𞤚𞤀𞤄𞤋𞤚𞤋𞥅 𞤑𞤌 𞤈𞤉𞤔𞤉𞤆 𞤚𞤀𞤒𞤋𞤆 𞤉𞤈𞤁𞤌𞤏𞤀𞤐 𞤊𞤌𞥅𞤂𞤋.

𞤄𞤢𞤯𞤼𞤢𞤲𞤫 𞤸𞤢𞤪𞤮 𞤯𞤭𞤯𞤢𞤩𞤮 𞤲𞤺𞤮𞤲 𞤳𞤢 𞤧𞤵𞤩𞤮 𞤬𞤭𞥅 𞤸𞤮𞥅𞤪𞤫𞥅𞤴𞤢𞥄𞤺𞤢𞤤 𞤚𞤵𞤪𞤳𞤭𞤴𞤫 𞤲𞤺𞤢𞤤⹁ 𞤳𞤮 𞤈𞤫𞤶𞤫𞤨 𞤚𞤢𞤴𞤭𞤨 𞤉𞤪𞤣𞤮𞤱𞤢𞤲 𞤱𞤮𞤲𞤭 𞤳𞤮 𞤸𞤫𞤩𞤭 𞤳𞤵𞤼𞤵.
𞤑𞤮 𞤫 𞤪𞤫𞤬𞤦𞤭𞤪𞥆𞤫 (𞤢𞤤𞤢𞤼)⹁ 𞤻𞤢𞤤𞤲𞤣𞤫 𞥒𞥘 𞤁𞤵𞥅𞤶𞤮 𞥒𞥐𞥒𞥓 𞤸𞤢𞤪𞤮 𞤯𞤭𞤯𞤢𞤩𞤮 𞤲𞤺𞤮𞤲 𞤱𞤢𞤯𞤭 𞤸𞤢𞤳𞥆𞤵𞤲𞥋𞤣𞤫 𞤈𞤉𞤔𞤉𞤆 𞤚𞤀𞤒𞤋𞤆 𞤉𞤈𞤁𞤌𞤏𞤀𞤐 𞤫 𞤑𞤉𞤃𞤀𞤂 𞤑𞤋𞤂𞤋𞤕𞤁𞤀𞤈𞤌𞤂𞤓 𞤲𞤣𞤫 𞤼𞤢𞤱𞤵𞤲𞤮𞥅 𞤸𞤢𞤴 𞤺𞤮𞥅𞤼𞤮 𞤫 𞤣𞤢𞤪𞤭𞤲𞤮𞥅𞤩𞤫 𞤩𞤫𞤲 𞤱𞤢𞥄𞤱𞤢𞥄𞤲𞤮 𞤥𞤮𞤬𞤼𞤵𞤣𞤫 𞤩𞤵𞤪𞤭 𞤬𞤫𞤷𞥆𞤫𞤪𞤫 𞤤𞤢𞤦𞤮 𞤲𞤺𞤮𞤲.

𞤑𞤮 𞤸𞤭𞤳𞥆𞤢 𞤱𞤮𞤲𞤭 𞤢𞤪𞤢𞤲𞤵𞤲⹁ 𞤸𞤢𞤪𞤮 𞤯𞤭𞤯𞤢𞤩𞤮 𞤲𞤮 𞤱𞤢𞤯𞤵𞤣𞤫 𞤚𞤵𞤪𞤳𞤭𞤴𞤫 𞤬𞤭𞥅 𞤧𞤵𞤩𞤢𞤺𞤮𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲. 𞤑𞤮 𞤱𞤮𞥅𞤱𞤭⹁ 𞤳𞤮 𞤳𞤢 𞤤𞤢𞥄𞤱𞤮𞤤 𞤢𞤪𞤢𞤲𞤮𞤤 𞤸𞤮𞤥𞤦𞤢𞤼𞤢. 𞤑𞤮𞤲𞤮 𞤸𞤭𞤳𞥆𞤢⹁ 𞤸𞤢𞤪𞤮 𞤱𞤮𞥅𞤼𞤮 𞤴𞤮𞤲𞤢𞥄𞤤𞤭. 𞤚𞤢𞤱𞤭 𞤳𞤮 𞤦𞤫𞥅 𞤉𞤪𞤣𞤮𞤱𞤢𞤲 𞤴𞤢𞤸𞤢𞤲𞤢 𞤨𞤮𞥅𞤤𞤺𞤵 𞤲𞤺𞤵𞤲 𞤳𞤢 𞤸𞤢𞤪𞤮 𞤯𞤭𞤯𞤢𞤩𞤮.

