𞤘𞤋𞤐𞤉: 𞤖𞤀𞤑𞥆𞤓𞤐’𞤁𞤉 𞤄𞤉𞤈𞤐𞤀𞥄𞤈 𞤘𞤓𞥅𞤃𞤓 𞤉 𞤡𞤀𞤈𞤂 𞤈𞤀𞤒𞤚⹁ 𞤑𞤌 𞤖𞤌𞤃𞤄𞤌 𞤔𞤌𞤔𞥆𞤀𞤚𞤀؟

𞤄𞤉𞤈𞤐𞤀𞥄𞤈 𞤘𞤓𞥅𞤃𞤓⹁ 𞤢𞤪𞤣𞤭𞥅𞤯𞤮 𞤶𞤢𞥄𞤺𞤮𞤪𞤢𞤤 𞤘𞤋𞤐𞤉 𞤲𞤺𞤢𞤤 𞤫 𞤡𞤀𞤈𞤂 𞤈𞤀𞤒𞤚⹁ 𞤶𞤢𞥄𞤺𞤮𞤪𞤯𞤮 𞤥𞤢𞤳𞥆𞤮 𞤮𞤲 𞤳𞤢 𞤻𞤢𞥄𞤱𞤮𞥅𞤪𞤫 𞤲𞤮 𞤨𞤮𞥅𞤯𞤮𞤲’𞤣𞤭𞤪𞤣𞤫.

𞤑𞤮 𞤱𞤮𞤲𞤭 𞤧𞤮𞤥𞤦𞤮 𞤲𞤺𞤢𞥄𞤤 𞤨𞤮𞥅𞤯𞤮𞤼𞤭𞤪𞤢𞤤⹁ 𞤳𞤮 𞤲𞤣𞤫 𞤡𞤀𞤈𞤂 𞤈𞤀𞤒𞤚 𞤲𞤫𞤤𞤣𞤵𞤲𞤮𞥅 𞤘𞤓𞥅𞤃𞤓 𞤩𞤢𞤼𞤢𞥄𞤳𞤵𞤪𞤵 𞤢𞤲𞤣𞤭𞤺𞤮𞤤 𞤥𞤮 𞤱𞤮𞤲𞤣𞤫𞤥𞤢 𞤮𞤥𞤮 𞤭𞤥𞥆𞤭𞤲𞤣𞤫 𞤤𞤭𞤻𞤮𞥅𞤪𞤫 𞤬𞤢𞥄𞤣𞤫 𞤫 𞤲𞤮 𞤒𞤭𞥅𞤤𞤮𞥅𞤩𞤫 𞤃𞤵𞤪𞤢𞥄𞤯𞤭 𞤐𞤺𞤢𞤤𞤵𞤴𞤢𞤲𞤳𞤫𞥅𞤶𞤭 (DAF) 𞤫 𞤖𞤮𞥅𞤪𞤫𞥅𞤩𞤫 𞤘𞤵𞤪𞤫 𞤯𞤫𞤲⹁ 𞤱𞤮𞤲𞤭 𞤸𞤵𞥅𞤪𞤭𞤪𞤣𞤫 𞤶𞤢𞤱𞤤𞤫 𞤳𞤢𞤬𞤢𞥄𞤯𞤫 𞤯𞤫𞤲. 𞤌 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤩𞤫𞥅 𞤼𞤮𞤯𞥆𞤢𞥄𞤩𞤫 𞤯𞤮𞤮 𞤳𞤫𞥅𞤪𞤭𞤲𞤢𞤲𞤢𞥄𞤥𞤢 𞤴𞤭𞥅𞤤𞤢𞤺𞤮𞤤.

