲⹁ 𞤩𞤫 𞤲𞤮𞤣𞥆𞤭𞤼𞤢𞤴 𞤥𞤮 𞤳𞤢 𞤴𞤭𞥅𞤤𞤭𞤪𞤣𞤫 𞤥𞤢𞤩𞥆𞤫. 𞤅𞤭 𞤮 𞤲𞤮𞥅𞤼𞤢𞥄𞤳𞤭 𞤸𞤢𞥄 𞤦𞤢𞥄𞤤𞤯𞤫 𞤼𞤢𞤼𞤭 𞤬𞤫𞤰𞥆𞤭𞥅⹁ 𞤩𞤫 𞤢𞤪𞤢𞤴 𞤩𞤫 𞤮𞤥𞤦𞤢 𞤴𞤫𞥅𞤴𞤭𞤪𞤣𞤫 𞤥𞤢𞤳𞥆𞤮 𞤲𞤣𞤫𞤲 𞤸𞤢𞥄 𞤮 𞤲𞤮𞥅𞤼𞤮𞤴𞤮𞥅.

𞤉 𞤴𞤮𞤲𞤼𞤫𞤪𞤫 𞤬𞤫𞤰𞥆𞤵𞤲𞤣𞤫 𞤯𞤮𞥅⹁ 𞤦𞤵𞤴 𞤲𞤮𞤣𞥆𞤭𞤼𞤢𞤲𞤮 𞤳𞤢 𞤴𞤭𞥅𞤤𞤭𞤪𞤯𞤫 𞤳𞤮𞤲𞤮 𞤩𞤫 𞤲𞤮𞥅𞤼𞤢𞤲𞤮𞥅𞤳𞤭. 𞤒𞤫𞥅𞤴𞤭𞤪𞤤𞤫 𞤥𞤢𞤩𞥆𞤫 𞤯𞤫𞤲 𞤮𞤥𞤦𞤢𞥄𞤥𞤢 𞤸𞤢𞥄 𞤩𞤫 𞤲𞤮𞥅𞤼𞤮𞤴𞤮𞥅 𞤩𞤫 𞤩𞤢𞤲𞤺𞤭𞤲𞤢 𞤳𞤮 𞤸𞤢𞤯𞤭 𞤩𞤫 𞤻𞤭𞥅𞤩𞤲𞤵𞤣𞤫 𞤷𞤮𞤺𞥆𞤵 𞤸𞤢𞤨𞥆𞤢𞥄𞤲𞤺𞤵 𞤲𞤺𞤵𞤲.

𞤐𞤮 𞤱𞤮𞥅𞤣𞤭 𞤼𞤭𞤨𞥆𞤭𞤲𞤭𞤪𞤩𞤫 𞤥𞤢𞥄𞤪𞤮 𞥓𞥗𞥐.𞥐𞥐𞥐𞤊𞤘 𞤢𞤣𞤮 𞤤𞤢𞥄𞤥𞤵 𞤲𞤺𞤵𞤲 𞤧𞤢𞤪𞤯𞤭𞤲𞤣𞤫 𞤷𞤮𞤺𞥆𞤭 𞤯𞤭𞤲⹁ 𞤩𞤫𞤲 𞤯𞤮𞤲 𞤱𞤢𞥄𞤱𞤢𞤼𞤢𞥄 𞤴𞤫𞥅𞤴𞤭𞤪𞤣𞤫 𞤷𞤮𞤺𞥆𞤵 𞤬𞤭𞤩𞤢𞥄𞤲𞤺𞤵 𞤲𞤺𞤵𞤲. 𞤅𞤮 𞤩𞤫 𞤱𞤢𞤯𞤭𞥅 𞤯𞤵𞤲⹁ 𞤩𞤫 𞤴𞤢𞤤𞤼𞤢𞤼𞤢𞥄. 𞤊𞤭𞥅 𞤲𞤮𞤲 𞤱𞤮𞤼𞤢 𞤩𞤫 𞤥𞤵𞤪𞤧𞤭𞤲 𞤶𞤢𞤱𞤤𞤫 𞤥𞤢𞤩𞥆𞤫⹁ 𞤸𞤭𞤩𞤫 𞤥𞤢𞤪𞤵𞤣𞤫 𞤥𞤢𞥄𞤪𞤮 𞤥𞤢𞤩𞥆𞤫 𞤳𞤮𞤲 𞤸𞤢𞥄 𞤴𞤢𞤥𞤭𞤪𞤮𞥅𞤪𞤫 𞤲𞤣𞤫𞤲 𞤶𞤭𞤲𞥆𞤢 𞤻𞤢𞤤𞤲𞤣𞤫 𞥓𞥐 𞤅𞤫𞥅𞤯𞤼𞤮 𞥒𞥐𞥒𞥔.

𞤐𞤣𞤫 𞤼𞤢𞤱𞤵𞤲𞤮𞥅 𞤲𞤮𞤲 𞤳𞤮 𞤸𞤫𞥅𞤱𞤭 𞤫 𞤥𞤢𞥄𞤪𞤮 𞤻𞤢𞥄𞤥𞤫𞤼𞤫𞥅𞤳𞤮 𞤳𞤮𞤲 𞤺𞤭𞤲𞤫 𞤳𞤮 𞤀𞥄𞥁𞤭𞤴𞤢 𞤭𞤱𞤢𞤼𞤢⹁ 𞤲𞤭𞥅𞤲𞤭𞥅 𞤤𞤫 𞤷𞤮𞤺𞥆𞤵 𞤲𞤺𞤵𞤲 𞤲𞤮 𞤩𞤫𞤴𞤣𞤭𞥅 𞤼𞤮𞤲⹁ 𞤼𞤢𞤱𞤼𞤭 𞤳𞤢𞤣𞤭 𞤤𞤢𞥄𞤥𞤵 𞤲𞤺𞤵𞤲 𞤯𞤵𞤴𞤼𞤢𞥄𞤤𞤭 𞤶𞤮𞤥𞤮𞤪𞤤𞤭 𞤯𞤭𞤲⹁ 𞤲𞤮 𞤸𞤢𞤧𞤭 𞤳𞤢 𞤥𞤢𞥄𞤪𞤮 𞤧𞤢𞤯𞤢 𞤫 𞤤𞤵𞥅𞤥𞤫 𞤯𞤫𞤲 𞤳𞤢 𞤧𞤵𞥅𞤥𞤢𞤴𞤫𞥅𞤪𞤵 𞤯𞤮𞥅.

𞤒𞤮𞤼𞥆𞤲𞤢𞤲𞤣𞤫 𞤕𞤫𞤪𞤲𞤮 𞤃𞤢𞥄𞤤𞤭𞤳 𞤔𞤢𞤤𞥆𞤮