𞤖𞤢𞤪𞤮 𞤢𞤪𞤢𞤲𞤮 𞤲𞤺𞤮𞤲⹁ 𞤳𞤮 𞤻𞤢𞤤𞤲𞤣𞤫 𞥑𞥔 𞤑𞤮𞤪𞤧𞤮 𞤧𞤢𞥄𞤼𞤭𞤲𞤢𞥄𞤲𞤮. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅⹁ 𞤻𞤢𞤤𞤢𞥄𞤲𞤣𞤫 𞤲𞤣𞤫𞤲 𞤲𞤮 𞤸𞤢𞤱𞤪𞤮𞤲𞥋𞤣𞤭𞤪𞤭 𞤫 𞤸𞤢𞤶𞥆𞤵 𞤲𞤺𞤵𞤲⹁ 𞤤𞤢𞥄𞤥𞤵 𞤲𞤺𞤵𞤲 𞤢𞤪𞤼𞤭𞤪𞤭 𞤧𞤵𞤩𞤮 𞤲𞤺𞤮𞤲 𞤫 𞤁𞤵𞥅𞤶𞤮 𞥒𞥐𞥒𞥓.
𞤑𞤮 𞤲𞤢𞤴𞤮 𞤣𞤢𞤪𞤭𞤲𞤮𞥅 𞤫 𞤲𞤺𞤮𞥅 𞤸𞤢𞤪𞤮 𞤢𞤪𞤢𞤲𞤮. 𞤐𞤮 𞤼𞤭𞤶𞥆𞤮𞤪𞤢𞤲𞤮𞥅 𞤲𞤮𞤲⹁ 𞤸𞤢𞤴 𞤺𞤮𞥅𞤼𞤮 𞤫 𞤥𞤢𞤩𞥆𞤫 𞤸𞤫𞤩𞥆𞤢𞥄𞤲𞤮 𞤤𞤢𞤦𞤫 𞤨𞤮𞥅𞤤𞤺𞤵 𞤳𞤢 𞤢𞤪𞤢𞤲𞤣𞤫 𞤯𞤮𞤮. 𞤈𞤫𞤶𞤫𞤨 𞤸𞤫𞤩𞤭 𞥔𞥙.𞥕%⹁ 𞤑𞤫𞤥𞤢𞤤 𞤸𞤫𞤩𞤭 𞥔𞥔.𞥙% 𞤥𞤵𞤵𞤲. 𞤉 𞤸𞤭𞤲𞤤𞤫⹁ 𞤳𞤮 𞤬𞤢𞤱𞤲𞤵𞤲𞤮𞥅𞤯𞤮 𞤱𞤮𞥅 𞤸𞤮𞥅𞤪𞤫 𞤬𞤫𞤷𞥆𞤫𞤪𞤫 𞤲𞤣𞤫𞤲 𞤤𞤢𞥄𞤥𞤮𞤼𞤮.