𞤉 𞤩𞤢𞤼𞤢𞥄𞤳𞤵𞤪𞤵 𞤶𞤢𞥄𞤦𞤢𞤺𞤮𞤤 𞤔𞤢𞥄𞤺𞤮𞤪𞤯𞤮 𞤙𞤢𞥄𞤱𞤮 𞤲𞤺𞤮𞤲⹁ 𞤄𞤉𞤈𞤐𞤀𞥄𞤈 𞤘𞤓𞥅𞤃𞤓⹁ 𞤀𞤪𞤣𞤮 𞤔𞤢𞥄𞤺𞤮𞤪𞤢𞤤 𞤘𞤭𞤲𞤫 𞤲𞤺𞤢𞤤 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤨𞤫𞤸𞤫 𞤯𞤫 𞤡𞤀𞤈𞤂 𞤈𞤀𞤒𞤚 𞤰𞤫𞤼𞥆𞤭 𞤯𞤫𞤲 𞤲𞤮 𞤽𞤢𞤤𞤯𞤭𞤲𞤭 𞤥𞤮. 𞤌 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤯𞤫𞤲 𞤨𞤫𞤸𞤫 𞤲𞤮 𞤥𞤢𞤪𞤭 𞤶𞤮𞤤𞤯𞤫 𞤯𞤵𞥅𞤯𞤵𞤯𞤫 𞤼𞤢𞤱𞤵𞤣𞤫 𞤩𞤫𞥅 𞤒𞤭𞥅𞤤𞤮𞥅𞤩𞤫 𞤐𞤺𞤢𞤤𞤵 𞤩𞤫 𞤮 𞤸𞤵𞥅𞤤𞤢𞤲𞤭⹁ 𞤳𞤮 𞤴𞤢𞤥𞤭𞤪𞤮𞥅𞤶𞤫 𞤔𞤢𞥄𞤺𞤮𞤪𞤩𞤫 𞤩𞤫𞤲⹁ 𞤩𞤫 𞤱𞤮𞤲𞤭 𞤼𞤮𞤼𞥆𞤵𞤣𞤫. 𞤏𞤮𞤲𞤢𞥄 𞤧𞤢𞤺𞤮 𞤥𞤢𞤩𞥆𞤫 𞤩𞤫 𞤱𞤮𞤲𞤭 𞤸𞤵𞥅𞤱𞤭𞤪𞤣𞤫. 𞤅𞤭 𞤩𞤫 𞤼𞤫𞤬𞤫𞤼𞤫⹁ 𞤸𞤢𞤪𞤢𞤴 𞤳𞤮 𞤸𞤮𞥅𞤪𞤫𞥅𞤩𞤫 𞤶𞤢𞥄𞤺𞤮𞤪𞤯𞤫 𞤯𞤫𞤲 𞤼𞤭𞤺𞤭 𞤸𞤵𞥅𞤤𞤢𞤲𞤢𞥄. 𞤌 𞤸𞤮𞤤𞥆𞤭 𞤳𞤢𞤣𞤭 𞤱𞤮𞤲𞤣𞤫𞤥𞤢 𞤤𞤢𞥄𞤥𞤢𞤼𞤫𞥅𞤪𞤭 𞤲𞤣𞤭𞤲 𞤢𞤤𞤢𞥄 𞤬𞤫𞥅𞤪𞤫 𞤸𞤵𞥅𞤩𞤲𞤵𞤺𞤮𞤤 𞤱𞤢𞤲𞤮 𞤲𞤣𞤫𞥅 𞤼𞤫𞤬𞤮𞥅𞤪𞤫 𞤴𞤢𞥄𞤶𞤵𞤲’𞤣𞤫.

𞤌 𞤸𞤮𞤥𞤦𞤭𞤪𞤭 𞤩𞤢𞤼𞤢𞥄𞤳𞤵𞤪𞤵 𞤲𞤣𞤵𞤲 𞤱𞤭𞤴𞤵𞤺𞤮𞤤 𞤱𞤮𞤲𞤣𞤫𞤥𞤢 𞤢𞤣𞤮 𞤔𞤢𞥄𞤺𞤮𞤪𞤯𞤮 𞤮𞤲 𞤳𞤢 𞤙𞤢𞥄𞤱𞤮𞥅𞤪𞤫 𞤭𞤥𞥆𞤭𞤲𞤣𞤫 𞤲𞤣𞤫𞥅 𞤤𞤭𞤻𞤮𞥅𞤪𞤫⹁ 𞤮𞤥𞤮 𞤸𞤢𞥄𞤲𞤵𞤲𞤮𞥅 𞤢𞤪𞤣𞤭𞤲𞤣𞤫 𞤫𞤩𞥆𞤮𞥅𞤪𞤫 𞤲𞤣𞤫𞤲 𞤴𞤫𞥅𞤧𞤮 𞤐𞤄𞤢𞤼𞤵 𞤔𞤢𞥄𞤺𞤮𞤪𞤩𞤫 𞤩𞤫𞤲 ( conseil des ministres).

𞤅𞤀𞤈𞤂 𞤈𞤀𞤒𞤚 𞤲𞤫𞥅𞤩𞤲𞤭𞤼𞤢𞥄𞤳𞤭 𞤫 𞤶𞤢𞥄𞤦𞤢𞤺𞤮𞤤 𞤀𞤪𞤣𞤮 𞤥𞤢𞤳𞥆𞤮 𞤮𞤲. 𞤉 𞤩𞤢𞤼𞤢𞥄𞤳𞤫𞤱𞤮𞤤 𞤲𞤺𞤮𞥅𞤤 𞤮 𞤲𞤫𞤤𞤣𞤭 𞤄𞤉𞤈𞤐𞤀𞥄𞤈 𞤘𞤓𞥅𞤃𞤓⹁ 𞤮 𞤣𞤢𞤪𞤢𞤲𞤭𞥅 𞤨𞤫𞤱𞤶𞤫 𞤥𞤢𞤳𞥆𞤮 𞤯𞤫𞤲 𞤲𞤮 𞤧𞤫𞤥𞤦𞤭𞤪𞤭. 𞤌 𞤸𞤮𞤤𞥆𞤭 𞤱𞤮𞤲𞤣𞤫𞤥𞤢 𞤳𞤵𞥅𞤱𞤯𞤫 𞤥𞤢𞤳𞥆𞤮 𞤯𞤫𞤲 𞤳𞤮 𞤫 𞤧𞤢𞤪𞤭𞤴𞤢𞥄𞤶𞤭 𞤤𞤫𞤴𞤣𞤭 𞤲𞤣𞤭𞤲 𞤩𞤢𞤸𞤭𞥅. 𞤈𞤫𞤬𞤼𞤭 𞤳𞤢𞤣𞤭⹁ 𞤔𞤢𞥄𞤺𞤮𞤪𞤢𞤤 𞤙𞤢𞥄𞤱𞤮 𞤲𞤺𞤢𞤤 𞤴𞤮𞤲𞤺𞤭𞤼𞤢𞥄𞤳𞤭 𞤫 𞤸𞤢𞤴 𞤸𞤵𞥅𞤲𞤣𞤫.