𞤑𞤮𞤲𞤮 𞤬𞤭𞥅 𞤳𞤢𞤤𞤢 𞤮 𞤬𞤫𞤰𞥆𞤢𞥄𞤲𞤮 𞤳𞤢 𞤸𞤢𞤪𞤮 𞤢𞤪𞤢𞤲𞤮⹁ 𞤳𞤫𞤩𞤢𞤤 𞤉𞤪𞤣𞤮𞤱𞤢𞤲 𞤲𞤺𞤢𞤤 𞤽𞤢𞤤𞤯𞤭𞤲𞤭 𞤸𞤭𞥅𞤼𞤮𞤼𞤮𞥅𞤩𞤫 𞤯𞤵𞥅𞤯𞤵𞤩𞤫. 𞤇𞤫 𞤼𞤭𞤶𞥆𞤢𞤲𞤮𞥅𞤳𞤭 𞤮𞤥𞤮 𞤸𞤫𞤩𞤭 𞤫𞤥𞤦𞤫𞤪𞤫 𞤳𞤮 𞤮 𞤸𞤫𞤩𞤭 𞤳𞤮𞤲⹁ 𞤲𞤣𞤫 𞤼𞤢𞤱𞤵𞤲𞤮𞥅 𞤧𞤢𞤣𞤼𞤫𞥅𞤲𞤣𞤫 𞤲𞤣𞤫𞤲 𞤼𞤭𞥅𞤯𞤭𞥅 𞤫 𞤲𞤣𞤫𞤪 𞤤𞤫𞤴𞤣𞤭 𞤲𞤣𞤭𞤲. 𞤉 𞤸𞤭𞤲𞤮 𞤷𞤮𞤺𞥆𞤵 𞤲𞤺𞤵𞤲 𞤩𞤫𞤴𞤣𞤭𞤳𞤫⹁ 𞤳𞤮𞤲𞤮 𞤲𞤦𞤵𞥅𞤯𞤭 𞤯𞤭𞤲 𞤴𞤢𞤲𞤭𞥅. 𞤖𞤮𞥅𞤪𞤫 𞤯𞤵𞤥 𞤳𞤢𞤣𞤭⹁ 𞤤𞤢𞥄𞤥𞤵 𞤲𞤺𞤵𞤲 𞤲𞤮 𞤬𞤫𞤤𞤢𞥄 𞤬𞤮𞤼𞤢 𞤦𞤢𞤯𞤼𞤢𞤲𞤫 𞤣𞤭𞤤𞥆𞤫𞤪𞤫 𞤤𞤫𞤴𞤣𞤭 𞤱𞤢𞤯𞤵𞤲𞤮𞥅𞤲𞤣𞤫 𞤲𞤣𞤫𞤲 𞤫 𞤕𞤮𞤤𞤼𞤮 𞥒𞥐𞥒𞥓 𞤱𞤢𞤪𞤵𞤲𞤮𞥅𞤲𞤣𞤫 𞤳𞤮 𞤩𞤢𞤣𞤲𞤭 𞤴𞤭𞤥𞤩𞤫 𞤵𞤶𞤵𞤲𞤫 𞤷𞤢𞤨𞥆𞤢𞤲𞤯𞤫 𞤶𞤫𞥅𞤺𞤮𞤮.

𞤍𞤫𞥅 𞤷𞤢𞤯𞤫𞥅𞤤𞤫 𞤫 𞤯𞤵𞥅𞤯𞤵𞤣𞤫⹁ 𞤫 𞤼𞤭𞥅𞤯𞤵𞤣𞤫⹁ 𞤸𞤢𞤯𞤢𞥄𞤤𞤭 𞤉𞤪𞤣𞤮𞤱𞤢𞤲 𞤬𞤮𞥅𞤤𞤵𞤣𞤫. 𞤑𞤢 𞤸𞤢𞤪𞤮 𞤯𞤭𞤯𞤢𞤩𞤮⹁ 𞤮 𞤸𞤫𞤩𞤭 𞥕𞥒.𞥑𞥘%⹁ 𞤑𞤫𞤥𞤢𞤤 𞤸𞤫𞤩𞤭 𞥔𞥗.𞥘𞥒%.

𞤑𞤮 𞤲𞤺𞤵𞥅 𞤸𞤢𞤨𞥆𞤵 𞤯𞤮𞤮 𞤱𞤮𞤲𞤢𞤼𞤢 𞤸𞤢𞤨𞥆𞤵 𞤧𞤢𞤳𞥆𞤭𞤼𞤮𞤪𞤵 𞤉𞤪𞤣𞤮𞤱𞤢𞤲 𞤲𞤺𞤵𞤲. 𞤌 𞤩𞤵𞤪𞤲𞤭𞥅 𞤣𞤵𞥅𞤩𞤭𞥅 𞥒𞥑 𞤸𞤮𞥅𞤪𞤫 𞤚𞤵𞤪𞤳𞤭𞤴𞤫⹁ 𞤸𞤢𞤳𞥆𞤵𞤲𞥋𞤣𞤫 𞤱𞤮𞤲𞤵𞤺𞤮𞤤 𞤢𞤪𞤣𞤭𞥅𞤯𞤮 𞤥𞤢𞤤𞥆𞤢 𞤸𞤮𞥅𞤪𞤫𞥅𞤶𞤮. 𞤑𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥒⹁ 𞤬𞤫𞤣𞥆𞤫 𞤉𞤪𞤣𞤮𞤱𞤢𞤲 𞤲𞤣𞤫𞤲 (AKP) 𞤬𞤵𞤯𞥆𞤭 𞤼𞤢𞤱𞤫𞥅𞤣𞤫 𞤫 𞤧𞤵𞤩𞤮.
𞤄𞤢𞤯𞤼𞤢𞤲𞤫 𞤲𞤺𞤮𞤲 𞤧𞤵𞤩𞤮 𞤯𞤮𞤲⹁ 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤩𞤵𞤪𞤭 𞤨𞤫𞤤𞥆𞤫 𞤼𞤢𞤱𞤢𞤲𞤮𞥅𞤯𞤫 𞤯𞤫𞤲 𞤬𞤮𞤨 𞤸𞤫𞤩𞤵𞤣𞤫 𞤴𞤭𞤥𞤩𞤫. 𞤌𞤲𞤼𞤵𞤥𞤢⹁ 𞤬𞤫𞤣𞥆𞤫 𞤥𞤢𞤳𞥆𞤮 𞤲𞤣𞤫𞤲 𞤣𞤵𞤽𞤢𞤲𞤢𞥄 𞤥𞤮𞤰𞥆𞤭𞤲𞤺𞤮𞤤 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤. 𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤳𞤢𞤲𞤳𞤮 𞤉𞤪𞤣𞤮𞤱𞤢𞤲⹁ 𞤮𞤥𞤮 𞤼𞤮𞤽𞤢𞤲𞤢𞤲𞤮𞥅 𞤣𞤢𞤪𞤢𞤺𞤮𞤤 𞤬𞤭𞥅 𞤢𞤪𞤣𞤭𞤺𞤢𞤤⹁ 𞤀𞤦𞤣𞤵𞤤𞥆𞤢𞥄𞤸𞤢 𞤘𞤵𞤤 𞤢𞤪𞤣𞤭𞤲𞤢𞥄 𞤸𞤮𞥅𞤪𞤫 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤. 𞤑𞤮𞤲𞤮 𞤳𞤢 𞤸𞤭𞤼𞤢𞥄𞤲𞤣𞤫 𞥒𞥐𞥐𞥒 𞤲𞤣𞤫𞤲 𞤼𞤭𞤥𞥆𞤢𞤼𞤢 𞤯𞤮𞤲⹁ 𞤐𞤄𞤢𞤼𞤵 𞤬𞤭𞥅 𞤅𞤵𞤩𞤮 𞤲𞤺𞤮𞤲 𞤦𞤮𞤪𞤼𞤭 𞤦𞤮𞤼𞤫 𞤤𞤢𞤦𞤮 𞤲𞤺𞤮𞤲 𞤅𞤭𞥅𞤪𞤼⹁ 𞤶𞤮𞤶𞥆𞤭𞤲𞤭 𞤧𞤵𞤩𞤮 𞤸𞤫𞤧𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥓.