𞤐𞤮 𞤶𞤢𞤪𞤭 𞤢𞤲𞤣𞤭𞤼𞤭𞤲𞤣𞤫 𞤱𞤮𞤲𞤣𞤫𞤥𞤢 𞤲𞤮 𞤶𞤫𞤴𞤢𞥄 𞤫 𞤧𞤢𞤪𞤼𞤭𞥅𞤶𞤭 𞤣𞤫𞤥𞤮𞤳𞤢𞤪𞤢𞥄𞤳𞤵 𞤯𞤭𞤲⹁ 𞤱𞤮𞥅𞤣𞤫𞥅𞤣𞤫 𞤷𞤢𞤤𞤯𞤭 𞤤𞤢𞥄𞤥𞤵 𞤯𞤭𞤲 𞤼𞤢𞤼𞤭: 𞤅𞤢𞤤𞤲𞤣𞤵 𞤧𞤢𞤪𞤯𞤭𞤲𞤮𞥅𞤪𞤵⹁ 𞤧𞤢𞤤𞤲𞤣𞤵 𞤸𞤵𞥅𞤩𞤲𞤮𞥅𞤪𞤵 𞤫 𞤧𞤢𞤤𞤲𞤣𞤵 𞤻𞤢𞥄𞤱𞤮𞥅𞤪𞤵. 𞤑𞤮 𞤸𞤢𞥄𞤲𞤭⹁ 𞤻𞤢𞥄𞤱𞤮𞥅𞤪𞤵 𞤲𞤣𞤵𞤲 𞤬𞤮𞤼𞤢𞥄 𞤣𞤭𞥅𞤧𞤭𞤲𞤢𞥄𞤣𞤫 𞤖𞤵𞥅𞤩𞤲𞤮𞥅𞤪𞤵 𞤲𞤣𞤵𞤲 𞤼𞤫𞤽𞤼𞤭𞤲𞤭𞥅 𞤧𞤮 𞤼𞤢𞤱𞤭𞥅 𞤧𞤮𞤺𞤭𞤼𞤢𞥄𞤩𞤫 𞤲𞤮 𞤮𞥅𞤻𞤭𞥅 𞤳𞤮 𞤫 𞤶𞤢𞥄𞤺𞤮𞤪𞤢𞤤 𞤶𞤫𞤴𞤢𞥄𞤲𞤺𞤢𞤤 𞤫 𞤧𞤢𞤤𞤲𞤣𞤵 𞤸𞤵𞥅𞤩𞤲𞤮𞥅𞤪𞤵 𞤲𞤣𞤵𞤲 𞤼𞤢𞤱𞤢𞥄.

𞤔𞤮𞥅𞤲𞤭 𞤃𞤢𞥄𞤥𞤢𞤣𞤭 𞤁𞤵𞤥𞤦𞤵𞤴𞤢⹁ 𞤸𞤮𞥅𞤪𞤫𞥅𞤶𞤮 𞤶𞤵𞤲𞥆𞤭𞤼𞤢𞤤 𞤘𞤭𞤲𞤫 𞤲𞤺𞤢𞤤⹁ 𞤲𞤮 𞤸𞤫𞤯𞤢𞥄. 𞤒𞤢𞤤𞥆𞤭 𞤮 𞤦𞤢𞤥𞤦𞤢𞤲𞤢𞤴 𞤧𞤢𞤪𞤭𞤴𞤢 𞤤𞤫𞤴𞤣𞤭 𞤲𞤣𞤭𞤲 𞤳𞤢𞥄 𞤮 𞤮 𞤸𞤵𞤤𞤢𞤴 𞤱𞤮𞤼𞤢 𞤤𞤭𞤻𞤮 𞤲𞤺𞤮𞤲 𞤸𞤫𞤱𞤼𞤵 𞤥𞤮.

𞤐𞤮 𞤸𞤢𞤧𞤭𞥅 𞤲𞤮𞤲⹁ 𞤯𞤵𞤥 𞤳𞤮 𞤭𞤥𞥆𞤭𞤲𞤭𞤪𞤢𞥄⹁ 𞤳𞤮 𞤱𞤫𞤤𞤧𞤭𞤲𞤣𞤭𞤲𞤺𞤮𞤤 𞤘𞤭𞤲𞤫𞤲𞤢𞥄𞤩𞤫 𞤩𞤫𞤲 𞤸𞤮𞥅𞤪𞤫 𞤳𞤮 𞤬𞤫𞤱𞤲𞤣𞤭𞥅 𞤳𞤮𞤲 𞤫 𞤬𞤭𞥅 𞤲𞤮 𞤘𞤭𞤲𞤫𞤲𞤢𞤩𞤫 𞤩𞤫𞤲 𞤴𞤫𞤶𞥆𞤭𞤼𞤭𞤪𞤢 CNRD. 𞤅𞤫𞥅𞤣𞤫 𞤮𞤲 𞤘𞤭𞤦𞤭 𞤑𞤋𞤈𞤋𞤒𞤉𞤊 (CRIEF) 𞤶𞤮𞥅𞤯𞥆𞤭𞤲𞤢𞥄⹁ 𞤸𞤮𞤤 𞤳𞤮 𞤴𞤢𞤤𞤼𞤭 𞤫 𞤥𞤵𞤵𞤲؟