𞤐𞤣𞤫 𞤲𞤺𞤮𞤲 𞤧𞤵𞤩𞤮 𞤸𞤫𞤧𞤮 𞤲𞤮 𞤱𞤢𞤯𞤢𞤴𞤲𞤮𞥅 𞤫 𞤕𞤮𞤤𞤼𞤮 𞥒𞥐𞥐𞥓⹁ 𞤸𞤢𞤪𞤭 𞤉𞤪𞤣𞤮𞤱𞤢𞤲 𞤼𞤮𞤽𞤼𞤢𞤲𞤢𞥄𞤥𞤢 𞤣𞤢𞤪𞤢𞤺𞤮𞤤 𞤬𞤭𞥅 𞤢𞤪𞤣𞤢𞥄𞤳𞤵.
𞤇𞤢𞥄𞤱𞤼𞤭 𞤯𞤵𞤥⹁ 𞤉𞤪𞤣𞤮𞤱𞤢𞤲 𞤢𞤪𞤣𞤭𞤼𞤭𞥅 𞤚𞤵𞤪𞤳𞤭𞤴𞤫 𞤤𞤢𞥄𞤦𞤭 𞤯𞤭𞤯𞤭 𞤦𞤢𞤯𞤼𞤢𞤲𞤫 𞤷𞤵𞤩𞤫 𞤱𞤢𞤯𞤢𞤲𞤮𞥅𞤯𞤫 𞤯𞤫𞤲 𞤫 𞥒𞥐𞥐𞥗 𞤫 𞥒𞥐𞥑𞥑. 𞤊𞤫𞤱𞤲𞤣𞤮 𞤢𞤪𞤣𞤢𞥄𞤳𞤵 𞤉𞤪𞤣𞤮𞤱𞤢𞤲 𞤫 𞤢𞤣𞤮 𞤥𞤢𞥄𞤳𞤮⹁ 𞤳𞤮 𞤢𞤪𞤣𞤭𞥅𞤯𞤮 𞤶𞤢𞥄𞤺𞤮𞤪𞤢𞤤 𞤲𞤺𞤢𞤤 𞤩𞤵𞤪𞤵𞤲𞤮𞥅 𞤶𞤮𞤺𞤢𞥄𞤣𞤫 𞤣𞤮𞥅𞤤𞤫 𞤬𞤭𞥅 𞤳𞤢𞤤𞤢 𞤤𞤫𞤴𞤣𞤭 𞤲𞤣𞤭𞤲 𞤲𞤮 𞤶𞤮𞤺𞤭𞥅 𞤸𞤮𞥅𞤪𞤫𞥅𞤶𞤮. 𞤊𞤫𞤱𞤲𞤣𞤮 𞤮𞤲𞤼𞤵𞤥𞤢 𞤲𞤵𞤲⹁ 𞤳𞤮 𞤧𞤢𞤪𞤮𞥅𞤩𞤫 𞤩𞤫𞤲 𞤧𞤵𞤩𞤮𞤼𞤮𞤲𞤮𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲. 𞤑𞤮𞤲𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥐𞥗⹁ 𞤉𞤪𞤣𞤮𞤱𞤢𞤲 𞤫 𞤬𞤫𞤣𞥆𞤫 𞤥𞤵𞤵𞤲 𞤲𞤣𞤫𞤲 𞤱𞤢𞤴𞤤𞤭 𞤣𞤮𞤧𞤼𞤫𞤪𞤫 𞤥𞤢𞤤𞥆𞤢 𞤅𞤢𞤪𞤣𞤭 𞤥𞤢𞤱𞤲𞤣𞤭 𞤤𞤫𞤴𞤣𞤭 𞤲𞤣𞤭𞤲. 𞤇𞤫 𞤧𞤢𞤪𞤯𞤭𞤲𞤭 𞤱𞤮𞤲𞤣𞤫𞤥𞤢 𞤱𞤮𞤲𞤢𞥄 𞤧𞤢𞤪𞤮𞥅𞤩𞤫 𞤩𞤫𞤲 𞤧𞤵𞤩𞤮𞤼𞤮𞥅 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲⹁ 𞤳𞤮 𞤴𞤭𞤥𞤩𞤫 𞤤𞤫𞤴𞤣𞤭 𞤩𞤫𞤲 𞤶𞤮𞤶𞥆𞤢𞤲𞤭 𞤧𞤵𞤩𞤢𞤺𞤮𞤤 𞤸𞤮𞥅𞤪𞤫𞥅𞤶𞤮 𞤮𞤲.

𞤄𞤢𞤯𞤼𞤢𞤲𞤫 𞤱𞤢𞤴𞤤𞤵𞤺𞤮𞤤 𞤣𞤮𞤧𞤼𞤫𞤪𞤫 𞤲𞤣𞤫𞤲 𞤫 𞤼𞤭𞤥𞥆𞤵𞤺𞤮𞤤 𞤸𞤢𞤨𞥆𞤵 𞤥𞤢𞤳𞥆𞤮 𞤲𞤺𞤵𞤲 𞤳𞤢 𞤢𞤪𞤣𞤢𞤺𞤮𞤤 𞤶𞤢𞥄𞤺𞤮𞤪𞤢𞤤⹁ 𞤉𞤪𞤣𞤮𞤱𞤢𞤲 𞤣𞤢𞤪𞤭𞥅 𞤬𞤭𞥅 𞤤𞤢𞥄𞤼𞤢𞤺𞤮𞤤 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤫 𞤧𞤵𞤩𞤮 𞤱𞤢𞤯𞤵𞤲𞤮𞥅𞤲𞤺𞤮 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔.
𞤐𞤣𞤫 𞤼𞤢𞤱𞤵𞤲𞤮𞥅 𞤲𞤮𞤲 𞤀𞤪𞤣𞤭𞤺𞤢𞤤 𞤲𞤺𞤢𞤤 𞤲𞤮 𞤸𞤭𞤼𞥆𞤭⹁ 𞤲𞤮 𞤣𞤮𞥅𞤤𞤲𞤭 𞤩𞤵𞤪𞤭 𞤸𞤮𞥅𞤪𞤫𞤴𞤢𞥄𞤺𞤢𞤤 𞤲𞤺𞤢𞤤⹁ 𞤉𞤪𞤣𞤮𞤱𞤢𞤲 𞤫 𞤬𞤫𞤣𞥆𞤫 𞤥𞤵𞤵𞤲 𞤲𞤣𞤫𞤲 𞤱𞤢𞤴𞤤𞤭 𞤁𞤮𞤧𞤼𞤫𞤪𞤫 𞤤𞤫𞤴𞤣𞤭 𞤲𞤣𞤫𞤲 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥗. 𞤀𞤪𞤣𞤭𞤺𞤢𞤤 𞤲𞤺𞤢𞤤 𞤦𞤮𞤪𞤼𞤢𞥄 𞤳𞤢 𞤁𞤮𞤧𞤼𞤫𞤪𞤫 𞤸𞤫𞤧𞤫𞤪𞤫. 𞤑𞤢𞤤𞤢 𞤣𞤮𞥅𞤤𞤫 𞤸𞤫𞥅𞤪𞤭𞤲𞤢𞤲𞤢𞤲𞤮𞥅𞤯𞤫 𞤲𞤺𞤢𞤤⹁ 𞤩𞤫𞤴𞤣𞤭𞤼𞤢𞤲𞤢𞥄 𞤫 𞤣𞤮𞥅𞤤𞤫 𞤸𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤮𞤲.

𞤉 𞤧𞤵𞤩𞤮 𞤲𞤺𞤮𞤲 𞥒𞥐𞥑𞥘⹁ 𞤉𞤪𞤣𞤮𞤱𞤢𞤲 𞤶𞤮𞥅𞤯𞥆𞤭𞤲𞤼𞤭𞤲𞤢𞥄. 𞤑𞤮 𞤲𞤺𞤵𞤲 𞤸𞤢𞤨𞥆𞤵 𞤯𞤮𞤲 𞤸𞤢𞥄𞤲𞤵𞤲𞤮𞥅 𞤤𞤢𞥄𞤼𞤢𞥄𞤣𞤫 𞤸𞤢𞤨𞥆𞤵 𞤥𞤢𞤳𞥆𞤮 𞤧𞤢𞤳𞥆𞤭𞤼𞤭𞥅𞤲𞤺𞤵 𞤲𞤺𞤵𞤲 𞤩𞤢𞤴𞤼𞤭 𞤼𞤢𞤱𞤭 𞤮 𞤼𞤭𞤥𞥆𞤭𞤲𞤭𞥅𞤲𞤮 𞤸𞤢𞤨𞥆𞤵 𞤢𞤪𞤢𞤲𞤵⹁ 𞤲𞤺𞤵 𞤮 𞤸𞤫𞤲𞤣𞤭𞤲𞤮𞥅 𞤦𞤢𞤯𞤼𞤢𞤲𞤫 𞤧𞤵𞤩𞤮 𞤲𞤺𞤮𞤲 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥔.
𞤑𞤮𞤲𞤮 𞤲𞤣𞤫 𞤼𞤢𞤱𞤵𞤲𞤮𞥅 𞤸𞤢𞤪𞤭 𞤮 𞤱𞤢𞤴𞤤𞤭𞥅𞤲𞤮 𞤣𞤮𞤧𞤼𞤫𞤪𞤫 𞤲𞤣𞤫𞤲 𞤫 𞤸𞤭𞤼𞤢𞥄𞤲𞤣𞤫 𞥒𞥐𞥑𞥗⹁ 𞤲𞤺𞤵𞤲 𞤸𞤢𞤨𞥆𞤵 𞤯𞤮𞤲 𞤦𞤮𞤳𞥆𞤢𞥄𞤲𞤮 𞤸𞤢𞤲𞤣𞤫 𞤳𞤢𞤣𞤭. 𞤑𞤮𞤲𞤮 𞤧𞤭 𞤲𞤺𞤵𞥅 𞤸𞤢𞤨𞥆𞤵 𞤸𞤫𞤧𞤵 𞤯𞤮𞤮 𞤼𞤭𞤥𞥆𞤭𞥅⹁ 𞤉𞤪𞤣𞤮𞤱𞤢𞤲 𞤱𞤢𞥄𞤱𞤢𞤼𞤢𞥄 𞤤𞤢𞥄𞤥𞤭𞤼𞤢𞥄𞤣𞤫 𞤚𞤵𞤪𞤳𞤭𞤴𞤫.

𞤉𞤪𞤣𞤮𞤱𞤢𞤲 𞤼𞤭𞤥𞥆𞤭𞤲𞤭𞥅 𞤣𞤵𞥅𞤩𞤭 𞥖𞥙. 𞤑𞤮 𞤻𞤢𞤤𞤲𞤣𞤫 𞥒𞥖 𞤕𞤮𞤤𞤼𞤮 𞥑𞥙𞥕𞥖 𞤮 𞤶𞤭𞤦𞤭𞤲𞤢𞥄. 𞤌 𞤥𞤮 𞤩𞤢𞤽𞤭 𞤧𞤮𞤲𞥆𞤢𞥄𞤶𞤮 𞤱𞤭𞤴𞤫𞤼𞤫𞥅𞤯𞤮 𞤀𞤥𞤭𞤲𞤢 𞤉𞤪𞤣𞤮𞤱𞤢𞤲⹁ 𞤸𞤫𞤷𞥆𞤭𞤪𞤯𞤮 𞤥𞤮 𞤸𞤭𞤼𞤢𞥄𞤲𞤣𞤫. 𞤖𞤭𞤩𞤫 𞤸𞤫𞤩𞤭𞤣𞤭 𞤩𞤭𞤩𞥆𞤫 𞤲𞤢𞤴𞤮⹁ 𞤱𞤮𞤪𞤩𞤫 𞤯𞤭𞤯𞤮 𞤫 𞤪𞤫𞤱𞤩𞤫 𞤯𞤭𞤯𞤮. 𞤇𞤫𞥅 𞤬𞤮𞤨 𞤲𞤮 𞤱𞤵𞥅𞤪𞤭.

𞥑 – 𞤖𞤢𞤪𞤮 = tour = round. 𞤐𞤮 𞤬𞤭𞤪𞤼𞤭 𞤳𞤢𞤬𞤭 𞤬𞤭𞤶𞤮.
𞥒 – 𞤖𞤢𞤨𞥆𞤵 = mandat = term

𞥓 – 𞤔𞤢𞥄𞤺𞤮𞤪𞤢𞤤 gouvernement = government

𞥔 – 𞤖𞤮𞥅𞤪𞤫𞥅𞤶𞤮 = Président = President

𞥕 – 𞤸𞤮𞥅𞤪𞤢𞥄𞤳𞤵 – 𞤸𞤮𞥅𞤪𞤫𞤴𞤢𞥄𞤺𞤢𞤤 = Présidence 

𞥖 – 𞤀𞤪𞤣𞤮 – 𞤢𞤪𞤣𞤭𞥅𞤯𞤮 = PM

𞥗 – 𞤁𞤮𞤧𞤼𞤫𞤪𞤫 – 𞤅𞤢𞤪𞤣𞤭 = Constitution

𞥘 – 𞤅𞤢𞤪𞤮𞥅𞤱𞤮 = député  = representative